Yêrêmi 48 - Nau Brah Ndu Ngơi 2023

Nau mbơh lor ma bri Môap

¹ Brah Yêhôva ma phung tahan, Brah Ndu Israel, lah ma Môap kơt aơ: “Rêh ni ngăn ăn ma ƀon Nêbô, yorlah bu mra ƀư rai jêh! Ƀon Kiriathaim bêk prêng, yorlah bu sŏk pit jêh; Ƀon Misgap bêk prêng ngăn, yorlah bu ƀư rlâm jêh.

² Nau chrêk rmah ma bri Môap mâu hôm geh đŏng ôh; Tâm ƀon Hêsbôn, bu nchră ƀư mhĭk ma păng: ‘Văch hom, ăn he ngroh lơi Môap bơh ma lĕ bri dak!’ Ơ Matmen, may mra gŭ rklăk; Tak đao mra tĭng groi may.

³ Geh bâr nter vah vơl bơh Hôrônaim: ‘Nau jêng rngot njăp jêh ri nau ƀư rai toyh ngăn!’

⁴ ‘Bri Môap lĕ rai jêh!’ Phung kon se jê̆ păng nter hâu ngăn.

⁵ Hao yôk Luhit, Khân păng hao n'ho ma nhĭm mâu rlu Jŭr sop ƀon Hôrônaim, Tăng bâr nau nter nđêng rngot klâng yor nau ƀư rai.

⁶ Du hom, rklaih êng nau rêh khân ay may nơm, Nâm bu rlô pôm si tâm bri rdah!

⁷ Yorlah may rnơm ma kan jêh ri jay ndơ khlay may nơm, Yor nây bu mra pit in may; Brah Chêmôs mra jêng bu nă Ndrel ma phung kôranh ƀư brah jêh ri phung kôranh păng.

⁸ Nơm ƀư rai mra lăp tâm ăp rplay ƀon toyh, Mâu geh du rplay ƀon dơi klaih; Ntŭk rlŭng mra rai lôch Neh lâng bu mra ƀư rai lĕ, Tĭng nâm Brah Yêhôva hŏ lah jêh.

⁹ Ăn hom kôp năr ma bri Môap, Gay ma păng mpăr hăn du; Lĕ rngôch ƀon toyh păng mra jêng rngot njăp, Mâu geh bunuyh gŭ ôh.

¹⁰ Di ma nau rak rtăp ăn ma nơm pah kan ma Brah Yêhôva ma nau mâu răp jăp! Di ma nau rak rtăp ăn ma nơm mâu ŭch ôh đao păng krêp mham!

¹¹ Môap ơm vay gŭ đăp mpăn ntơm bơh rnôk hôm mom, Nâm bu ndrănh nkân ta blat yăng, Mâu hŏ geh troch ôh bơh ma yăng aơ tơh ma yăng êng, Mâu mâp lĕ ƀư jêng bu nă; Yor nây nau kah păng nâm ơm Jêh ri ƀâu kah păng mâu hŏ rgâl ôh.”

¹² Yor nây, Brah Yêhôva lah: “Aơ, nar lĕ tât, Gâp mra prơh phung hăn trih tât nkhŭt lơi păng. Khân păng mra troch tă bơh tâm trôm yăng, Ƀư nsoih lơi yăng, Jêh nây dong lơi yăng jêng âk rngơl.

¹³ Phung Môap mra prêng yor ma ƀon Chêmôs, Nâm bu ngih Israel prêng Yor ma ƀon Bêthel ntŭk khân păng rnơm.

¹⁴ Mâm khân may dơi lah: ‘Hên jêng phung janh nănh, Jêng phung tahan ktang ntŭk tâm lơh’?

¹⁵ Bu ƀư rai Môap, pit in lĕ rngôch ƀon toyh, Phung bu klâu ndăm blau ueh ngăn lĕ bu nkhĭt,” Hađăch, amoh Păng jêng Brah Yêhôva ma phung tahan, lah pônây.

¹⁶ “Nau mhĭk tât ma bri Môap hŏ dăch tât jêh; Nau rêh ni păng tât gơnh ngăn.

