Yêrêmi 45 - Nau Brah Ndu Ngơi 2023

Nau mhe mhan ăn ma Y-Baruk

¹ Aơ jêng nau nơm mbơh lor Y-Yêrêmi ngơi ma Y-Baruk, kon bu klâu Y-Nêria, dôl păng nchih tâm du ndrom samƀŭt lĕ nau tă bơh Y-Yêrêmi răk ăn ma păng, tâm năm tal puăn rơh Y-Jêhôjakim, kon bu klâu Y-Jôsia hađăch Yuđa:

² “Ơ Y-Baruk! Yêhôva Brah Ndu Israel, lah ma may tâm ban pônây:

³ ‘May hŏ lah jêh: Rêh ni ngăn ma gâp! Yorlah Brah Yêhôva hŏ ntop jêh nau rngot ma nau ji gâp; gâp huơi yor nhĭm vơl, mâu geh nau rlu ôh!’”

⁴ May lah hom ma păng pô aơ: “Brah Yêhôva lah: ‘Aơ, Gâp mra klưh lơi moh ndơ Gâp hŏ ndâk jêh, Gâp mra rôk lơi moh ndơ Gâp hŏ tăm jêh, jêh ri nau nây mra geh tât tâm lam neh ntu.

⁵ Bi may, may joi ăn nau toyh ma may nơm lĕ? Lơi ta joi đŏng ôh, yor nau aơ, Gâp dăch ăn tât nau mhĭk ma lĕ rngôch bunuyh: Ƀiălah bi ma may, nđâp lah moh ntŭk tât may hăn, Gâp mra ăn nau rêh may dơi geh đăp mpăn.’” Brah Yêhôva lah pônây.