Yôel 2 - Nau Brah Ndu Ngơi 2023

Mbơh lor nau mbên nar Brah Yêhôva dăch văch

¹ Uh hom nŭng jêh ri tâm ƀon Siôn, Uh hom ăn nteh klơ yôk kloh ueh Gâp! Ăn lĕ rngôch phung gŭ tâm n'gor bri râm nsâr! Yorlah nar Brah Yêhôva dăch tât, nar nây dăch jêh.

² Nây jêng du nar ngo kleng chuê chuăng, Du nar tŭk krăk mbâl ngăn! Yorlah geh du phung mpôl bunuyh âk ngăn jêh ri ktang văch tât Luh nchrat lam jŭm yôk nâm bu ang ơm ôi; Ntơm bơh kăl e nau kơt nây mâu hŏ mâp geh, Jêh ri lĕ rngôch rnôk kăndơ̆ ăt mâu mra geh tâm ban pônây đŏng ôh.

³ Tanăp măt khân păng, geh ŭnh sa rvăn, Pakơi khân păng, geh chiông ŭnh sa ƀhiau. Êlor panăp khân păng văch, bri neh nâm bu n'gar Êđen; Pakơi khân păng rgăn, knŏng hôm jêng bri rdah rngot njăp. Mâu geh ôh ndơ dơi klaih bơh khân păng.

Nau krah ƀư mhĭk

⁴ Rup khân păng nâm bu phung seh; Khân păng nchuăt rduh nâm bu phung tahan.

⁵ Khân păng ta lô̆ nsăt ta klơ yôk tăng nâm bu nteh ndeh seh, Nâm bu nteh rtoh ŭnh sa rhe; Nâm bu du phung tahan ktang ndrăp hăn ta ntŭk tâm lơh.

⁶ Phung ƀon lan klach sâr tanăp măt khân păng, Lĕ rngôch klach brâp muh măt da dê.

⁷ Khân păng nchuăt rduh nâm bu phung tahan ktang, Jêh ri hao mpoh mpêr ƀon nâm bu phung tahan; Ăp nơm hăn tĭng trong khân păng nơm, Mâu teng ôh bơh trong khân păng.

⁸ Khân păng mâu tâm nklơ̆ tâm tom ndrăng nơm, ăp nơm hăn tĭng trong păng nơm; Khân păng rduh rgăn lĕ ndơ tâm lơh ƀiălah mâu nkân ôh.

⁹ Khân păng rduh ran rlet ma ƀon toyh, nchuăt klơ mpêr ƀon, Hao lăp tâm ngih lăp ta mpông bloh nâm bu nuyh ntŭng.

¹⁰ Tanăp khân păng, neh ntu n'găr, Lĕ ndâr trôk n'găr mpât, Nar, khay jêng ngo klĕng, Lĕ mănh mbing mâu hôm nchrat ôh.

¹¹ Brah Yêhôva ƀư nau Păng ngơi nteh huy tanăp phung tahan Păng, Yorlah pôih tahan Păng âk ngăn jêh ri âk ngăn ngên phung ƀư tĭng nau Păng ntăm ktang ngăn. Nar Brah Yêhôva toyh ngăn ngên jêh ri di ma klach ngăn, Mbu nơm dơi dơn?

Kuăl rmal nau tih

¹² Brah Yêhôva lah: “Aƀaơ aơ, plơ̆ sĭt hom ma Gâp ma lĕ nuih n'hâm, Ât hom sông sa, nhhiăng nhĭm jêh ri rngot vơl săk.

¹³ Hêk hom nuih n'hâm khân may jêh ri lơi hêk ôh ao. Plơ̆ sĭt hom ma Yêhôva, Brah Ndu khân may, Yorlah Păng ueh, yô̆ nđach, mâu gơnh ji nuih jêh ri ndrŏng ma nau rŏng; Rgâl nau mĭn mâu ƀư mhĭk.

¹⁴ Gĭt lah Păng mra plơ̆ tay, rgâl nau mĭn, jêh ri ăn nau ueh uĭn pakơi Păng, Ăn ma khân may geh mông găl nhhơr ndơ ƀư brah rnih môi, ndơ nhhơr nhêt Ma Yêhôva Brah Ndu khân may?”

¹⁵ Uh hom nŭng tâm ƀon Siôn, Tâm nal hom nar ât sông sa, Kuăl hom du phung toyh!

¹⁶ Rgum hom phung ƀon lan, Prăp êng phung tâm rƀŭn jêng kloh ueh; Jă hom phung kôranh bu ranh văch tât; Rgum hom phung kon se, Nđâp ma kon jê̆ hôm pu toh! Bu klâu ntơm nsông ur luh du hom tă bơh trôm jrô păng, Jêh ri ăn ƀăn luh du hom tă bơh jrô bê̆ch!

