Yêrêmi 5 - Nau Brah Ndu Ngơi 2023

Nau tih phung Yêrusalem

¹ “Hăn hom lam lĕ rŏ trong ƀon Yêrusalem, Ntreng uănh jêh ri nchih dơn! Tĭng joi hom lĕ ntŭk nhuang ƀon, Tơlah may dơi joi du huê bunuyh Ƀư nau sŏng srăng, joi ma nau nanê̆ ngăn, Pôri Gâp mra yô̆ an ma lĕ ƀon.

² Nđâp lah khân păng ngơi: ‘Nanê̆ nâm bu Brah Yêhôva gŭ rêh mro mrăng!’ Khân păng ăt ton mbruh!”

³ Mbah Brah Yêhôva, măt Păng mâu treng uănh nau nanê̆ ngăn hĕ? May dong khân păng, Ƀiălah khân păng mâu saơ rngot klâng, May ƀư rai khân păng, Ƀiălah khân păng mâu dơn nau nduyh nkra. Khân păng ƀư ăn muh măt nơm dăng lơn ma lŭ, Mâu ŭch plơ̆ sĭt.

⁴ Bi gâp, gâp lah: “Aơ jêng knŏng phung o ach, rluk mâl, Yorlah khân păng mâu gĭt trong Brah Yêhôva, Nau Brah Ndu lah păng.

⁵ Gâp mra tât mâp phung geh nau dơi Jêh ri ngơi đah khân păng, Yorlah khân păng gĭt rah vah trong Brah Yêhôva, Nau Brah Ndu păng lah.” Ƀiălah khân păng nơm hŏ nsum ndrel nsum ndrel nkê̆ch mâng mbăk, Tăch rse!

⁶ Yor nây, yau mŭr tâm bri mra nkhĭt khân păng, So bri bơh bri rdah ƀư rai khân păng. Yau brăch mra rmiăt kêng padih ƀon khân păng, Mbu nơm luh bơh ƀon mra hêk sa! Yorlah nau tih toyh khân păng âk ngăn, Nau tâm rdâng khân păng mâu dơi kơp.

⁷ “Mâm ƀư Gâp dơi yô̆ an ma may? Lĕ phung kon bu klâu may hŏ chalơi Gâp, Tâm amoh lĕ brah mâu di jêng brah ton ôh. Gâp hŏ mât khân păng hơm mpay, Khân păng ăt ƀư tih văng tĭr, Rgum mbŭch tâm ngih bu ur văng tir.

⁸ Khân păng nâm bu phung seh mât lay tĭng gar me, Ăp nơm tĭng groi pakơi ur phung chiau meng ngơi huêt huy.

⁹ Gâp mâu mra tâm rmal hĕ khân păng yor ma nau tih nây lĕ? Du phung ndŭl mpôl pônây Ah Gâp mâu plơng lĕ?” Brah Yêhôva lah pônây.

¹⁰ “Hăn hao hom klơ mbor krăk ƀâu jêh ri ƀư rai lơi, Ƀiălah lơi ta ƀư rai lĕ ôh; Koh mƀăr hom lĕ n'gĭng păng, Yorlah mâu jêng ndơ Brah Yêhôva ôh.

¹¹ Yorlah lĕ ngih phung Israel jêh ri Yuđa Hŏ mbơh ngơi tâm rdâng đah Gâp da dê.” Brah Yêhôva lah pônây.

¹² Khân păng hŏ dun mƀăr lơi Brah Yêhôva, Jêh ri lah: “Păng mâu ƀư ôh! Mâu geh nau rêh ni jŭr ta klơ phung he, Ăt mâu geh tak đao, ji ngot ji hir ôh.

¹³ Lĕ phung mbơh lor knŏng nâm bu sail khôm, Nau Kôranh Brah mâu gŭ tâm khân păng ôh; Moh nau khân păng ngơi mra tât ăn ma khân păng dơm.”

¹⁴ Yor nây, Yêhôva Brah Ndu ma phung tahan lah: “Yorlah khân may hŏ ngơi lĕ nau nây, Pô aơ, Gâp mra ƀư nau ngơi Gâp nâm bu ŭnh tâm mbung may, Ƀon lan aơ mra nâm bu long, jêh ri ŭnh nây mra sa rvăn khân păng.”

