Yêrêmi 49 - Nau Brah Ndu Ngơi 2023

Nau mbơh lor ma phung Ammôn

¹ Brah Yêhôva lah ma phung kon Ammôn kơt aơ: “Di lĕ phung Israel mâu geh kon bu klâu, Mâu hôm geh bunuyh ndơn drăp hĕ? Pônây, mâm ƀư brah Malkôm pit in phung Gat ƀư drăp ndơn, Phung ƀon lan păng gŭ tâm ƀon toyh Gat?”

² Brah Yêhôva lah: “Yor nây, ri, nar mra tât, Gâp mra ƀư ăn bâr troh tâm lơh nteh huy Tâm rdâng đah ƀon Raba phung kon Ammôn, Păng mra jêng du gôl rngol; Ƀon jê̆ jŭm păng bu mra su ma ŭnh. Rnôk nây, phung Israel mra pit in tay drăp ndơn tă bơh phung hŏ pit jêh drăp ndơn khân păng.” Brah Yêhôva lah pônây.

³ “Ơ ƀon Hêsbôn, nhĭm nhhiăng hom yor ma ƀon Ahi hŏ rai jêh! Hơi kon bu ur Raba, nhĭm vơl hom. Nsoh hom ao ƀau sat, Nchuăt nsong dâng lơ tâm nklang pêr nhĭm nhhiăng! Yorlah brah Malkôm bu mra mprơh hăn ƀư bu nă Ndrel ma phung kôranh ƀư brah jêh ri phung kôranh păng luh du bơh n'gor.

⁴ Ơ kon bu ur mâu geh răp jăp ri, Mâm ƀư khân may ntưih ir ma ntŭk rlŭng, Lĕ rngôch ntŭk rlŭng geh jêng may? May rnơm nsing ma ngih bun drăp ndơ khlay may nơm, Yor nây lah pô aơ: ‘Mbu nơm nănh văch tâm lơh đah gâp?’”

⁵ Kôranh Brah jêng Brah Yêhôva ma phung tahan, lah: “Aơ, Gâp mra ƀư ăn nau klach krit Tă bơh ăp njônh tât ta may; Ăp nơm tâm khân may, bu mra mprơh jêh ri nchuăt rlet panăp, Mâu geh bunuyh mra rgum phung nchuăt du ôh.

⁶ Ƀiălah nar kăndơ̆, Gâp mra njŭn sĭt phung kon sau Ammôn tă bơh nau jêng dĭk nă,” Brah Yêhôva lah pônây.

Nau mbơh lor ma bri Êđôm

⁷ Brah Yêhôva ma phung tahan lah ma Êđôm kơt aơ: “Ah tâm ƀon Têman mâu hôm geh hĕ nau blau mĭn. Phung blau kơl nkah mâu hôm geh nau gĭt rbăng hĕ? Nau gĭt mĭn khân păng hŏ roh jêh mâu?

⁸ Hơi ƀon lan gŭ ta ƀon Dêdan, Ndôn kơi hom nchuăt du pôn, krap tâm ntu jru! Yorlah Gâp mra ƀư ăn ma păng nau mhĭk Êsau, Tâm rnôk Gâp tâm rmal ma păng.

⁹ Phung pĕ play krăk ƀâu tât ta đang krăk ƀâu may, Khân păng mâu hôm hĕ ăn klen djê̆ djănh ma bunuyh mban? Tơlah phung ntŭng tât klong măng Mâu di hĕ khăn păng knŏng ntŭng moh ndơ khăn păng ŭch dơm?

¹⁰ Ƀiălah Gâp hŏ doh lơi rhôk Y-Êsau, Mpơl lĕ jêh đơ ntŭk ndâp păng gŭ krap, Păng mâu dơi krap ôh. Kon sau, oh nâu, phung chiau meng păng bu ƀư rai da dê, Păng nơm mâu mra hôm đŏng ôh.

¹¹ Chalơi hom phung kon đơi may, Gâp nơm mra king n'gang nau rêh khân păng; Phung bu ur ndrô khân may nsing hom ma Gâp!”

¹² Brah Yêhôva lah: “Aơ, lĕ rngôch phung mâu khư nhêt kachok aơ ăt mra nhêt ro; di lĕ may dơi klaih đah nau tâm rmal? May mâu mra klaih ôh đah nau tâm rmal, ƀiălah mra nhêt kachok nây.”