¹⁷ Phung kôranh ƀư brah jêng phung pah kan ma Brah Yêhôva, Nhhiăng nhĭm hom, nter kuăl ta nklang mpông ngih brah jêh ri ta nơng ƀư brah pô aơ: “Ơ Brah Yêhôva, dăn yô̆ nđach ma ƀon lan May, Lơi ăn drăp ndơn May phung mpôl băl bunuyh ƀư bêk prêng jêh ri mưch gơm. Mâm ăn bu ngơi ta nklang phung mpôl băl bunuyh lah pô aơ: ‘Ta ntŭk gŭ Brah Ndu khân păng?’”

Nau yô̆ an jêh ri nau ton ( 2:18 – 3:21 ) Nau ton ma nau njêng tay

¹⁸ Brah Yêhôva hŏ ntôn jêh yor bri aơ, Jêh ri Păng tâm mpơl nau yô̆ nđach ma phung ƀon lan Păng.

¹⁹ Brah Yêhôva lĕ plơ̆ lah jêh ri lah ma phung ƀon lan Păng pô aơ: “Aơ, Gâp mra ăn ma khân may: Ba răch, ndrănh mhe jêh ri dak ngi, Khân may mra hơm mpay ma lĕ ndơ nây. Gâp mâu mra ƀư ăn khân may Geh nau bêk prêng ta nklang phung mpôl băl bunuyh đŏng ôh.

²⁰ Gâp mra ăn phung rlăng mpeh pa lơ du ngai ma khân may, Mprơh khân păng tâm ntŭk neh kro nđang jêh ri bri rdah: Mprơh du phung tahan panăp khân păng tâm dak mƀŭt luh nar, Phung tahan pakơi khân păng tâm dak mƀŭt nhâp nar. N'hôl khân păng ƀâu ngăn, N'hôl khân păng luh ƀâu chrĭ.” Yorlah n'hêl nanê̆ Kôranh Brah hŏ ƀư lĕ nau kan toyh.

²¹ Hơi bri neh, lơi klach ôh! Maak răm rhơn hom, Yorlah Brah Yêhôva ƀư jêh lĕ kan toyh.

²² Hơi phung mpô mpa bri, lơi klach ôh, Yorlah lĕ ndrêch gơ̆ ta bri rdah mra chăt nse jêh, Tơm si mra luh play, Tơm rvi jêh ri tơm krăk ƀâu ăn play âk râk.

²³ Hơi phung kon ƀon Siôn, maak răm rhơn hom Tâm Yêhôva Brah Ndu khân may! Yorlah Păng ăn dak mih tŭp yan bôk rah tâm di ăn ma khân may; Nkhŭt dak mih yan bôk rah jêh dak mih kêng dŭt yan Jŭr ăn ma khân may nâm bu saơm.

²⁴ Lĕ nkual mprah ba mra bêng ma ba ƀlê, Lĕ drŏng mra bêng ler ndrănh mhe jêh ri dak ngi.

²⁵ Gâp mra ntrok tay ăn ma khân may Ma lĕ yan geh grăch sa Tă bơh ma krah, ndrŭng n'huk ntâu, ndrŭng rchuăl jêh ri krah nsăt, Jêng phung tahan toyh Gâp hŏ njuăl tât ta nklang khân may.

²⁶ Khân may mra sông sa jêh ri dơi hơm mpay, Jêh ri mra tâm rnê ma amoh Yêhôva Brah Ndu khân may, Jêng Nơm ƀư jêh nau khlay ngăn ngên ma khân may. Phung ƀon lan Gâp mâu mra geh nau bêk prêng đŏng ôh.

²⁷ Khân may mra gĭt pô aơ Gâp gŭ ta nklang phung Israel, Jêh ri gĭt pô aơ Gâp jêng Yêhôva Brah Ndu khân may, Mâu hôm geh nơm êng ôh. Phung ƀon lan Gâp mâu mra geh nau bêk prêng đŏng ôh.

Nar Brah Yêhôva

²⁸ “Jêh ta nây, Gâp mra nkhŭt Huêng Brah Gâp ta klơ lĕ rngôch nglay săk. Phung kon bu klâu jêh ri phung kon bu ur khân may mra mbơh lor; Phung bu ranh geh nau mbơi, Phung bu klâu ndăm mra saơ nau tâm saơ.

²⁹ Tâm lĕ nar nây, Gâp mra nkhŭt Huêng Brah Gâp tâm ban lĕ Ta klơ phung oh mon bu klâu oh mon bu ur.

³⁰ Gâp mra ăn tâm mpơl lĕ nau mbên khlay ta klơ trôk jêh ri ta neh ntu, Jêng mham, ŭnh, jêh ri lĕ n'gâng nhhŭk ŭnh.

³¹ Nar mra plơ̆ jêng ngo klĕng, Khay chăng nâm bu mham Lor tât nar dŭt toyh jêh ri klach krit văch bơh Brah Yêhôva.”

³² Rnôk nây, mbu nơm kuăl dăn amoh Brah Yêhôva mra dơi rklaih da dê Yorlah tĭng nau Brah Yêhôva, Ta klơ yôk Siôn jêh ri tâm ƀon Yêrusalem Mra geh bunuyh dơi tâm rklaih; Jêh ri tâm phung hôm e rêh klen, Mra dơi geh bunuyh Brah Yêhôva kuăl.