Yêrêmi 52 - Nau Brah Ndu Ngơi 2023

Kô̆ nkoch ntop nau rêh jêng ma nau bu ƀư rai ƀon Yêrusalem ( II Phung Hađăch 24:18 – 25:7 )

¹ Y-Sêdêkia ntơm ƀư hađăch geh bar jât ma nguay năm jêh ri chiă uănh jât ma nguay năm ta ƀon Yêrusalem. Mê̆ hađăch amoh jêng H'Hamutal, kon bu ur Y-Yêrêmi, bunuyh ƀon Lipna.

² Hađăch ƀư nau mhĭk tanăp măt Brah Yêhôva nâm bu lĕ rngôch nau Y-Jêhôjakim hŏ ƀư jêh.

³ Yorlah nau Brah Yêhôva ji nuih ma lĕ nau mhĭk hŏ geh tât jêh ta ƀon Yêrusalem jêh ri n'gor Yuđa Păng mprơh khân păng du bơh tanăp măt Păng. Y-Sêdêkia hao tâm rdâng đah hađăch Babilôn.

⁴ Ta nar jât khay jât tâm năm rơh sĭn rnôk rô̆ hađăch Sêdêkia, Y-Nêbukatnetsar, hađăch Babilôn, djôt leo lĕ rngôch phung tahan hăn tâm lơh ƀon Yêrusalem. Khân păng ndâk ntŭk tahan gŭ nchueng jêh ri ƀư mpêr tâm lơh văr jŭm ƀon.

⁵ Bu nchueng kŏ tât năm rơh jât ma nguay hađăch Sêdêkia chiă uănh.

⁶ Ta nar sĭn khay puăn, nau ji ngot hâu ngăn tâm ƀon kŏ tât mâu hôm geh ndơ sông sa đŏng ôh.

⁷ Mpêr ƀon lĕ bu kuar trôm. Dôl măng, nđâp lah phung Kaldê nchueng jŭm, lĕ rngôch phung tahan nchuăt du da dê bơh ƀon ma mpông pêr vah vang bar đah mpêr, dăch n'gar kao hađăch. Khân păng hăn tĭng trong rlet mpeh ma Arabah.

⁸ Ƀiălah phung tahan Kaldê hăn tĭng jêh ri tĭng ban nhŭp hađăch Sêdêkia tâm neh lâng Yêrikô; phung tahan chalơi hađăch, nchuăt du pru.

⁹ Khân păng nhŭp hađăch jêh ri njŭn tât ma hađăch Babilôn, ta ƀon Ribla, tâm bri Hamat. Ta nây, hađăch Babilôn phat dôih hađăch Sêdêkia.

¹⁰ Hađăch Babilôn nkhĭt phung kon bu klâu Y-Sêdêkia tanăp măt păng; hađăch đă nkhĭt đŏng lĕ rngôch phung kôranh Yuđa ta ƀon Ribla.

¹¹ Hađăch nây đă rloch lơi măt Y-Sêdêkia, nkông ma rse rvăk kông. Hađăch Babilôn njŭn leo Y-Sêdêkia ma bri Babilôn, krŭng tâm ndrung kŏ tât nar khĭt.

¹² Tâm nar jât khay prăm, năm rơh jât ma sĭn Y-Nêbukatnetsar chiă uănh, hađăch Babilôn, Y-Nêbusaradan kôranh phung tahan gak, gŭ êp hađăch Babilôn, lăp tâm ƀon Yêrusalem.

¹³ Păng ntrŭnh su rai ngih brah Brah Yêhôva, ngih hađăch jêh ri lĕ rngôch ngih tâm ƀon Yêrusalem, jêh ri su lĕ rngôch ngih toyh phung ndrŏng.

¹⁴ Lĕ rngôch phung tahan Kaldê hăn ndrel ma kôranh phung tahan gak, ƀư rlâm lĕ rngôch mpêr ƀon jŭm Yêrusalem.

¹⁵ Jêh nĕ, Y-Nêbusaradan kôranh phung tahan gak ntrŭnh nau jêng bu nă ƀă phung o ach lơn tâm phung ƀon lan, phung hôm klen gŭ tâm ƀon Yêrusalem, phung hŏ gŭ jêh mpeh ma hađăch Babilôn jêh ri phung blau rhăk hôm klen.

¹⁶ Y-Nêbusaradan kôranh phung tahan gak knŏng ăn phung o ach ngăn hôm gŭ tâm n'gor bri gay tăm đang krăk ƀâu jêh ri ƀư mir.

¹⁷ Phung tahan Kaldê dong nchah lĕ meh n'gâng kông tâm ngih Brah Yêhôva, nđâp ma jâng ndơl jêh ri drŏng dak tâm ngih Brah Yêhôva jêh ri sŏk kông nây djôt leo ma bri Babilôn.