¹³ Brah Yêhôva lah: “Gâp hŏ ton lah ma Gâp nơm ƀon Bôsra mra jêng ndơ ƀơ̆ ƀơch, ndơ bu ntêh rmot, ntŭk rngot njăp, jêh ri ntŭk bu rak rtăp. Jêh ri lĕ rngôch ƀon toyh păng mra jêng rngot njăp n'ho ro.”

¹⁴ Aơ jêng nau mhe mhan gâp tăng tă bơh Brah Yêhôva, Jêh ri bu prơh hăn du huê nơm mbơh tât ta nklang lĕ bri dak: “Tâm rgum hom jêh ri rduh hăn lơh păng! Du dâk hăn tâm lơh hom!”

¹⁵ “Yor nây, Gâp hŏ ƀư jêh ma may jêng jê̆-lê̆ ta nklang lĕ rngôch bri dak, Jêh ri ăp nơm mra mưch rmot.

¹⁶ Hơi nơm gŭ tâm trôm nđa lŭ, Dơi gŭ ta klơ n'gơn yôk prêh, May ƀư jêh nau krit toyh, Jêh ri nuih n'hâm sưr may, hŏ ndơm jêh may. Nđâp lah may ƀư rsuăn ta klơ ntŭk prêh nâm bu klang, Gâp mra ƀư may tŭp tă bơh ntŭk nây.” Brah Yêhôva lah pônây.

¹⁷ “Êđôm mra jêng du nau ƀơ̆, ăp nơm prot rgăn hih rhâl da dê jêh ri gơm mưch yorlah lĕ rngôch nau sôt rmanh păng.”

¹⁸ Brah Yêhôva lah: “Nâm bu nau ƀư rai ma ƀon Sôdôm, Gômôrơ jêh ri ƀon chiau meng, Êđôm mâu mra geh bunuyh gŭ rêh đŏng ôh, mâu geh lĕ du huê bunuyh mra hăn tât gŭ ta nây.

¹⁹ Nâm bu yau mŭr tă bơh lĕ bri krŏng dak krong Yurdan hăn tât ma ndrêch gơ̆ nse ƀaƀơ, Ƀât lât Gâp mra ƀư ăn ma phung Êđôm nchuăt du jêh ri njêng bunuyh Gâp hŏ săch jêh gay chiă uănh păng. Yorlah mbu moh nâm bu Gâp? Mbu nơm mra dơi ntrŭnh ăn ma Gâp? Mbu rmăk biăp nănh tâm rdâng đah Gâp?”

²⁰ Pônây iăt hom nau Brah Yêhôva ŭch ƀư hŏ nkra gay phat dôih ma Êđôm jêh ri nau Păng ŭch mĭn hŏ ndâk gay phat dôih ma phung gŭ tâm ƀon Têman: Nđâp ma mpô mpa jê̆ lê̆ tâm phung biăp bu mra têk leo jêh ri ntŭk ndrêch gơ̆ khân păng jêng rngot njăp klach ngăn.

²¹ Nau nteh rlâm tŭp khân păng ƀư neh ntu mra n'găr, nau nter khân păng tât ta Dak Mƀŭt Chăng.

²² Aơ, nơm rlăng mpăr prêh jêh ri mpăr nâm bu klang, lĭ nting năr nkŭm lam ta ƀon Bôsra. Tâm nar nây, nuih n'hâm phung tahan tâm bri Êđôm mra jêng nâm bu nuih n'hâm du huê bu ur veng deh.

Nau mbơh lor ma bri Damas

²³ Ma bri Damas: “Ƀon Hamat jêh ri ƀon Arpat geh nau prêng da dê, Yorlah khân păng tăng jêh nau mhĭk; Khân păng djoh nuih n'hâm, khân rung răng nâm bu rbuh dak lêng, Mâu ŭch gŭ rngân ôh.

²⁴ Ƀon Damas hŏ râm nsâr jêh, ndôn kơi nchuăt du, Nau klach krit chiă uănh păng; Păng rngot rvê nđêh nji, Nâm bu du huê bu ur veng deh.

