Yêrêmi 47 - Nau Brah Ndu Ngơi 2023

Nau mbơh lor ma phung Philistin

¹ Aơ jêng nau Yêhôva lah ma nơm mbơh lor Y-Yêrêmi ma phung Philistin, êlor ma Pharaôn tâm lơh đah ƀon Gaxa:

² Brah Yêhôva lah: “Ri, lĕ dak krong hao lip tă bơh mpeh pa lơ, Jêh ri jêng du n'hor dak rlâm kơh, Ƀư lip bŭk bri dak jêh ri ndô ndơ tâm bri dak, Bŭk ƀon toyh jêh ri bunuyh gŭ tâm ƀon. Bu mra nhhiăng nhĭm nter kuăl, Lĕ rngôch phung ƀon lan gŭ tâm bri nhĭm vơl da dê.

³ Nteh nchop jâng seh lơ hâu, Nteh ndeh seh drơu drơu, nteh jâng ndeh ngŭr drưh, Jâng ti me mbơ̆ hươi ra ai ngăn Mâu hôm plơ̆ uănh ma phung kon.

⁴ Yorlah nar mra tât Lĕ rngôch phung Philistin bu mra ƀư rai, Lĕ rngôch phung hôm klen gŭ rêh Sâm rklaih ƀon Tyre jêh ri ƀon Sidôn bu ngluh lơi khân păng. Yorlah Brah Yêhôva ƀư rai phung ƀon lan Philistin, Jêng phung hôm klen tă gôl dak mƀŭt Kaptôr.

⁵ Gaxa poih hil bôk Ƀon Askalôn mlo. Ơ phung ƀon lan hôm klen ma Anakim, Ndah nâm jŏ khân ay may mra rek tor săk jăn khân ay may nơm?

⁶ Ơ, đao Brah Yêhôva, Ndah nâm jŏ dĭng ti may rlu? Ntrŭp hom tâm ndrop, Rlu jêh ri gŭ đăp mpăn.

⁷ Ƀiălah Brah Yêhôva hŏ ntrŭnh jêh Mâm may dơi gŭ rlu? Yorlah Kôranh Brah hŏ jao jêh ăn ma păng Tâm rmal ma ƀon Askalôn jêh ri bri kơh dak mƀŭt.”