¹⁸ Khân păng sŏk glah ƀŭng, pel, katrei nkăp brai ŭnh kađen, grưng, ngan jam nhhơr ndơ ƀâu kah, jêh ri lĕ rngôch ndơ dŏng ma kông bu dŏng tâm kan yơk mbah.

¹⁹ Kôranh phung tahan gak sŏk đŏng lĕ ƀhiau kachok, khăl gŭch ƀâu kah, ngan grưng, glah, jâng kađen, ngan jam nhhơr ndơ ƀâu kah, jêh ri khăl. Moh ndơ bu ƀư ma mah sŏk mah, moh ndơ bu ƀư prăk sŏk prăk.

²⁰ Bi ma bar mlâm meh n'gâng, du drŏng dak jêh ri jât ma bar mlâm rup ndrôk ma kông ƀư jâng tâm dâng drŏng dak, ndơ hađăch Salômôn ƀư jêh ma ngih Brah Yêhôva; kông ma lĕ rngôch ndơ nây bu mâu dơi nhueh ôh.

²¹ Tâm ăp meh n'gâng prêh pham met, rvang prăm hăt pe, geh trôm sung ta nklang jêh ri nau mbâl tâm puăn nglau ti.

²² Ta klơ chiông meh geh chiông ma kông, prêh bar hăt bar, văr jŭm chiông meh n'gâng geh ndơ tanh sră jal jêh ri rup play pom gra nat ma kông. Meh n'gâng ri ăt geh ndơ tanh sră jal jêh ri play pom gra nat tâm ban ma meh n'gâng aơ.

²³ Puăn njônh geh sĭn jât ma prao play pom gra nat; lĕ rngôch jêng du rhiăng play pom gra nat văr jŭm ndơ tanh sră jal ta n'gâng.

²⁴ Kôranh phung tahan gak nhŭp Y-Sêraya, kôranh ƀư brah toyh, jêh ri Y-Sêphania, groi kôranh ƀư brah, ndrel ma pe bunuyh mât chiă mpông ngih brah.

²⁵ Tâm ƀon, păng nhŭp du huê kôranh bu char chiă uănh tahan, pơh bunuyh kâp kơl hađăch geh măt tâm ƀon, du huê kôranh nchih samƀŭt ma kôranh phung tahan mât uănh ma kan săch phung tahan tâm n'gor; nđâp ma prao jât bunuyh ƀon lan tâm n'gor geh măt tâm ƀon.

²⁶ Y-Nêbusaradan kôranh phung tahan gak hađăch nhŭp jêh ri njŭn leo phung nây văch tât ma hađăch Babilôn ta ƀon Ribla.

²⁷ Hađăch Babilôn dong jêh ri nkhĭt khân păng ta ƀon Ribla, tâm n'gor Hamat. Nây jêng phung Yuđa bu veng leo ƀư bu nă tâm n'gor bri êng.

²⁸ Aơ jêng rnoh phung ƀon lan Y-Nêbukatnetsar njŭn jêng bu nă: Tâm năm rơh pơh, geh pe rbăn bar jât ma pe phung Yuđa.

²⁹ Tâm năm rơh jât ma pham rnôk Y-Nêbukatnetsar chiă uănh, Geh pham rhiăng pe jât ma bar bunuyh tă bơh Yêrusalem.

³⁰ Tâm năm rơh bar jât ma pe Y-Nêbukatnetsar chiă uănh, Y-Nêbusaradan kôranh tahan gak njrăng hađăch njŭn leo jêng bu nă pơh rhiăng puăn jât ma prăm bunuyh phung Yuđa. Rnoh lĕ rngôch jêng puăn rbăn prao rhiăng bunuyh.

Y-Jêhôjakin geh nau bu mƀơk jêng kon me

³¹ Tâm năm rơh pe jât ma pơh rnôk Y-Jêhôjakin hađăch Yuđa jêng bu nă, nây jêng Y-Êvil-Mêrôdak, hađăch Babilôn ntơm chiă uănh, ta nar bar jât ma prăm tâm khay jât ma bar, hađăch aơ yô̆ an ma Y-Jêhôjakin, hađăch Yuđa, jêh ri luh bơh ndrung bu nă.

³² Hađăch ngơi ueh ndrel ma hađăch Y-Jêhôjachin jêh ri ăn sưng hađăch păng klơ lơn ma phung hađăch êng ndrel ma rnoh nau rêh păng tâm ƀon Babilôn.

³³ Pônây, Y-Jêhôjakin doh lơi ao ndrung, ăp nar sông sa ndrel ma hađăch du bông nau rêh.

³⁴ Tâm ăp nar, hađăch Babilôn ƀơk pă ƀaƀơ kô̆ ndơ sông sa ma hađăch Y-Jêhôjachin, tâm lĕ nar păng gŭ rêh kŏ tât păng khĭt.