¹⁵ Brah Yêhôva lah: “Hơi ngih phung Israel, Gâp mra djôt du ndŭl mpôl ƀon ngai tât tâm rdâng đah may. Nây jêng du ndŭl mpôl dăng ktang, Du ndŭl mpôl ơm jêh, Du ndŭl mpôl nau ngơi khân păng may mâu gĭt, Mâu gĭt rbăng moh nau khân păng ngơi.

¹⁶ Dĭng Kăm hăr khân păng nâm bu môch blang pơk lĕ; Lĕ rngôch khân păng jêng phung tahan ktang da dê.

¹⁷ Khân păng mra sa lĕ ba jêh ri ndơ sông sa may, Sa kon bu klâu, kon bu ur may; Sa lĕ phung biăp phung ndrôk may, Sa tơm krăk ƀâu jêh ri tơm rvi may. Sŏk đao ƀư rai lĕ ƀon nâp may, May vay rnơm nsing!”

¹⁸ Brah Yêhôva lah: “Nđâp lah pônây, tâm lĕ nar nây, Gâp mâu mra nkhĭt lĕ khân may ôh.

¹⁹ Dôl khân păng lah: ‘Mâm ƀư Yêhôva Brah Ndu he ntrŭnh lĕ nau nây ta klơ phung he?’ pôri may ngơi hom đah khân păng pô aơ: ‘Khân may hŏ chalơi Gâp jêh ri pah kan lĕ brah bu năch tâm neh may nơm mâm ƀư, lĕ khân may ăt mra pah kan ma phung ƀon lan bu năch tâm n'gor mâu di bri phung khân may tâm ban lĕ.’

²⁰ Mbơh hom nau aơ ma ngih Yakôb; Mpơl kan păng tâm bri Yuđa:

²¹ Ăn iăt hom, hơi phung ƀon lan rluk mâl, Geh măt mâu gĭt saơ, Geh tôr mâu gĭt tăng.”

²² Brah Yêhôva lah: “Lĕ phung khân may mâu klach yơk ma Gâp Mâu râm nsâr hĕ tanăp măt Gâp? Gâp jêng Nơm hŏ sŏk jêh choih ƀư n'har ma dak mƀŭt, Du ntŭk nal n'ho ro mâu dơi rlau ôh. Rbuh geh nkŏch ăt mâu dơi; Dak Mƀŭt geh ngrông nteh ăt mâu ler rlau ôh.

²³ Ƀiălah phung ƀon lan aơ dăng bôk jêh ri tâm rdâng, Khân păng tâm nkhah jêh ri hăn êng.

²⁴ Khân păng mâu lah ôh đah nuih n'hâm păng nơm: ‘He klach yơk hom ma Yêhôva Brah Ndu Nơm hŏ ăn dak mih di yan, Dak mih bôk yan jêh ri dak mih lôch yan, Jêh ri mray ăn phung he Lĕ nar pơh ma yan rek.’

²⁵ Nau djơh mhĭk phung khân may hŏ king lĕ nau aơ, Nau tih khân may ƀư khân may mâu dơi geh nau ueh uĭn.

²⁶ Yorlah nklang ƀon Gâp geh phung ƀai; Khân păng vơr rmiăt nâm bu bunuyh dăk sĭm, Sân dăk nhŭp bunuyh.

²⁷ Ngih vâl khân păng bêng ma nau mƀruh nchơt, Nâm bu ndrung bêng sĭm; Yor ri khân păng jêng ndrŏng geh jêh ri geh nau dơi,

²⁸ Khân păng toyh jêh ri lay. Nau tih mhĭk khân păng lĕ rlau keh; Khân păng mâu phat dôih ma nau di gay ma phung kon đơi dơi geh, Ăt mâu sâm kơl nau geh ma phung o ach.”

²⁹ Brah Yêhôva lah: “Gâp mâu mra tâm rmal hĕ khân păng ma nau tih nây? Du ndŭl mpôl nâm bu pônây Gâp mâu plơng bôk hĕ?

³⁰ Tâm neh aơ hŏ geh tât jêh Du nau klach nsâr jêh ri krit ngăn.

³¹ Lĕ phung nơm mbơh lor mƀruh, Jêh ri lĕ kôranh ƀư brah chiă uănh tĭng nau ƀĭt gai phung nơm mbơh lor nây, Pônây phung ƀon lan Gâp ŭch rŏng! Ƀiălah tât dăch dŭt, moh khân may mra ƀư?”