Yêrêmi 7 - Nau Brah Ndu Ngơi 2023

Nau yơk mbah vĭ nhhơt phung ƀon lan Israel

¹ Aơ jêng nau Brah Yêhôva lah ma Y-Yêrêmi:

² “Dâk hom ta mpông ngih Brah Yêhôva jêh ri mbơh nau ngơi aơ: ‘Lĕ rngôch phung khân may jêng phung Yuđa hăn găn lĕ mpông aơ gay lăp yơk mbah Brah Yêhôva, iăt hom nau Brah Yêhôva.

³ Brah Yêhôva ma phung tahan, Brah Ndu Israel, lah pô aơ: Nkra hom trong jêh ri nau khân may ƀư pôri Gâp mra ăn khân may gŭ tay ntŭk aơ.

⁴ Lơi ta rnơm nsing ôh ma lĕ nau ngơi ndơm nâm bu: “Aơ jêng ngih brah Brah Yêhôva, ngih brah Brah Yêhôva, ngih brah Brah Yêhôva!”

⁵ Yorlah tơlah khân may rgâl ngăn trong jêh ri nau khân may ƀư, tơlah nanê̆ khân may gŭ ngao ndrăng nơm ma nau sŏng,

⁶ tơlah khân may mâu tŭn jot ôh phung bu năch, phung kon đơi mâu lah bu ur khĭt sai, jêh ri mâu ƀư pling mham mâu geh nau tih ta ntŭk aơ, mâu lĕ nchuăt tĭng phung brah êng gay vơt nau mhĭk ma khân may nơm,

⁷ pôri Gâp mra ăn khân may gŭ tay ta ntŭk aơ, tâm n'gor Gâp hŏ ăn jêh ma chô yau khân may ntơm bơh kăl e kŏ tât n'ho ro.

⁸ Ƀiălah khân may rnơm nsing nkhơng lĕ nau ngơi mƀruh nchơt mâu geh nau khlay ôh.

⁹ Mâu di hĕ khân may ntŭng, nkhĭt bunuyh, ƀư tih văng tĭr, ton mƀruh, nhhơr ndơ ƀâu kah ăn ma brah Baal, tĭng ndô̆ brah êng, jêng brah khân may mâu gĭt lĕ?

¹⁰ Mâm khân may hăn lăp ngih aơ, jêng ntŭk bu ntơ ma amoh Gâp, dâk tanăp Gâp jêh ri lah: “Hên hŏ dơi rklaih jêh!” Khân may ƀư pônây gay ƀư tih tay đŏng lĕ ntil nau tâm rmot nây.

¹¹ Pônây, khân may uănh ma ngih aơ, ntŭk dơi ntơ ma amoh Gâp, jêng trôm phung ntŭng lĕ? Aơ, Gâp nơm yơh, Gâp hŏ uănh saơ lĕ rngôch.’ Brah Yêhôva lah pô aơ.

¹² ‘Pônây, khân may hăn hom tât ta ntŭk Gâp ta Silô, jêng ntŭk Gâp dơm jêh amoh Gâp ntơm bơh saơm, uănh moh nau Gâp hŏ ƀư ăn păng yorlah nau mhĭk ƀon lan Gâp jêng Israel.’

¹³ Brah Yêhôva lah: ‘Aƀaơ ri, yorlah khân may hŏ ƀư jêh lĕ nau nây, Gâp vay ngơi ƀaƀơ lah ma khân may ƀiălah khân may mâu iăt ôh; Gâp hŏ kuăl khân may khân may mâu plơ̆ sĭt lah.

¹⁴ Yor nây moh nau Gâp hŏ ƀư ăn ma Silô, Gâp ăt mra ƀư ăn ngih aơ, jêng ngih dơi kuăl ma amoh Gâp, ngih khân may nsing, ntŭk gâp hŏ ăn jêh ma khân may ndrel phung chô yau khân may.

¹⁵ Gâp mra mprơh khân may bơh panăp Gâp, nâm bu Gâp hŏ mprơh oh nâu khân may, jêng lĕ rngôch ndŭl mpôl Êphraim.’

¹⁶ Bi may, Y-Yêrêmi, lơi ta may mbơh sơm ăn ma phung ƀon lan aơ, lơi ta vơl dăn, vah vơl dăn ma khân păng, mâu lĕ sŏl dăn ma Gâp, yorlah Gâp mâu mra iăt may ôh.

¹⁷ May mâu saơ hĕ moh khân păng ƀư tâm lĕ ƀon Yuđa jêh ri rŏ trong ƀon Yêrusalem?

¹⁸ Phung kon dônh long, mbơ̆ sŭnh ŭnh, mê̆ piăch rnih, gay ƀư ƀănh nhhơr ăn ma hađăch bu ur tâm trôk, hôm ƀư tay rƀŭn ndơ nhhơr nhêt sa ăn ma lĕ brah êng, gay nsônh nau ji nuih Gâp.”