²⁵ Mâm ƀư ƀon toyh nây geh nau lư n'găr, Ƀon toyh djôt ăn ma Gâp nau răm maak? Mâu geh nau rngol ôh?”

²⁶ “Yor ri, tâm nar nây, phung bu klâu ndăm păng mra cha lôt ta nkual ƀon, Lĕ rngôch phung tahan păng mra gŭ rklăk.” Brah Yêhôva ma phung tahan lah pônây.

²⁷ “Gâp mra su ŭnh ta mpêr ƀon Damas, Ŭnh mra sa ngih phung hađăch Y-Ben-Hadat.”

Nau mbơh lor ma phung Kêdar jêh ri Hasôr

²⁸ Ma phung Kêdar jêh ri ƀon bri hađăch Hasôr jêng Y-Nêbukatnetsar hađăch Babilôn hŏ lơh jêh, Brah Yêhôva lah kơt aơ: “Dâk hom rduh lơh ma phung Kêdar, Ƀư rai lơi phung ndŭl mpôl mpeh pa luh nar.

²⁹ Bu mra sŏk lơi ngih bok jêh ri mpa rong khân păng, Nđâp ma bok nching jêh ri ndô ndơ, Djôt rdu nđâp ma seh samô khân păng, Bu mra nter huy: ‘Geh nau klach krit nchueng jŭm!’”

³⁰ Brah Yêhôva lah: “Ơ phung gŭ tâm ƀon Hasôr, Du krap hom! Hăn du hom ntŭk ngai ngăn! Pôn săk tâm ntŭk trôm yôk jru! Yorlah Y-Nêbukatnetsar, hađăch Babilôn, Ŭch tâm rdâng đah khân may, Nchră ƀư nau ƀư rai khân may.”

³¹ Brah Yêhôva lah: “Dâk hom, rduh lơh du phung ndŭl mpôl mâu geh nau mĭn rvê ôh, Dôl gŭ đăp mpăn, Mpông mâu geh nchăng, mâng rnăng mâu nđăng Jêng du ntŭk gŭ êng.

³² Sŏk seh samô khân păng ƀư ndơ bu pit in, Phung biăp âk khân păng ƀư ndơ sa kah. Gâp mra srih tĭng ăp mpeh rlong sial Đơ phung poih sŏk bar đah n'geng tôr; Gâp mra ăn nau mhĭk tât tă bơh ăp ntŭk jŭm khân păng.” Brah Yêhôva lah pônây.

³³ “Ƀon bri hađăch Hasôr mra jêng trôm so bri, Jêng ntŭk rngot njăp mro mrăng, Mâu hôm geh bunuyh gŭ ta nây đŏng ôh; Kŏ mâu geh lĕ du huê bunuyh tât gŭ njưh ta nây!”

Nau mbơh lor ma bri Êlam

³⁴ Rnôk Y-Sêdêkia, hađăch Yuđa ntơm chiă uănh, geh nau Brah Yêhôva lah ma nơm mbơh lor Y-Yêrêmi ma bri Êlam.

³⁵ Brah Yêhôva ma phung tahan lah: “Aơ, Gâp mra nkê̆ch lơi na bri Êlam jêng tơm nau dăng ktang păng.

³⁶ Gâp mra ƀư sial tă bơh puăn njônh khôm tât ma bri Êlam. Gâp mra ƀư ma khân păng du chah rai pru pra ăp puăn njônh sial nây; mâu geh bri dak mâu geh phung bu mprơh tă bơh ma Êlam.

³⁷ Gâp mra ƀư phung Êlam klach krit tanăp phung rlăng jêh ri tanăp phung joi ŭch nkhĭt khân păng.” Brah Yêhôva lah: “Gâp mra ăn tât nau mhĭk ma khân păng jêng nau Gâp hao ji nuih ngăn, Gâp mra njuăl đao tĭng pakơi kŏ tât Gâp ƀư nkhĭt lĕ khân păng.”

³⁸ Brah Yêhôva lah: “Gâp mra ndâk sưng hađăch Gâp tâm bri Êlam, mra ƀư rai hađăch jêh ri phung kôranh khân păng.

³⁹ Ƀiălah tâm nar kăndơ̆, Gâp mra leo lĕ phung tă jêng bu nă phung Êlam plơ̆ sĭt.” Brah Yêhôva lah pônây.