Yêrêmi 46 - Nau Brah Ndu Ngơi 2023

Nau mbơh lor ma phung ndŭl mpôl bunuyh ( 46:1 – 51:64 )

¹ Aơ jêng nau Brah Yêhôva lah ma nơm mbơh lor Y-Yêrêmi di ma phung ndŭl mpôl bunuyh.

Nau mbơh lor ma bri Êjipt

² Ma bri Êjipt, aơ jêng nau mhe mhan ăn ma phung tahan Pharaôn Nêkô, hađăch Êjipt, nây jêng phung tahan Y-Nêbukatnetsar, hađăch Babilôn, hŏ dơi jêh ta ƀon Karkêmis, dăch ta kơh dak krong Ơphrat tâm năm rơh puăn Y-Jêhôjakim, kon bu klâu Y-Jôsia, hađăch Yuđa:

³ “Ndrăp rơm hom khêl jê̆ ndrel ma khêl toyh Jêh ri rduh ma nau tâm lơh!

⁴ Ơ phung tahan ncho seh, Dăp hom seh, ưn seh! Gơnh ndô môk loih jêh ri dăp ta ntŭk tâm lơh; Theng chông tak ăn hơr jêh ri nsoh ao loih!

⁵ Mâm ƀư Gâp hŏ saơ jêh nau aơ? Khân păng klach ngăn jêh ri rŭch plơ̆; Phung tahan bu lơh rai lĕ jêh, Ngăch ma du ro, Khân păng mâu hôm plơ̆ n'gĭl pakơi ôh; Geh nau nkrit toyh jŭm chiau meng!” Brah Yêhôva lah pônây.

⁶ “Bunuyh ngăch jâng ăt mâu dơi du ôh, Nơm dăng ktang ăt mâu dơi klaih lĕ; Tâm mpeh pa lơ, ta kơh dak krong Ơphrat, Khân păng chêh prah sa mok!

⁷ Mbu nơm hŏ hao jêh nâm bu dak krong Nil, Nâm bu dak krong geh rbuh ktang?

⁸ Bri Êjipt hao lip nâm bu dak krong Nil, Nâm bu dak krong geh rbuh ktang. Păng lah: ‘Gâp mra hao, nkŭm lam neh ntu; Ƀư rai ƀon toyh jêh ri bunuyh gŭ tâm ƀon.’

⁹ Seh ndơ tâm lơh, rduh ran tât; Ndeh seh tâm lơh, rduh hom! Phung tahan tâm lơh, ran rlet panăp; Phung n'gor Kus jêh ri n'gor Put djôt khêl, Phung n'gor Ludim blau sŏng pănh na.

¹⁰ Ma nar nây jêng nar Kôranh Brah, jêng Brah Yêhôva ma phung tahan, Jêng nar har plơng bôk, Gay har plơng ma phung rlăng đah Păng. Đao rvăn kŏ tât hơm, Nhêt mham hơm mpay. Yorlah Kôranh Brah, jêng Yêhôva ma phung tahan, Nâm bu ndơ ƀư brah nhhơr tâm bri mpeh pa lơ, ta kơh dak krong Ơphrat.

¹¹ Ơ bu ur druh, kon bu ur bri Êjipt! Hăn hao hom ma bri Gilêat, jêh ri sŏk ntăk si ƀâu kah; Khân ay dŏng âk ntil dak si kŏ mâu khlay lĕ, Mâu geh nau ƀư bah ma khân ay ôh!

¹² Lĕ bri dak tăng lư da dê jêh nau bêk prêng khân ay may, Nau nhhiăng nhĭm ay may lam bri neh ntu; Yorlah nơm dăng ktang chêh prah đah nơm dăng ktang Lĕ bar hê cha lôt ndrel n'grŭp.”

Babilôn hăn lơh bri Êjipt

¹³ Aơ jêng nau Brah Yêhôva lah ma nơm mbơh lor Y-Yêrêmi ma nau Y-Nêbukatnetsar, hađăch bri Babilôn, ŭch hăn tâm lơh đah bri Êjipt:

¹⁴ “Mbơh hom tâm bri Êjipt, tâm mpơl tâm ƀon Mikdôl, Tâm mpơl tâm ƀon Nôp jêh ri ƀon Tahpanhes pô aơ: ‘Lăp hom ta ntŭk, hŏ ndrăp nkra nŭm jêh, Yorlah đao hŏ văr jêh jŭm khân ay may.’

