Yôel 1 - Nau Brah Ndu Ngơi 2023

Nau rlong uănh jêh ri nau rmal nau tih ( 1:1 – 2:17 )

¹ Nau Brah Yêhôva lah ma Y-Yôel, kon bu klâu Y-Pathuel:

Nhĭm nhhiăng ma nau rai yot bri dak

² Hơi phung kôranh bu ranh, iăt hom nau aơ! Hơi lĕ rngôch phung gŭ tâm n'gor, rkêng tôr iăt hom! Mâp geh lĕ nau aơ tâm rnôk rô̆ khân may, Mâu lah tâm rnôk chô yau khân may lĕ?

³ Nkoch hom nau aơ ma phung kon sau khân may, Jêh nây phung kon khân may nkoch tay ăn ma phung khân păng, Jêh ri phung kon khân păng mra nkoch tay ăn ma rnôk kăndơ̆.

⁴ Moh ndơ ndrŭng hôm om krah sa tay; Moh ndơ krah hôm om pôri ndrŭng sa n'huk ntâu; Moh ndơ ndrŭng n'huk ntâu hôm om pôri krah nsăt sa.

⁵ Hơi phung nhŭl ndrănh, kah rngăl hom jêh ri nhĭm nhhiăng! Hơi lĕ rngôch phung vay nhêt ndrănh, nhĭm nhhiăng hom, Yorlah ndrănh njŭng lĕ bu sŏk jêh tă bơh trôm mbung khân may!

⁶ Yorlah du phung mpôl bunuyh ktang jêh ri âk mâu dơi kơp hăn tâm lơh đah bri Gâp; Sêk khân păng jêng sêk yau mŭr, Khân păng geh neng yau mŭr me.

⁷ Khân păng ƀư rai tơm krăk ƀâu Gâp, Jêh ri n'huk ntâu tơm rvi Gâp; Khân păng n'huk lơi lĕ ntâu jêh ri mƀăr lơi, Ăn lĕ n'gĭng tơm si jêng nglang.

⁸ May nhĭm vơl hom nâm bu ur druh nsoh ao ƀau Nhĭm vơl ma sai dăch nđăp nôk ndăm!

⁹ Ndơ ƀư brah rnih môi jêh ri ndơ nhhơr nhêt sa bu ngroh lơi tă bơh ngih Brah Yêhôva; Phung kôranh ƀư brah pah kan ma Brah Yêhôva dôl nhĭm vơl.

¹⁰ Mir ba lĕ rai jêh, Bri neh klâng rngot, yorlah ba ƀlê rai jêh; Ndrănh mhe hŏ suăt jêh, dak ngi ăt mâu hôm geh lĕ.

¹¹ Hơi phung ƀư mir, bêk prêng hom; Hơi phung tăm tơm krăk ƀâu, nhĭm vơl hom ma ba ƀlê jêh ri ba ôrgơ, Yorlah yan kăch roih tâm mir hŏ roh jêh.

¹² Tơm krăk ƀâu huănh kro, tơm rvi roh rai; Nđâp tơm pom gra nat, tơm đung, tơm pôm, Jêh ri lĕ rngôch tơm si tâm mir huănh kro da dê; Nau răm maak kon bunuyh huănh roh tâm ban lĕ!

Ntĭm nti ma nau rmal

¹³ Hơi phung kôranh ƀư brah, nsoh hom ao ƀau jêh ri nhĭm vơl! Hơi phung pah kan ta nơng ƀư brah, nhĭm vơl hom! Hơi phung pah kan ma Brah Ndu gâp, Văch nsoh hom ao ƀau rngeh lĕ du măng! Yorlah ndơ ƀư brah rnih môi jêh ri ndơ nhhơr nhêt sa mâu hôm geh nhhơr Tâm ngih Brah Ndu khân may!

¹⁴ Nal hom nar ât sông sa! Kuăl hom tâm rgum du mpôl toyh! Tâm rgum hom phung kôranh bu ranh jêh ri lĕ rngôch bunuyh gŭ tâm n'gor Ta ntŭk ngih Brah Yêhôva Brah Ndu khân may! Jêh ri kuăl mbơh sơm hom ma Brah Yêhôva!

¹⁵ Ơ nar nây! Yorlah nar Brah Yêhôva dăch tât jêh. Păng tât nâm bu du nau ƀư rai văch tă bơh Nơm Geh Nau Brah.

¹⁶ Mâu hĕ ndơ sông sa bu hŏ sŏk lơi Panăp măt he, Jêh ri nau maak răm hâk maak Hŏ roh jêh tă bơh ngih Brah Ndu he lĕ?

¹⁷ Ntil huănh jêh tâm dâng rchuăl neh; Ngih prăp ndơ rai jêh, jay rlâm hăch, Yorlah ba mâu hôm geh.

¹⁸ Ri, mpô mpa nter nhhiăng hâu ngăn ngên! Phung ndrôk rmlơ uh ah ngăn! Yorlah khân păng mâu geh ndrêch gơ̆ sa đŏng ôh. Lĕ rngôch phung biăp rêh ni tâm ban lĕ.

¹⁹ Ơ Brah Yêhôva, gâp mbơh sơm ma May. Yorlah ŭnh sa rvăn jêh lĕ ndrêch gơ̆ nse tâm bri rdah, Chiông ŭnh hŏ su lĕ rngôch tơm si tâm mir!

²⁰ Mpô mpa bri nhhiăng nter đŏng ma May, Yorlah lĕ n'hor dak lĕ suăt kro jêh, Lĕ ŭnh sa jêh ndrêch gơ̆ tâm ntŭk bri rdah.