Yêrêmi 51 - Nau Brah Ndu Ngơi 2023

Nau mbơh lor tay ma bri Babilôn

¹ Brah Yêhôva lah: “Aơ Gâp mra ƀư du sial ƀư rai, Hao ƀư rai đah Babilôn, Jêh ri phung ƀon lan gŭ tâm bri Kaldê.

² Gâp mra prơh hăn phung bu năch tât ƀon Babilôn Gŭm nsiăng jêh ri ƀư roh lơi bri dak păng; Yorlah tâm nar mhĭk tât, Khân păng mra rduh lơh ma Babilôn tă bơh puăn njônh.

³ Lơi ăn bunuyh pănh na năn van na ôh, Mâu lĕ ăn păng năn nsoh ao loih. Lơi ta djân ôh phung ndăm Babilôn, Nkhĭt hom lĕ rngôch phung tahan păng.

⁴ Bu ntâp khĭt khân păng tâm bri phung Kaldê, Phung sôt rmanh âk ngăn ta trong toyh.

⁵ Phung Israel ndrel ma phung Yuđa bu mâu dun chalơi ôh, Ma yor Brah Ndu jêng Brah Yêhôva ma phung tahan khân păng; Nđâp lah bri dak khân păng bêng ma nau tih mhĭk Yorlah tâm rdâng đah Nơm Kloh Ueh Israel.

⁶ Du hom tă bơh Babilôn, Ăn ăp nơm nchuăt du tâm rklaih nau rêh păng! Lơi ta rai yot ôh yor ma nau tih păng, Yorlah aơ jêng rnôk Yêhôva plơng bôk; Păng mra plơng bôk tâm di jêh ăn ma păng.

⁷ Ƀon Babilôn jêng du mlâm kachok mah tâm ti Brah Yêhôva, Ƀư ăn lĕ rngôch bri neh nhŭl ndrănh; Lĕ rngôch bri dak hŏ nhêt jêh ndrănh păng. Yor nây yơh dĭng jêng brŭt rluk.

⁸ Ƀât lât, ƀon Babilôn lĕ tŭp jêh ri nchah rai jêh, Nhĭm vơl hom ma păng! Sŏk hom dak si ƀâu kah mhĭng ta sôt rmanh păng; Gĭt lah păng dơi bah?

⁹ ‘He sâl ƀư gay ma ƀư bah ƀon Babilôn Ƀiălah păng mâu dơi bah ôh. Chalơi hom păng, Ăp nơm hăn sĭt hom rlet ma bri păng nơm; Yorlah nau tâm rmal ma păng hao tât klơ trôk, Hao tât ma ndâr tŭk.’

¹⁰ ‘Brah Yêhôva koh dŏng ăn ma he. Văch hom, ăn he mbơh nkoch tâm ƀon Siôn Nau kan Yêhôva Brah Ndu he.’

¹¹ Lanh hom hăr ăn mplônh, Kuăn khêl ăn nâp! Brah Yêhôva hŏ nsônh jêh nuih n'hâm phung hađăch bri Mêdơ, yorlah nau Păng ŭch ƀư jêng nau ƀư rai lơi ƀon Babilôn. Aơ jêng nau Brah Yêhôva plơng bôk, Păng plơng bôk ma ngih brah Păng.

¹² Yơr hom kơ nau mbên, Hăn tâm lơh lĕ mpêr ƀon Babilôn! Ntop hom phung gak, Ndâk pôih gak, tâm pă phung tahan kâp lơh! Yorlah Brah Yêhôva hŏ nkra jêh nau Păng ŭch ƀư Nau Păng hŏ lah ma phung ƀon lan gŭ tâm bri Babilôn.

¹³ Hơi ƀon toyh gŭ kêng n'hong dak krong toyh, Geh âk ngih bun drăp ndơ khlay, Nau dăch dŭt may hŏ tât jêh, Mông ăn ma may mâu hôm geh ôh!

¹⁴ Brah Yêhôva ma phung tahan ton săk êng ma Păng nơm: N'hêl nanê̆ Gâp mra ƀư ma phung tahan âk nâm bu krah ndrach tâm lơh đah may; Khân păng troh nter nau dơi tâm lơh.

¹⁵ Păng yơh jêng Nơm hŏ rhăk njêng jêh neh ntu ma nau brah Păng, Ndâk njêng neh ntu bơh nau blau mĭn Păng, Sŏk ma nau gĭt rbăng Lăk huy lĕ ndâr trôk.

¹⁶ Tơlah Păng ngơi, lĕ tu dak ta klơ lĕ ndâr trôk nteh n'găr, Păng ƀư ăn n'hôl dak hao bơh ntơm nglĕ dŭt rplay neh. Njêng lơp nglaih tĭng dak mih, Sial luh du tă bơh tâm jay prăp drăp ndơ khlay Păng.

