Yêrêmi 6 - Nau Brah Ndu Ngơi 2023

Yêrusalem bu mra nchueng

¹ “Hơi phung kon sau Benjamin, Du hom bơh Yêrusalem gay geh nau đăp mpăn! Uh hom nŭng ta Têkôa, Yơr kơ nau mbên klơ ƀon Bet-Hakêrem; Yorlah nau ji tưp jêh ri nau ƀư rai toyh ngăn, Bơh mpeh pa lơ dôl văch tât.

² Gâp mra ƀư rai bu ur druh ƀon Siôn. Ueh reh, ngăn ngên.

³ Phung bunuyh chiăp mra leo tât ta nây ndrel ma phung biăp păng, Ƀư vâl bok ndâk rmlak jŭm ƀon, Nơm dăng dah mƀơk phung biăp sa gơ̆ ta ntŭk neh păng.”

⁴ “Ndrăp hom nau tâm lơh tâm rdâng đah ƀon; Aƀaơ, he mra rduh lơh nôk nar nklang bôk! Ƀiălah rêh ni ăn phung he, nar hŏ vet, Gui n'hâm bri mhaơ hŏ jong jêh!

⁵ Aƀaơ, he rduh lơh hom tâm dôl măng, Ƀư rai lĕ ngih hađăch păng!”

⁶ Yorlah Brah Yêhôva ma phung tahan lah: “Kăl hom tơm si Jêh ri bât pôih nchueng jŭm Yêrusalem! Aơ jêng ƀon bu mra tâm rmal; Yorlah ta nklang păng bêng âk nau bu tŭn jot.

⁷ Nâm bu ntu dak mâm ƀư prăp ăn dak nđik nâm pônây, Pôri ƀon nây ăt prăp nau mhĭk păng pônây lĕ. Lam ƀon knŏng tăng nau ƀai jêh ri ƀư rai; Tanăp măt Gâp knŏng saơ ji kuet jêh ri sôt rmanh.

⁸ Hơi Yêrusalem, iăt hom nau ntăm, Lah mâu Gâp mra dĭl chalơi may, Ƀư ăn may jêng rngot njăp, Neh may mâu hôm bunuyh gŭ.”

⁹ Brah Yêhôva ma phung tahan lah: “Khân păng mra mban lĕ rngôch ƀon lan hôm e klen phung Israel, Nâm bu du huê mban play krăk ƀâu. Yơr hom ti pĕ du tơ̆ đŏng, Nâm bu bunuyh pĕ krăk ƀâu mban play klen ta klơ n'gĭng.”

¹⁰ Mbu nơm gâp mra ngơi jêh ri mbơh ma mbu moh, Gay ma khân păng iăt gâp? Aơ, tôr khân păng ê hŏ kŏ ntâu, Yor ri mâu dơi tăng ôh. Aơ, khân păng mưch nau Brah Yêhôva, Mâu hâk răm du djê̆ lê̆ ôh.

¹¹ Yor nây, nuih n'hâm gâp prăp bêng ma nau ji nuih Brah Yêhôva, Gâp mâu dơi ât rklăk ôh. “Nkhŭt hom nau ji nuih nây ta klơ phung kon se ta trong sâng, Ta klơ phung ndăm dôl tâm rgum; Lĕ rngôch ur nđâp ma sai, Bu ranh jêh ri bunuyh âk năm bu mra nhŭp da dê.

¹² Ngih vâl, lŏ sre ndrel ma ur kon khân păng Mra jao tâm ti phung êng; Yorlah Gâp mra yơr ti Tâm rdâng đah ƀon lan ta neh nây,” Brah Yêhôva lah pônây.

¹³ “Yorlah ntơm bơh bunuyh dŭt jê̆ tât ma nơm toyh, Lĕ rngôch kơnh sa kao nau mâu di da dê; Ntơm bơh phung nơm mbơh lor tât kôranh ƀư brah, Gŭ rêh mƀruh ndơm da dê.

¹⁴ Khân păng ƀư bah sôt rmanh phung ƀon lan Gâp ma nau ƀlơr, Jêh nây lah: ‘Đăp mpăn! Đăp mpăn!’ Mâu geh nau đăp mpăn ôh.

¹⁵ Khân păng ƀư nau ƀơ̆ ƀơch, di nau bêk prêng, Ƀiălah khân păng mâu saơ bêk prêng ôh, Ăt mâu gĭt mâm nau bêk prêng. Yor nây, khân păng mra chêh prah ta nklang phung chêh prah; Tât nar Gâp phat dôih, khân păng mra cha lôt,” Brah Yêhôva lah pônây.

