Yôhan 1 - Nau Brah Ndu Ngơi 2023

Nau ngơi gleh ( 1:1-18 ) Nau Ngơi plăch jêng kon bunuyh

¹ Ntơm saơm geh Nau Ngơi, Nau Ngơi gŭ ndrel ma Brah Ndu, jêh ri Nau Ngơi jêng Brah Ndu nơm.

² Bơh ntơm saơm, Păng gŭ ndrel ma Brah Ndu.

³ Lĕ rngôch ntil ndơ Păng rhăk njêng da dê, mâu geh ôh du ntil ndơ dơi rhăk njêng lah mâu tă bơh Păng.

⁴ Tâm Păng geh nau rêh, nau rêh nây jêng nau ang ma kon bunuyh.

⁵ Nau ang sol tâm nau ngo, ƀiălah nau ngo mâu dơn ôh nau ang.

⁶ Geh du huê bunuyh Brah Ndu njuăl văch amoh păng Y-Yôhan.

⁷ Păng nây văch jêh jêng du huê nơm mbơh gay mbơh nkoch ma nau ang, gay tă bơh păng lĕ rngôch bunuyh chroh da dê.

⁸ Păng nơm mâu di ôh jêng nau ang, ƀiălah păng văch gay mbơh nkoch ma nau ang.

⁹ Aơ jêng nau ang ngăn tât jêh ta neh ntu gay sol ang ma lĕ rngôch bunuyh.

¹⁰ Nau Ngơi gŭ tâm neh ntu jêh ri neh ntu hŏ njêng jêh tă bơh Păng, ƀiălah neh ntu mâu gĭt năl Păng ôh.

¹¹ Păng hŏ văch tâm bri dak Păng nơm, ƀiălah phung ƀon lan Păng mâu ŭch rom dơn Păng ôh.

¹² Ƀiălah mbu nơm rom dơn Păng, nâm bu ntĭt chroh ma amoh Păng, Păng ăn bunuyh nây nau dơi plơ̆ jêng kon Brah Ndu,

¹³ jêng phung bunuyh deh mâu di deh tă bơh mham, mâu lah tă bơh nglay săk kơnh, mâu lah tă bơh nau bunuyh ŭch, ƀiălah tă bơh Brah Ndu.

¹⁴ Nau Ngơi hŏ plăch jêng săk jăn bunuyh, gŭ rêh ta nklang he, bêng ma nau yô̆ jêh ri nau ngăn. Phung he hŏ saơ jêh nau chrêk rmah Păng, nanê̆ ngăn jêng nau chrêk rmah Kon Dul văch tă bơh Mbơ̆ Păng.

¹⁵ Y-Yôhan mbơh nkoch ma Păng jêh ri mbơh pô aơ: “Aơ jêng Nơm gâp hŏ lah jêh: ‘Nơm văch pakơi gâp rlau lơn ma gâp, yorlah Păng hŏ ơm geh lor ma gâp jêh.’ ”

¹⁶ Jêh ri tâm Păng jêng tu nau rmeh ler, lĕ rngôch phung he sŏk dơn nau yô̆ da dê, lơ hâu ntop nau yô̆.

¹⁷ Yorlah nau vay dơi mbơh tă bơh Y-Môis, ƀiălah nau yô̆ jêh ri nau ngăn tât tă bơh Brah Yêsu Krist.

¹⁸ Ê hŏ geh bunuyh saơ Brah Ndu, knŏng Kon Dul gŭ tâm nuih n'hâm Mbơ̆ jêng Nơm tâm mpơl jêh Mbơ̆ ăn ma he gĭt.

Nau ndrăp lor ma nau Brah Yêsu pah kan ( 1:19-51 ) Nau Y-Yôhan nti lah

¹⁹ Aơ jêng nau Y-Yôhan mbơh: Lah phung Yuđa njuăl phung kôranh ƀư brah jêh ri phung Lêvi tă bơh ƀon Yêrusalem tât ôp păng pô aơ: “Moh may jêng?”

²⁰ Y-Yôhan mbơh sŏng, mâu ôh pôn mo. Păng lah: “Gâp mâu di jêng Brah Krist ôh.”

²¹ Khân păng ôp tay: “Lah ndrĭ may mbu moh? Di lĕ may jêng Y-Êli?” Păng plơ̆ lah: “Mâu di.” “Di lĕ may jêng nơm mbơh lor?” Păng plơ̆ lah: “Mâu di.”

²² Khân păng lah: “Lah ndrĭ moh may jêng gay ma hên plơ̆ lah ma phung njuăl jêh hên? May mbơh mbu moh may jêng?”

²³ Păng plơ̆ lah: “Gâp jêng bâr bunuyh kuăl nter tâm bri rdah, ‘Ƀư sŏng hom trong Kôranh Brah,’ nâm nau nơm mbơh lor Y-Êsai hŏ lah jêh.”

²⁴ Phung bunuyh bu njuăl tât jêng tâm mpôl Pharisi,

²⁵ ôp păng pô aơ: “Tơlah may mâu di jêng Brah Krist, mâu di jêng Êli, mâu đŏng jêng nơm mbơh lor, lah ndrĭ mâm may dơi ƀư ƀaptem?”

²⁶ Y-Yôhan plơ̆ lah: “Gâp ƀư ƀaptem ma dak, ƀiălah geh du huê Nơm dôl gŭ tâm nklang khân may, ƀiălah khân may mâu gĭt năl Păng ôh;

²⁷ Nơm nây văch pakơi gâp, ƀiălah gâp mâu khư doh rse ntâu jot Păng ôh.”