¹⁷ Ăp nơm jêng rluk da dê, mâu gĭt rbăng ôh; Phung chiăr prăk prêng da dê ma rup tŏ păng nơm; Yorlah rup brah jêng mƀruh, Mâu geh n'hâm nsôr ôh tâm trôm nây.

¹⁸ Ndơ nây knŏng jêng dơm dam, jêng ndơ ndơm dơm; Tât nar tâm rmal, khân păng mra rai yot.

¹⁹ Ƀiălah drăp ndơn Y-Yakôb mâu nâm bu pônây ôh, Yorlah Păng yơh jêng Nơm hŏ rhăk njêng jêh lĕ rngôch ndô ndơ, Israel jêng mpôl băl drăp ndơn Păng; Amoh Păng jêng Brah Yêhôva ma phung tahan.

²⁰ May jêng me nôp, jêng ndơ tâm lơh ăn ma Gâp; Gâp mra dŏng may dong nchah lĕ rngôch phung mpôl bunuyh Jêh ri ƀư rai lĕ rngôch ƀon bri hađăch.

²¹ Gâp mra dŏng may ƀư rai seh jêh ri bunuyh ncho seh; Gâp mra dŏng may ƀư rai ndeh jêh ri nơm ncho ndeh.

²² Gâp mra dŏng may ƀư rai bu klâu jêh bu ur, Bunuyh ranh jêh ri bunuyh mom. Gâp mra dŏng may ƀư rai phung bu klâu ndăm jêh ri bu ur druh.

²³ Gâp mra dŏng may ƀư rai rmăk biăp jêh ri biăp păng, Nơm ƀư mir jêh ri ndrôk chuar mir. Gâp mra dŏng may ƀư rai phung kôranh toyh jêh ri phung kôranh chiă uănh.”

Mrô nal ma bri Babilôn

²⁴ “Ƀiălah tra năp khân may, Gâp mra mplơ̆ sĭt ma Babilôn jêh ri phung gŭ tâm bri Kaldê ma ăp ntil nau mhĭk khân păng hŏ ƀư jêh tâm ƀon Siôn.” Brah Yêhôva lah pônây.

²⁵ Brah Yêhôva lah: “Aơ, ơ yôk ƀư rai, Gâp tâm rdâng đah may, Nơm ƀư rai lĕ neh ntu! Gâp mra yơr ti ƀư mhĭk ma may, Mra rlă may tă bơh lĕ pŭng yôk, Ƀư ăn may jêng yôk ŭnh sa jêh.

²⁶ Bu mâu mra dơi sŏk tă bơh may du rplay lŭ dơm ta njônh ngih Mâu lah rplay lŭ mbon, Ƀiălah may mra jêng ntŭk rngot njăp ƀaƀơ n'ho ro.” Brah Yêhôva lah pônây.

²⁷ “N'hao hom kơ tâm n'gor bri; Uh nŭng ta nklang lĕ bri dak; Ndrăp rơm hom phung ƀon lan gay tâm lơh đah păng! Kuăl rgum hom phung bri hađăch: Ararat, Mini, Askênas văch tât lơh păng! Dơm hom du huê kôranh tahan toyh, Djôt leo seh ndơ tâm lơh rduh tâm lơh janh ktang âk nâm bu krah ndrach!

²⁸ Rơm ndrăp hom lĕ bri dak hăn tâm lơh đah păng, Nây jêng phung hađăch bri Mêdơ, ndrel ma phung kôranh toyh, phung kôranh păng chiă uănh, Jêh ri lĕ rngôch bri khân păng chiă uănh!

²⁹ Neh n'gơ n'găr jêh ri rngot rvê Yorlah nau Yêhôva nkra ŭch ƀư ma ƀon Babilôn hŏ tât ngăn jêh, Gay ƀư ma bri Babilôn jêng rngol, Mâu geh bunuyh gŭ ta nây ôh.

³⁰ Phung tahan bri Babilôn rlu tâm lơh, Plơ̆ rŭch tâm lĕ ntŭk pôih nâp; Khân păng hŏ huăr ngăn jêh, Jêng tâm ban ma bu ur. Ngih vâl tâm ƀon toyh bu su ma ŭnh, Mâng rnăng mpông ƀon hŏ nkê̆ch pă jêh.

³¹ Tahan gak rmlak aơ tâm mâp ma rmlak ri, Lĕ nơm ntuh bâr aơ tât ma nơm ntuh bâr êng, Mbơh nau ăn ma hađăch Babilôn pô aơ Ƀon hađăch nây rai lĕ rngôch jêh.