¹⁹ Brah Yêhôva lah: “Di lĕ khân păng nsônh nau ji nuih Gâp? Mâu di hĕ khân păng ƀư rmanh êng, sŏk dơn nau bêk prêng ăn ma khân păng nơm nây hĕ?”

²⁰ Yor nây, Kôranh Yêhôva lah: “Aơ, nau ji nuih Gâp, nau ji nuih Gâp, mra nkhŭt jŭr ntŭk aơ, ta klơ bunuyh jêh ri mpô mpa, ta klơ tơm si tâm mir jêh ri kao play neh; nau ji nuih nây mra hit gring gring, mâu dơi buh nhhât ôh.”

²¹ Brah Yêhôva ma phung tahan, Brah Ndu phung Israel, lah: “Ntop hom ndơ ƀư brah gŭch ma lĕ mpa ƀư brah khân may jêh ri sa hom nglay puăch mpa ƀư brah!

²² Yorlah tâm nar Gâp njŭn leo chô yau khân may du luh bơh Êjipt, Gâp mâu prot ngơi mâu lah ntrŭnh nau ntăm ăn khân păng ma ndơ ƀư brah gŭch jêh ri lĕ mpa ƀư brah.

²³ Ƀiălah aơ jêng nau ntăm Gâp hŏ mbơh ăn khân păng: ‘Iăt hom nau Gâp pôri Gâp mra ƀư Brah Ndu khân may jêh ri khân may mra ƀư phung ƀon lan Gâp. Nhuat tĭng hom lĕ trong Gâp nti, ma khân may, gay khân may geh nau ueh maak.’

²⁴ Ƀiălah khân păng mâu iăt, mâu srâng iăt; sŏl ko chuat hăn tĭng lĕ nau mĭn êng khân păng nơm, tĭng tâm nau nuih n'hâm djơh mhĭk jêh ri dăng ko păng nơm; khân păng plơ̆ sĭt pakơi mâu hăn ôh rlet panăp.

²⁵ Ntơm bơh nar phung chô yau khân may du luh tă bơh Êjipt kŏ tât abaơ, nar aơ găn nar ri, Gâp hŏ prơh hăn ƀaƀơ lĕ rngôch phung oh mon Gâp, phung nơm mbơh lor, tât ma khân păng.

²⁶ Ƀiălah khân păng mâu ŭch iăt Gâp, mâu ŭch lĕ srâng iăt, lơ hâu dăng bôk dăng ko, gŭ ngao mhĭk lơn ma phung chô yau khân păng.”

²⁷ “Pônây, may mra ngơi ma khân păng lĕ rngôch nau aơ, ƀiălah khân păng mâu mra iăt may ôh. May mra kuăl, ƀiălah khân păng mâu plơ̆ sĭt lah.

²⁸ May lah hom ma khân păng: ‘Aơ jêng ƀon lan mâu tông tĭng nau Yêhôva Brah Ndu khân păng, mâu dơn nau nkra nti. Nau nanê̆ ngăn hŏ rai lêk, hŏ du roh bơh trôm mbung khân păng jêh.

²⁹ Koh hom sŏk jêh ri klŭp lơi; Ntơm nau nsôr nter hom ta klơ yôk hil; Yorlah Brah Yêhôva hŏ dun jêh ri chalơi jêh rô̆ aơ, Jêng rô̆ srônh nuih Păng.’”

Rlŭng tâm nkhĭt

³⁰ Brah Yêhôva lah: “Phung kon ƀon lan Yuđa hŏ ƀư nau mhĭk tâm dâng măt Gâp. Khân păng dơm lĕ ndơ ƀơ̆ ƀơch tâm ngih dơi ntơ ma amoh Gâp, gay ƀư ăn păng ƀơ̆ ƀơch.

³¹ Khân păng hŏ ndâk lĕ ntŭk prêh klơ Tôphet tâm rlŭng Ben-Hinôm, gay su phung kon bu klâu kon bu ur păng tâm ŭnh; nây jêng nau Gâp mâu ntĭm nti ôh ăt mâu prot mĭn tât.”

³² Brah Yêhôva lah: “Yorlah pônây tâm lĕ nar tât, bu mâu mra rnha Tôphet mâu lah rlŭng Ben-Hinôm đŏng ôh, ntơ jêng ‘Rlŭng sreh nkhĭt’, yorlah bu mra tâp ta Tôphet, kŏ tât mâu hôm geh ntŭk tâp đŏng ôh.

³³ Săk jăn khĭt phung ƀon lan aơ mra ƀư mpa sa ăn phung sĭm trôk jêh ri mpô mpa bri klơ neh, jêh ri mâu geh bunuyh mprơh khân păng du.

³⁴ Aƀaơ, Gâp mra ƀư lĕ ƀon Yuđa jêh ri rŏ trong Yêrusalem rlu bâr troh răm maak, bâr bu klâu ntơm nsông ur jêh ri bâr bu ur nđăp ma sai, yorlah neh aơ mra jêng ntŭk rngol.”