¹⁷ Ơ lĕ rngôch bri dak gŭ văr jŭm, nhĭm vơl hom ma păng! Lĕ rngôch phung gĭt amoh păng, Lah hom: ‘Mâng jra nau dơi, Mâng jra ma nau chrêk rmah hŏ pă jêh!’

¹⁸ Ơ phung gŭ tâm ƀon Dibôn! Jŭr hom tă bơh ma ntŭk nau khưm Jêh ri gŭ ta ntŭk neh sơh. Yorlah phung ƀư rai Môap hŏ rduh ŭch lơh may, Ƀư rai lơi pôih may.

¹⁹ Ơ phung gŭ ta ƀon Arôer! Dâk hom êp meng trong jêh ri kâp uănh, Ôp hom ma bu klâu nchuăt du jêh ri bu ur lĕ rklaih jêh, pô aơ: ‘Moh nau hŏ tât nây?’

²⁰ Môap prêng yor hŏ rai jêh, Nhĭm vơl hom nter lah! Nkoch hom ta kơh dak krong Arnôn pô aơ bri Môap lĕ rai jêh.

²¹ Nau phat dôih tât jêh ma bri klơ dor lâng, ma ƀon Hôlon, ƀon Jahsa, jêh ri ƀon Mêphat,

²² ta ƀon Dibôn, ma yôk Nêbô jêh ri ƀon Bet-Diblathaim,

²³ ta ƀon Kiriathaim, ƀon Bet-Gamul jêh ri ƀon Bet-Mêôn,

²⁴ ta ƀon Kêriôt, ƀon Bôsra, jêh ri lĕ rngôch ƀon toyh dăch ngai tâm bri Môap.”

²⁵ Brah Yêhôva lah: “Nke bri Môap lĕ bu kăt jêh, tur ti păng hŏ pă jêh.

²⁶ Ăn hom păng nhêt ndrănh kŏ nhŭl, yorlah păng n'hao êng păng nơm ŭch tâm rdâng đah Brah Yêhôva. Ăn hom Môap pung păng nơm tâm ndơ păng hok jrih luh jêh ri ƀư nau gơm mưch ăn ma neh ntu.

²⁷ Mâu di hĕ phung Israel lĕ tă ƀư nau gơm mưch ăn ma may jêh? Mâu mâp saơ bu nhŭp păng ta nklang ndrel ma phung ntŭng ăp tơ̆ nkah tât ma păng may rteh bôk?

²⁸ Ơ phung gŭ tâm bri Môap, Du hom tă bơh ƀon toyh jêh ri pôn tâm rkâp lŭ; Ăn jêng hom nâm bu sĭm plŭk Ƀư rsuăn tâm bâr jru.

²⁹ He tăng jêh nau sưr ma bri Môap — Păng sưr rlau hâu ngăn — Ma nau mĭn klơ ir, nau sưr, dăng mưch, Jêh ri nuih n'hâm sưr n'hao êng păng nơm.”

³⁰ Brah Yêhôva lah: “Gâp gĭt nau sưr rlau păng, Lĕ nau blă blơ mâu jêng khlay ôh Jêh ri lĕ nau păng ƀư tih.

³¹ Yor nây yơh, Gâp nhĭm vơl ăn ma bri Môap, Yor lĕ rngôch phung gŭ tâm bri Môap nter vơl. Bu nhĭm vơl ăn ma phung ƀon lan tâm bri Kir-Hêres.

³² Ơ tơm krăk ƀâu Sipma, Gâp nhĭm ăn may âk lơn nhĭm ma ƀon Jaser! Lĕ n'gĭng may jong rlau ma dak mƀŭt, Kŏ tât ta dak mƀŭt Jaser. Nơm ƀư rai hŏ văch tât jêh Sŏk lơi play yan ta vai jêh ri yan play krăk ƀâu may.

³³ Nau maak răm hâk maak hŏ roh jêh Tă bơh đang mir geh jêng ngăn bri Môap; Gâp hŏ ƀư ăn ma ndrănh suăt kro tă bơh ntŭk kĭn păt; Mâu hôm geh bunuyh troh maak đŏng ôh dôl jot play krăk ƀâu; Nđâp tơlah geh bâr troh nter ăt mâu jêng bâr troh maak ôh.