¹⁶ Brah Yêhôva lah: “Dâk hom kêng lĕ trong hăn jêh ri kâp uănh, Joi ôp lĕ trong ngai kăl e, Uănh ntŭk jêng trong di lĕ trong sŏng jêh ri hăn trong nây, Joi hom ntŭk rlu ăn ma huêng may. Ƀiălah khân păng plơ̆ lah: ‘Hên mâu ŭch hăn trong nây.’

¹⁷ Gâp hŏ ndâk bunuyh gak njrăng khân may; ‘Rkêng hom tôr iăt bâr nŭng!’ Ƀiălah khân păng lah: ‘Phung hên mâu rkêng tôr iăt ôh!’

¹⁸ Yor pônây, hơi lĕ bri dak, iăt hom; Hơi lĕ rngôch phung tâm rƀŭn, gĭt hom lĕ nau mra tât ăn ma khân păng.

¹⁹ Hơi neh, iăt hom! Gâp mra djôt nau mhĭk tât ma phung ƀon lan aơ, Nây jêng nau play bơh lĕ mĭn nchră khân păng, Yorlah khân păng mâu rkêng tôr iăt tât ma nau Gâp, Jêh ri dun nau vay Gâp.

²⁰ Moh nau Gâp ŭch ntăk si ƀâu kah tât bơh Sêba, Mâu lah n'hôl calamôs tât bơh bri ngai ngăn? Ndơ ƀư brah gŭch phung khân may mâu ueh nuih n'hâm Gâp, Lĕ mpa ƀư brah khân may ăt mâu ƀư maak ma Gâp lĕ.”

²¹ Yor ri, Brah Yêhôva lah: “Aơ, Gâp mra dơm ndơ king tanăp phung ƀon lan nây Ƀư ăn khân păng chêh prah; Lĕ rngôch mê̆ mbơ̆ jêh ri phung kon, Phung chiau meng jêh ri mĭt jiăng khĭt roh da dê.”

²² Brah Yêhôva lah: “Aơ, du phung ƀon lan tât bơh mpeh pa lơ; Du bri dak toyh ktang hao ntoh tă bơh nglĕ dŭt rplay neh.

²³ Khân păng djôt nâp na jêh ri tak, Janh hâng mhĭk ƀai ngăn, mâu geh nuih n'hâm yô̆ nđach ôh. Nteh khân păng nter huy nâm bu dak mƀŭt lŭng nter; Khân păng ncho klơ seh, Âk bunuyh nâm bu du huê, Ndrăp rduh lơh may, Hơi kon bu ur Siôn!”

²⁴ Tăng lư nau nây, Ti jâng hên hươi ra ai ngăn, Nau klach krit rêt nâp phung hên, Ƀư ma hên ji kruăn rêt nâm bu ur ji deh.

²⁵ Lơi ta luh padih mir ôh, Lơi hăn nsong rŏ trong, Yorlah phung rlăng cheng đao, Srih nau klach krit lam ntŭk.

²⁶ Hơi phung kon bu ur ƀon lan Gâp, put hom bok ƀau tâm săk, Jêh ri rlă tâm ndruyh ŭnh buh. Nhĭm vơl hom nâm bu roh kon bu klâu kon dul, Vơl nhĭm hom rngot ji ngăn; Yorlah phung ƀư rai Mra tât ndal rduh ma he.

²⁷ “Gâp hŏ ndâk may ƀư bunuyh ƀư rlong jêh ri pôih nâp ta nklang ƀon lan Gâp, Gay ma may dơi gĭt năl jêh ri sek ƀư rlong trong khân păng.

²⁸ Lĕ rngôch phung khân păng tâm rdâng da dê, Hăn ngơi nchơt ăp ntŭk. Pler nâm bu kông, dăng nâm bu loih, Khân păng knŏng gĭt ƀư rai.

²⁹ Nuh puh n'hâm dăng, Ndrak lêk hoch tâm ŭnh; Ƀiălah hŏ krĕt jêh krĕt tay ăt mâu khlay ôh, Yorlah phung mhĭk mâu hŏ bu mƀăr lơi.

³⁰ Khân păng bu mra ntơ jêng ‘prăk djah,’ Yorlah Brah Yêhôva hŏ ngluh jêh khân păng.”