¹⁵ Mâm ƀư brah ndrôk Apis may du krap, Ndrôk may mâu dơi tâm rdâng ôh? Yorlah Brah Yêhôva hŏ mprơh jêh khân păng du.

¹⁶ Păng ƀư âk bunuyh chêh prah, Bunuyh aơ prah ta klơ nơm êng, jêh ri nsum ndrel: ‘Gơnh dâk, plơ̆ sĭt ma ntŭk ƀon lan gâp, Plơ̆ sĭt ta ntŭk bri me deh gâp, Du ngai bơh tak đao nơm tŭn jot!’

¹⁷ Ta nây, bu lah Pharaôn, hađăch bri Êjipt, Jêng ‘Nơm uh ah hŏ ƀư roh jêh mông găl.’”

¹⁸ Hađăch, amoh Păng jêng Brah Yêhôva ma phung tahan, lah: “Tĭng nâm Gâp gŭ rêh mro mrăng, Nơm rlăng mra tât Nâm bu yôk Tabor ta nklang ma lĕ gôl yôk êng, Nâm bu yôk Karmel ntoh tâm dak mƀŭt.

¹⁹ Ơ phung ƀon lan Êjipt, Ndrăp hom ndô ndơ gay ma hăn ƀư bu nă, Yorlah ƀon Nôp mra jêng rngol; Bu mra ƀư rai mâu geh bunuyh gŭ ôh.

²⁰ Bri Êjipt jêng du mlâm kon ndrôk me ueh, Ƀiălah du mlâm rhuay rpu tă mpeh pa lơ tât sôch.

²¹ Nđâp ma phung tahan tâm lơh nkhôm gŭ ta nklang păng Nâm bu kon ndrôk lay ueh; Ƀiălah ndôn kơi nchuăt du da dê, Mâu dơi tâm rđâng ôh. Yorlah nar mhĭk tât, nar tâm rmal, Hŏ tât jêh ta klơ khân păng.

²² Nau nteh păng nâm bu hung bêh Yorlah phung rlăng ktang n'hoch tât; Khân păng djôt sung rduh tâm lơh đah păng, Nâm bu nơm kăl si tâm bri.”

²³ Brah Yêhôva lah: “Phung rlăng kăl ƀư rai krŏng păng, Nđâp lah bri nây krŏng mbâl, Yorlah khân păng jêng âk lơn ma phung krah ndrach, Mâu dơi kơp ôh.

²⁴ Kon bu ur bri Êjipt mra djôt nau prêng, Bu mra jao tâm ti phung ƀon lan mpeh pa lơ.”

²⁵ Brah Yêhôva ma phung tahan, Brah Ndu Israel, lah: “Aơ, Gâp mra tâm rmal ma phung Amôn, jêng brah ta ƀon Thêbes, Pharaôn jêh ri bri Êjipt, ndrel phung brah jêh ri phung hađăch păng: nây jêng hađăch Pharaôn nđâp ma phung rnơm nsing ma păng.

²⁶ Gâp mra jao khân păng ma ti nơm joi nkhĭt lơi nau rêh khân păng, tâm ti Y-Nêbukatnetsar, hađăch Babilôn, tâm ti phung kôranh tahan păng. Ƀiălah, rlet pakơi ta bri Êjipt mra hôm geh đŏng ƀon lan plơ̆ gŭ nâm bu rnôk saơm.” Brah Yêhôva lah pônây.

Brah Ndu mra tâm rklaih phung Israel

²⁷ “Ơ phung oh mon Gâp jêng Yakôb, lơi klach ôh! Ơ phung Israel, lơi ta klach krit ôh! Yor aơ, Gâp mra rklaih may bơh ntŭk ngai ngăn, Jêh ri noi deh may tă bơh jêng bu nă. Phung Yakôb mra plơ̆ sĭt tay jêh ri gŭ ueh đăp mpăn, Mâu hôm klach krit bu ôh.”

²⁸ Brah Yêhôva lah: “Ơ phung Yakôb phung oh mon Gâp, lơi ta klach ôh, Yorlah Gâp gŭ ndrel ma may. Gâp mra ƀư rai lĕ rngôch bri dak Gâp hŏ mprơh may tât jêh; Bi ma may Gâp mâu mra ƀư rai lôch ôh, May mâu mra rklaih ôh bơh nau tâm rmal Ƀiălah Gâp mra nduyh nkra may ma nau di.”