Yêrêmi 8 - Nau Brah Ndu Ngơi 2023

Nau chieh phung ƀon lan Yuđa

¹ Brah Yêhôva lah: “Rnôk nây, bu mra mpâk bơh ntu môch nting phung hađăch Yuđa, nting phung kôranh, nting phung kôranh ƀư brah, nting phung nơm mbơh lor, jêh ri nting phung gŭ tâm ƀon Yêrusalem.

² Bu mra ih lĕ nting nây tâm dâng nar, khay, jêh ri lĕ rngôch mănh klơ trôk khân păng hŏ rŏng kơnh, pah kan, hăn tĭng ndô̆, dăn lup, jêh ri yơk mbah. Lĕ nting nây mâu mra dơi rgum tay, ăt mâu dơi tâp ƀiălah mra jêng nâm bu ŭnh buh ta klơ măt neh.

³ Ndrel đah lĕ phung hôm e klen bơh phung ndŭl mpôl ƀai nây tâm lam ntŭk Gâp mprơh khân păng tât, pôri khĭt ueh lơn đah rêh.” Brah Yêhôva ma phung tahan lah pônây.

⁴ “May mbơh hom ma khân păng pô aơ geh Brah Yêhôva lah: ‘Dôl chêh prah, bu mâu plơ̆ dâk lĕ? Dôl vĭ nhhơt, bu mâu plơ̆ sĭt lĕ?

⁵ Pôri mâm ƀư ƀon lan plăch hăn, Yêrusalem aơ mâu răp jăp mro? Khân păng ăt hôm sâl mray nau ndơm, Dun nau plơ̆ sĭt.

⁶ Gâp rkêng tôr iăt tăng jêh, Ƀiălah khân păng mâu ngơi ngăn ôh, Mâu geh du huê rmal nau ƀai păng nơm, Hôm ngơi: “Gâp mâu geh ƀư ôh!” Lĕ rngôch tĭng ndô̆ trong êng da dê Nâm bu du mlâm seh rduh tâm lơh.

⁷ Nđâp sĭm njơch dak mpăr klơ trôk Hôm gĭt yan trơn ntŭk; Sĭm ntơp, sĭm rlêng, sĭm klang kreo, Hôm kah gĭt yan plơ̆ sĭt; Ƀiălah phung ƀon lan Gâp mâu gĭt ôh Nau Brah Yêhôva phat dôih!

⁸ Mâm khân may nănh ngơi: “Hên blau mĭn, Nau vay Brah Yêhôva gŭ ndrel ma hên,”? Ƀiălah aơ, chông mâng nchih nau mƀruh phung kôranh nchih samƀŭt Hŏ ƀư ăn nau vay nây luh nau mƀruh!

⁹ Phung blau mĭn mra prêng, Roh nau duh nđơr jêh ri geh dăk. Khân păng hŏ chalơi nau Brah Yêhôva, Mâm hôm dơi blau mĭn đŏng?

¹⁰ Yor nây, Gâp mra jao ur khân păng ăn bu êng, Mir khân păng ăn kôranh mhe; Yorlah ntơm bơh bunuyh dŭt jê̆ tât ma nơm toyh, Kơnh sa kao nau mâu di da dê; Ntơm bơh phung nơm mbơh lor tât kôranh ƀư brah, Gŭ rêh mƀruh ndơm da dê.

¹¹ Khân păng ƀư bah sôt rmanh kon bu ur phung ƀon lan Gâp ma nau ƀlơr, Jêh nây lah: “Đăp mpăn! đăp mpăn!” Ƀiălah mâu geh nau đăp mpăn ôh.

¹² Khân păng ƀư nau ƀơ̆ ƀơch, di nau bêk prêng, Ƀiălah khân păng mâu saơ nau bêk prêng ôh, Ăt mâu gĭt mâm nau bêk prêng. Yor nây, khân păng mra chêh prah ta nklang phung chêh prah; Tât nar Gâp phat dôih, khân păng mra cha lôt,’” Brah Yêhôva lah pônây.

¹³ Brah Yêhôva lah: “Gâp ŭch rgum khân păng jêh ri ƀư rai lĕ khân păng, Mâu mra hôm play krăk ƀâu ta klơ tơm krăk ƀâu, Mâu hôm play rvi ta klơ tơm rvi; N'ha mra kro klêu; Moh ndơ Gâp hŏ ăn ma khân păng bu mra sŏk lơi.”

¹⁴ Mâm ƀư he hôm gŭ mro? Tâm rƀŭn rgum, nchuăt ndrel lăp tâm ƀon nâp Jêh ri khĭt ta nây! Yorlah Yêhôva Brah Ndu he hŏ nal ăn he mra khĭt, Păng ăn he nhêt dak kăch khih, Yorlah he hŏ ƀư tih đah Brah Yêhôva.

¹⁵ He gŭ kâp nau đăp mpăn, Ƀiălah mâu saơ nau ueh ngăn tât ôh; Ŭch kâp năng ƀư bah, Knŏng saơ nau krit klach.

¹⁶ Tă bơh ƀon Dan, bu hŏ tăng nau nter seh; Neh n'găr mpât yorlah nteh krĭ phung seh tâm lơh. Khân păng tât rvăn neh jêh ri play kao neh, Rvăn ƀon jêh ri bunuyh gŭ tâm ƀon.

¹⁷ “Aơ, Gâp mra njuăl bêh tât ta nklang khân may, Phung bêh rmâng bu mâu dơi ƀư nđơh păng ôh, Khân păng mra kăp khân may.” Brah Yêhôva lah pônây.

Phung kôranh nơm mbơh lor nhĭm vơl ma ƀon lan khân păng

¹⁸ Ŭch ma gâp dơi bonh leng bơh nau rngot, Nau knap ƀư nchah rai tâm nuih n'hâm!

¹⁹ Aơ, geh bâr bu ur ƀon lan gâp kuăl rklaih, Plơ̆ sĭt bơh bri ngai ngăn: “Brah Yêhôva mâu hôm gŭ tâm ƀon Siôn hĕ? Hađăch Siôn mâu hôm gŭ tâm ƀon nây hĕ?” “Mâm ƀư khân păng dŏng rup trah khân păng Jêh ri brah dơm dam phung bu năch, Ƀư srônh ji nuih Gâp?”

²⁰ “Yan kăch rek hŏ rlau, yan ta vai lôch jêh, Phung hên mâu hŏ dơi tâm rklaih!”

²¹ Yorlah nau sôt rmanh phung kon bu ur ƀon lan gâp nuih n'hâm gâp ji ngăn yơh, Gâp nhĭm vơl klâng ndrê, nau krit nhŭp nâp gâp.

²² Tâm Gilêat mâu geh ntăk si ƀâu kah hĕ? Ta nây ăt mâu hôm geh nai dak si hĕ? Pônây mâm ƀư sôt rmanh kon bu ur phung ƀon lan gâp Mâu dơi ƀư bah?