Yôel 3 - Nau Brah Ndu Ngơi 2023

Nau phat dôih lĕ bri dak

¹ “Yor aơ, tâm lĕ nar nây, jêh ri jêng rnôk Gâp mra njŭn phung bu nă bơh Yuđa jêh ri Yêrusalem plơ̆ sĭt,

² pôri Gâp mra rgum tay lĕ rngôch bri dak jêh ri njŭn khân păng jŭr tâm rlŭng Jôsaphat. Ta nây, Gâp mra phat dôih khân păng yor phung ƀon lan Gâp jêh ri drăp ndơn Gâp jêng phung Israel, yorlah khân păng hŏ ƀư du pru pra ta nklang phung mpôl băl bunuyh. Khân păng hŏ tâm pă bri neh Gâp,

³ jêh ri tâm nchroh ma phung ƀon lan Gâp. Khân păng hŏ rgâl kon bu klâu ndăm ŭch sŏk bu ur văng tĭr, jêh ri tăch kon bu ur druh gay sŏk ndrănh nhêt.

⁴ Hơi ƀon Tyre jêh ri Sidôn ndrel ma lĕ rngôch nkual neh Philistin, moh khân may jêng ma Gâp? Di lĕ khân may ŭch plơng bôk ma Gâp? Tơlah kơt nây Gâp mra ăn nau khân may ƀư nkhŭt tay ta klơ bôk khân may nơm gơnh ro jêh ri ƀât lât.

⁵ Yorlah khân may hŏ sŏk pit jêh prăk mah Gâp, jêh ri djôt lĕ drăp khlay Gâp lăp tâm lĕ jay rhŏ brah khân may;

⁶ khân may tăch jêh phung ƀon lan Yuđa jêh ri ƀon Yêrusalem ma phung Grek, mprơh khân păng du luh bơh bri khân păng nơm.

⁷ Aơ, Gâp mra ăn khân păng du dâk tă bơh ntŭk khân may hŏ tăch jêh khân păng; jêh ri Gâp mra ăn nau khân may ƀư nkhŭt tay ta klơ bôk khân may nơm.

⁸ Gâp mra jao phung kon bu ur jêh ri phung kon bu klâu khân may ma ti phung ƀon lan Yuđa, jêh ri khân păng mra tăch khân păng ăn ma phung Sabê, ma phung mpôl băl bunuyh gŭ ngai.” Brah Yêhôva lah pônây.

Nau phat dôih ta rlŭng Jôsaphat

⁹ Mbơh hom nau aơ ta nklang lĕ bri dak: Ndrăp hom ma nau tâm lơh, Nsônh hom phung tahan janh ktang. Lĕ rngôch phung tahan tâm lơh hăn văch tât hom jêh ri rduh hom tâm lơh!

¹⁰ Sŏk hom rnglay kau kai chiăr đao, Sŏk nhuĕ chiăr tak. Bunuyh ra ai lah hom: “Gâp dăng ktang!”

¹¹ Hơi lĕ rngôch bri dak gŭ jŭm, văch gơnh hom jêh ri tâm rgum ta nây! “Ơ Brah Yêhôva, dăn njuăl lĕ phung tahan ktang May trŭnh ta nây!”

¹² “Lĕ bri dak du dâk hom, hăn hao tâm rlŭng Jôsaphat, Yorlah ta nây jêng ntŭk Gâp mra gŭ phat dôih lĕ rngôch phung mpôl băl bunuyh gŭ jŭm.

¹³ Sŏk hom nhuĕ yorlah yan rek tât jêh. Văch hom plên play krăk ƀâu yorlah ntu lêk hŏ bêng jêh, lĕ thŭng ler jêh, Yorlah nau mhĭk khân păng toyh ngăn.”

¹⁴ Mpôl bunuyh âk ngăn, n'hêl nanê̆ jêng âk râk ngăn Tâm rlŭng Nau Phat Dôih! Yorlah nar Brah Yêhôva dăch jêh Tâm rlŭng Nau phat dôih.

¹⁵ Nar jêh ri khay jêng ngo klĕng, Lĕ mănh mbing mâu hôm nchrang ôh.

¹⁶ Brah Yêhôva mra rđuh bơh Siôn; Păng ƀư ăn nteh huy bâr Păng nơm luh bơh Yêrusalem. Lĕ ndâr trôk jêh ri lĕ rngôch neh ntu mpât n'găr da dê. Ƀiălah Brah Yêhôva jêng ntŭk nde ma phung ƀon lan Păng, Jêng pôih nâp ma phung ƀon lan Israel.

Nau ton ăn nau ueh uĭn ma phung ƀon lan Brah Ndu

¹⁷ “Rnôk nây, khân may mra gĭt Gâp jêng Yêhôva Brah Ndu khân may, Nơm gŭ ta Siôn, jêng yôk kloh ueh Gâp. Yêrusalem mra jêng ƀon kloh ueh Jêh ri phung bu năch mâu mra hôm pit in păng đŏng ôh.”

¹⁸ Tâm nar nây, lĕ yôk luh ndrănh njŭng; Lĕ dor mra luh hoch dak toh, Lĕ rngôch ăp n'hor dak Yuđa mra geh dak hoch ktang. Du n'hor dak mra luh tă bơh ngih Brah Yêhôva Jêh ri tŏ rlŭng Sitim.

¹⁹ N'gor Êjipt mra plơ̆ jêng rngol, Êđôm mra jêng bri rdah lĕ rai; Yorlah khân păng ƀư nau ƀai ma phung ƀon lan Yuđa Jêh ri khân păng ƀư pling mham mâu geh tih ôh tâm bri khân păng.

²⁰ Ƀiălah n'gor Yuđa mra geh bunuyh gŭ mro mrăng, Jêh ri ƀon Yêrusalem mra hôm gŭ rêh bơh rnôk aơ tât rnôk ri.

²¹ Gâp mra ƀư kloh nau rnon mham khân păng Gâp ê hŏ mâp ƀư kloh ôh, Yorlah Brah Yêhôva gŭ ta Siôn.