³² Lĕ mbong dak lĕ bu sŏk da dê jêh, Lĕ tŭk djut rpho treng lĕ ŭnh sa jêh, Phung tahan klach nsâr ngăn.”

³³ Ma yorlah Brah Yêhôva ma phung tahan, Brah Ndu Israel lah: “Kon bu ur ƀon Babilôn tâm ban ma ntŭk mprah ba Ta yan mprah ba; Mâu hôm jŏ đŏng ôh Yan rek păng mra tât.”

³⁴ “Y-Nêbukatnetsar, hađăch Babilôn, hŏ rvăn jêh hên, Ƀư nchah rai hên; Hađăch nây ƀư ăn ma phung hên jêng du mlâm yăng nsoih, Rvăn hên nâm bu mpa bri toyh rvăn ndơ sa, Păng sŏk ndơ sa kah hên mbêng bêng ndŭl păng, Jêh ri mprơh hên hăn du.”

³⁵ Phung gŭ tâm ƀon Siôn mra lah: “Ăn nau ƀư ƀai hŏ ƀư jêh ăn ma hên jêh ri ma kon sau hên tât ma ƀon Babilôn!” Yêrusalem mra lah: “Ăn mham hên hoch ta klơ ƀon lan phung Kaldê!”

³⁶ Yor nây, Brah Yêhôva lah: “Aơ, Gâp mra koh dŏng may, Plơng bôk ăn ma may. Gâp mra ƀư suăt lơi dak mƀŭt păng Jêh ri tu dak păng suăt kro;

³⁷ Ƀon Babilôn mra jêng du mbŭch ndơ djơh rai, Jêng trôm so bri, Jêng ntŭk ƀơ̆ ƀơch jêh ri ndơ gơm ma lĕ rngôch bunuyh, Mâu geh bunuyh gŭ ôh.

³⁸ Khân păng ngrông nâm bu yau mŭr rah, Rđuh nâm bu yau mŭr kon.

³⁹ Dôl khân păng duh nuih janh ngăn, Gâp mra nkra nau sông sa ăn ma khân păng nhŭl hơm, ăn ma khân păng troh gơm, Jêh ri n'ho lêt bê̆ch, Mâu hôm kah rngăl đŏng ôh.” Brah Yêhôva lah pônây.

⁴⁰ “Gâp mra njŭn khân păng tât ma ntŭk bu sreh nkhĭt, Nâm bu kon biăp, biăp nkuăng jêh ri be nkuăng.

⁴¹ Ơ, Sêsăk hŏ rai jêh, Ƀon ma lĕ rngôch neh ntu tâm rnê bu hŏ sŏk jêh! Ơ, ta nklang lĕ rngôch ntil mpôl bunuyh, Babilôn hŏ jêng rngol jêh phit ndrŏt!

⁴² Dak Mƀŭt lip bŭk jêh bri Babilôn, Lĕ nau rbuh dak ji nuih nkŭm ngâm păng.

⁴³ Lĕ ƀon păng hŏ jêng nau klach krit ngăn, Jêng du n'gor bri sơh, bri rdah, N'gor bri mâu geh bunuyh gŭ ôh, Mâu geh du huê bunuyh prot rgăn.

⁴⁴ Gâp mra tâm rmal brah Bel tâm bri Babilôn, Sŏk ntơt moh ndơ păng hŏ rvăn jêh luh bơh trôm mbung păng. Phung mpôl băl bunuyh mâu mra hăn sĭt ta nây đŏng ôh. Mpêr ƀon Babilôn lĕ rlâm jêh.

⁴⁵ Ơ phung ƀon lan Gâp, luh du hom tă bơh păng, Ăp nơm ăn tâm rklaih êng păng nơm Klaih tă bơh nau Brah Yêhôva duh nuih!

⁴⁶ Khân may lơi ta rdja nuih, lơi ta klach ôh Tanăp nau mbơh tâm bri dak, Yorlah tâm năm aơ geh du nau mbơh tât, Jêh nây tâm năm pakơi geh nau mbơh êng; Nau ktang lam tâm n'gor, Nau dăng ktang aơ tât ma nau dăng êng.

⁴⁷ Yor ri, aơ, nar mra tât, Gâp mra tâm rmal lĕ rup brah ƀon Babilôn; Lĕ rngôch bri păng geh nau bêk prêng, Bunuyh bu nkhĭt mra chôt khĭt ta nklang ƀon.

⁴⁸ Nôk nây, trôk, neh jêh ri ăp ntil ndơ tâm nây Geh bâr troh maak ma Babilôn Yorlah phung ƀư rai tă bơh mpeh pa lơ Văch tât ƀư rai păng.” Brah Yêhôva lah pônây.