³⁴ Bâr nhĭm vơl tă bơh Hêsbôn tât ma Êlêaleh, jêh ri Jahas, tă bơh ma ƀon Sôar kŏ tât ma Hôrônaim jêh ri Êglat-Sêlisija. Yorlah nđâp ma n'hor dak ƀon Nimrim ăt suăt tâm ban lĕ.”

³⁵ Brah Yêhôva lah: “Gâp mra ngroh lơi bơh bri Môap jêng nơm nhhơr ndơ ƀư brah tâm ntŭk prêh jêh ri nhhơr ndơ ƀâu kah ăn ma lĕ brah khân păng.

³⁶ Yor nây, nuih n'hâm Gâp yor bri Môap nđor bâr n'hôm rđêng rngot; yor phung ƀon lan Kir-Hêres nteh bâr n'hôm nhĭm vơl; yor drăp ndơ khân păng bun prăp hŏ roh lĕ jêh.

³⁷ Ăp nơm poih bôk hil, ăp nơm poih têp ăn pler; mpang ti ăp nơm têl tor, jêh ri ăp nơm mbăn ƀau sat da dê.

³⁸ Tâm ăp ta klơ chor ngih Môap, tâm ntŭk nhuang ƀon mâu geh padih nau nhĭm vơl, yorlah Gâp hŏ mbang chah jêh bri Môap nâm bu du mlâm yăng bu mâu hôm ŭch đŏng ôh.” Brah Yêhôva lah pônây.

³⁹ “Ri, mâm ƀư păng nchah rai! Mâm nau khân păng nhĭm vơl! Môap ndôn kơi nchuăt ma nau prêng! Môap mra jêng nau bu gơm mưch Jêh ri nau klach toyh ăn ma ăp bri dak gŭ jŭm păng.”

⁴⁰ Brah Yêhôva lah: “Aơ, phung rlăng Môap Gâp nter vơl seng nâm bu klang ƀŭng, Lĭ nting năr nkŭm lam bri Môap.

⁴¹ Bu ƀư rai ƀon toyh Kêriôt, Bu pit in lĕ rngôch pôih; Tâm nar nây, nuih n'hâm phung tahan bri Môap Nâm bu nuih n'hâm bu ur bê̆ch veng deh.

⁴² Bri Môap mra rai, mâu hôm jêng du mpôl bunuyh đŏng ôh, Yorlah păng hŏ n'hao êng nơm tâm rdâng đah Brah Yêhôva.”

⁴³ Brah Yêhôva lah: “Hơi phung ƀon lan gŭ tâm bri Môap! Nau krit toyh, ntu jru, jêh ri dăk bu sân dôl kâp panăp may.

⁴⁴ Mbu nơm dơi du nchuăt tă bơh nau krit toyh Mra rhuh tâm ntu jru, Mbu nơm hao du luh tă ntu jru, Mra tŭp tâm dăk bu sân. Yorlah Gâp mra djôt năm nau tâm rmal Tât ma Môap,” Brah Yêhôva lah pônây.

⁴⁵ “Nơm nchuăt du hŏ huăr ngăn jêh Nde tâm dâng n'hâm gui ƀon Hêsbôn; Ƀiălah ŭnh hĭt luh tă bơh Hêsbôn, Chông ŭnh bơh ta nklang phung Sihôn, Ƀư rai ndâr kleng bri Môap, Jêh ri nting bôk phung ƀon lan drơu drơu.

⁴⁶ Ơ Môap, rêh ni ngăn ma may! Phung ƀon lan mbah brah Chêmôs rai lôch jêh, Kon bu klâu may bu nhŭp ƀư bu nă, Kon bu ur may bu mra djôt leo jêng bu nă.

⁴⁷ Ƀiălah, tât ta nar nglĕ dŭt, Gâp mra ƀư ma ƀon lan Môap plơ̆ jêng ndrŏng tay,” Brah Yêhôva lah pônây. Nau phat dôih ma bri Môap lôch nglĕ aơ dơm.