²⁸ Lĕ nau aơ hŏ tât jêh ta ƀon Bêthani đah tê̆ dak krong Yurdan, ntŭk Y-Yôhan ƀư ƀaptem.

²⁹ Nar ôi taơ, Y-Yôhan saơ Brah Yêsu văch ta păng, păng lah pô aơ: “Ri Kon Biăp Brah Ndu, jêng Nơm sŏk lơi nau tih neh ntu!

³⁰ Aơ jêng Nơm gâp hŏ lah: ‘Nơm văch pakơi gâp, rlau lơn gâp, yorlah Păng hŏ ơm geh lor ma gâp jêh.’

³¹ Gâp nơm mâu gĭt năl Păng, ƀiălah gâp hŏ văch jêh ƀư ƀaptem ma dak, gay ma Păng tâm mpơl ăn ma phung Israel.”

³² Y-Yôhan hôm mbơh nkoch pô aơ: “Gâp hŏ saơ jêh Brah Huêng Ueh jŭr tă bơh trôk tâm ban ma sĭm plŭk drâm klơ Păng.

³³ Gâp mâu gĭt năl Păng, ƀiălah Nơm njuăl gâp ƀư ƀaptem ma dak hŏ lah jêh ma gâp: ‘Nơm may mra saơ Brah Huêng Ueh jŭr drâm klơ, nây jêng Nơm ƀư ƀaptem ma Brah Huêng Ueh.’

³⁴ Gâp lĕ saơ jêh ri mbơh nkoch pô aơ, aơ yơh jêng Kon Brah Ndu.”

Phung oh mon lor lơn ma Brah Yêsu

³⁵ Nar ôi taơ, Y-Yôhan hôm gŭ ta nây ndrel ma bar hê tâm phung oh mon păng.

³⁶ Păng saơ Brah Yêsu hăn rgăn ta nây, păng lah: “Ri, Kon Biăp Brah Ndu!”

³⁷ Bar hê oh mon tăng nau nây, khân păng tĭng ndô̆ Brah Yêsu.

³⁸ Brah Yêsu n'gĭl, saơ khân păng hăn tĭng Păng, jêh ri ôp: “Moh nau khân may joi?” Khân păng ơh: “Rabi (nâm bu ntĭt jêng Nơm Nti), mbah ntŭk Nơm Nti gŭ?”

³⁹ Brah Yêsu lah: “Văch uănh hom.” Khân păng hăn tât uănh ntŭk Păng gŭ, jêh ri gŭ ndrel ma Brah Yêsu tâm nar nây. Rnôk nây klăp lah puăn mông mhaơ.

⁴⁰ Tâm bar hê geh du huê hŏ tăng jêh nau Y-Yôhan lah jêh ri hăn tĭng Brah Yêsu, nây jêng Y-Andrê, oh Y-Simôn Pêtrôs.

⁴¹ Lor lơn, păng joi nâu păng jêng Y-Simôn jêh ri lah: “Hên hŏ mâp jêh Nơm Mêsi” (nâm bu ntĭt Brah Krist).

⁴² Păng njŭn leo Y-Simôn văch ta Brah Yêsu. Brah Yêsu uănh Y-Simôn jêh ri lah: “May jêng Y-Simôn, kon Y-Yôhan, bu mra amoh may Y-Sêphas,” nâm bu ntĭt Y-Pêtrôs.

⁴³ Nar ôi taơ, Brah Yêsu ŭch hăn rgăn n'gor Galilê. Păng joi Y-Philip jêh ri lah pô aơ: “Tĭng hom Gâp.”

⁴⁴ Y-Philip jêng bunuyh ƀon Ƀêtsaiđa, jêng ƀon ndrel ma Y-Andrê jêh ri Y-Pêtrôs.

⁴⁵ Y-Philip joi Y-Nathanel jêh ri lah: “Hên hŏ mâp jêh Nơm Y-Môis hŏ nchih jêh tâm nau vay, jêh ri lĕ phung nơm mbơh lor geh đŏng nchih tay; nây yơh jêng Brah Yêsu, kon Y-Yôsep, gŭ ta ƀon Nasaret.”

⁴⁶ Y-Nathanel lah: “Moh ndơ ueh luh tă bơh ƀon Nasaret?” Y-Philip lah: “Hăn uănh hom!”

⁴⁷ Brah Yêsu saơ Y-Nathanel văch ta Păng, Păng lah ma Y-Nathanel pô aơ: “Aơ jêng du huê bunuyh Israel ngăn, tâm păng mâu geh nau mƀruh nchơt ôh.”

⁴⁸ Y-Nathanel ơh: “Mâm ƀư Nơm Nti gĭt năl gâp?” Brah Yêsu plơ̆ tay: “Êlor Y-Philip kuăl may, Gâp hŏ saơ jêh may dôl gŭ tâm dâng tơm rvi.”

⁴⁹ Y-Nathanel ơh: “Hơi Nơm Nti, May jêng Kon Brah Ndu! May jêng hađăch ma phung Israel!”

⁵⁰ Brah Yêsu plơ̆ lah: “Di lĕ yorlah Gâp hŏ lah jêh Gâp saơ may gŭ tâm dâng tơm rvi, yor ri may chroh hĕ? May mra saơ lĕ nau kan dŭt toyh lơn đŏng.”

⁵¹ Jêh nây Brah Yêsu lah: “Nanê̆ ngăn, Gâp lah ngăn ma khân may: Khân may mra saơ trôk pơk jêh ri tông mpăr Brah Ndu jŭr ta klơ Kon Bunuyh.”