⁴⁹ Ndah âk bunuyh bu ƀư chôt khĭt yor ma bri Babilôn; Abaơ, Babilôn mra chôt khĭt yor hŏ nkhĭt âk bunuyh phung Israel.

⁵⁰ Phung khân may jêng phung hŏ klaih jêh bơh mpiăt đao, Hăn hom, lơi ta nsrŭng ôh! Tă bơh bri ngai, kah gĭt hom ma Brah Yêhôva Jêh ri klâng rvê hom ma Yêrusalem!

⁵¹ Hên bêk prêng yorlah tăng nau bu nduyh; Nau prêng nkŭm ta muh măt hên Yorlah phung bu năch hŏ lăp jêh Tâm ntŭk kloh ueh ngih Brah Yêhôva.

⁵² Yor nây, Brah Yêhôva lah: “Aơ nar mra tât, Gâp mra phat dôih lĕ rup brah Babilôn Lam tâm bri păng, Đơ phung sôt rmanh mra rđêng nđor.

⁵³ Nđâp tơlah ƀon Babilôn mra hao tât ta trôk, Geh ndâk pôih nâp ta klơ ntŭk prêh kđôi, Gâp ăt prơh phung tât ƀư rai Tâm lơh đah păng.” Brah Yêhôva lah pônây.

⁵⁴ “Iăt hom nau vah vơl tă bơh Babilôn, Nteh nau ƀư rai dŭt krit kir bơh bri phung Kaldê!

⁵⁵ Yorlah Brah Yêhôva dôl ƀư rai ma Babilôn, Ƀư rklăk bâr păng drơu drơu. Lĕ rbuh dak phung rlăng văch hao nâm bu dak rlâm kơh, Nteh nhhiăng nter huy ngăn.

⁵⁶ Yorlah nơm ƀư rai hŏ văch tât jêh Tâm lơh đah Babilôn. Phung ktang păng bu nhŭp da dê, Na khân păng pă jêh; Yorlah Yêhôva jêng Brah Ndu nkhôm tâm rmal, N'hêl nanê̆ Păng mra plơng bôk ma nau di.

⁵⁷ Hađăch, amoh Păng jêng Brah Yêhôva ma phung tahan lah: Gâp mra ƀư ma phung kôranh, phung blau mĭn, Phung kôranh toyh, phung kôranh chiă uănh, jêh ri phung tahan ktang păng nhŭl ndrănh, Khân păng mra lêt bê̆ch mro, Mâu hôm kah rngăl ôh.”

⁵⁸ Brah Yêhôva ma phung tahan lah: “Mpêr ƀon nâp ƀon Babilôn Bu mra ƀư lâng, Mpông ƀon prêh păng Mra ŭnh sa. Nây jêng, phung ƀon lan hŏt r'ah mâu geh du ntil ndơ, Lĕ rngôch bri dak pah kan ăn ma ŭnh jêh ri hŏt rgănh da dê.”

Y-Yêrêmi ntĭnh nkah ma Y-Sêraya

⁵⁹ Aơ jêng nau ngơi nơm mbơh lor Y-Yêrêmi ntĭnh ma Y-Sêraya, kon bu klâu Y-Nêria, sau Y-Mahseya, lah păng hăn tât bri Babilôn ndrel ma Y-Sêdêkia, hađăch bri Yuđa, tâm năm rơh puăn păng chiă uănh. Rnôk nây Y-Sêraya jêng kôranh toyh.

⁶⁰ Y-Yêrêmi nchih lĕ rngôch nau mhĭk tât tâm du ndrom samƀŭt. Lĕ rngôch nau ngơi aơ nchih ma bri Babilôn.

⁶¹ Y-Yêrêmi lah ma Y-Sêraya: “Tơlah may hŏ tât jêh ma bri Babilôn, may kah gĭt răk ăn huy lĕ rngôch nau ngơi aơ,

⁶² Jêh ri lah: ‘Ơ Brah Yêhôva, May hŏ lah jêh May mra ƀư rai ƀon aơ, ntơm bơh kon bunuyh tât ma mpô mpa mâu dơi rêh da dê ôh, jêh ri ntŭk aơ mra jêng rngol ƀaƀơ n'ho ro.’

⁶³ Lôch jêh răk ndrom samƀŭt aơ pôri may kât samƀŭt đah du glo lŭ jêh ri klŭp tâm dak krong Ơphrat,

⁶⁴ jêh nây lah: ‘Ƀon Babilôn mra ngâm tâm ban pônây jêh ri mâu mra dơi ntoh đŏng ôh, yorlah nau mhĭk Gâp ƀư mra tât ma păng. Khân păng mra cha lôt.’” Nau ngơi Y-Yêrêmi dŭt aơ.