Yêrêmi 44 - Nau Brah Ndu Ngơi 2023

Nau mbơh lor ma nau tih mbah rup brah

¹ Geh nau lah ma Y-Yêrêmi ma lĕ rngôch phung Yuđa gŭ tâm n'gor bri Êjipt, ta ƀon Mikdôl, ƀon Tahpanhes, ta ƀon Nôp, jêh ri tâm bri Pathrôs.

² Brah Yêhôva ma phung tahan, Brah Ndu Israel, lah: “Khân may nơm hŏ saơ jêh lĕ rngôch nau mhĭk Gâp hŏ ăn tât jêh ma ƀon Yêrusalem jêh ri ma lĕ rngôch ƀon n'gor bri Yuđa. Ri, lĕ ƀon toyh nây nar aơ jêng rngol, mâu geh du huê bunuyh gŭ.

³ Tă bơh nau ƀai khân păng hŏ ƀư tih jêh gay ƀư nsônh nuih Gâp. Khân păng nhhơr ndơ ƀâu kah jêh ri mbah ma phung brah êng, khân păng tâm ban ma phung khân may jêh ri ma phung chô yau khân may mâu mâp gĭt ôh.

⁴ Nđâp lah Gâp hŏ prơh hăn ƀaƀơ jêh ma lĕ rngôch phung oh mon Gâp, nây jêng phung nơm mbơh lor, tât lah ma khân may pô aơ: ‘Vơ, lơi ta ƀư ôh nau ƀơ̆ bơch Gâp tâm rmot nây!’

⁵ Ƀiălah khân păng mâu iăt ôh, mâu lĕ rkêng tôr iăt, mâu chalơi ôh nau ƀai jêh ri hôm nhhơr ndơ ƀâu kah ăn ma phung brah êng.

⁶ Yor nây, Gâp nkhŭt nau ji nuih jêh ri ji nuih ngăn jŭr su lĕ rngôch ƀon bri Yuđa jêh ri tâm lĕ trong toyh ƀon Yêrusalem, ƀư ma khân păng jêng ntŭk rngot njăp rjăp, roh rai.

⁷ Aƀaơ ri, Yêhôva Brah Ndu ma phung tahan, Brah Ndu Israel, lah pô aơ: ‘Mâm ƀư khân may ƀư ăn ma khân may nơm nau ƀai dŭt toyh kŏ tât bơh ma phung bu klâu, phung bu ur, phung kon se jê̆, phung oh bê dôl hôm pu bu ƀư rai lĕ bơh n'gor bri Yuđa, mâu hôm geh du huê bunuyh hôm klen ăn ma khân may?

⁸ Mâm ƀư khân may nsônh nuih Gâp ma kan ti khân ay may ƀư? Tâm n'gor bri Êjipt, ntŭk khân may mhe văch gŭ, khân may hŏ nhhơr ndơ ƀâu kah ăn ma phung brah êng kŏ tât dơn êng nau bu ƀư ngroh lơi, jêh ri jêng nau rak rtăp jêh ri bu ntêh rmot ta nklang lĕ rngôch ƀon lan ta neh ntu.

⁹ Di lĕ khân may hŏ chuêl jêh nau mhĭk phung chô yau khân may, nau mhĭk phung hađăch Yuđa, nau mhĭk phung ur hađăch, nau mhĭk khân may nơm jêh ri ur khân may hŏ ƀư tih jêh tâm n'gor bri Yuđa jêh ri tâm trong toyh ƀon Yêrusalem?

¹⁰ Kŏ tât ma nar aơ, khân păng ăt mâu mâp rmal nau tih, mâu klach yơk lĕ, mâu lĕ rêh tĭng nau vay jêh ri nau vay dăp Gâp hŏ njêng jêh tanăp khân may jêh ri phung chô yau khân ay may.’

¹¹ Yor nây, Brah Yêhôva ma phung tahan, Brah Ndu Israel, lah: ‘Aơ, Gâp tâm nal nkhŭt nau mhĭk tât ăn ma khân may jêh ri ngroh lơi lĕ rngôch phung Yuđa.

¹² Gâp mra sŏk lơi phung Yuđa hôm klen, jêng phung săch jêh ŭch hăn ta bri Êjipt, bu mra ƀư ngroh lơi khân păng ta nây; khân păng mra khĭt tâm bri Êjipt, mra khĭt ma tak đao mâu lah sa sât ji ngot. Ntơm bơh kon se jê̆ tât ma bunuyh toyh mra khĭt da dê yor tak đao mâu lah sa sât ji ngot. Khân păng jêng nau rak rtăp, jêng nau ma bu bêk prêng, jêng nau krit toyh, nau ƀơ̆ ƀơch jêh ri nau bu ƀư mhĭk.

¹³ Gâp mra tâm rmal phung gŭ tâm bri Êjipt, nâm bu hŏ tâm rmal jêh ma ƀon Yêrusalem ma pêh đao, nau sa sât ji ngot, jêh ri nau ji tưp.

¹⁴ Tâm phung ƀon lan Yuđa hôm klen nchuăt du gŭ tâm bri Êjipt mâu mra geh du huê bunuyh dơi klaih ôh mâu lah hôm rêh gay plơ̆ sĭt tay ma bri Yuđa, jêng ntŭk khân păng ŭch kâp plơ̆ sĭt tâm n'gor. Khân păng mâu mra dơi plơ̆ sĭt gŭ ôh, knŏng phung ƀaƀă nchuăt du klaih nây dơm.’”

¹⁵ Rnôk aơ, lĕ rngôch phung bu klâu gĭt jêh phung ur păng nhhơr ndơ ƀâu kah ăn ma phung brah êng, jêh ri lĕ rngôch phung bu ur geh măt ta nây, jêng du mpôl phung tâm rƀŭn âk, lĕ rngôch phung ƀon lan gŭ tâm ƀon Pathrôs tâm bri Êjipt, lah ma Y-Yêrêmi:

¹⁶ “Nau may ngơi jêh ma hên tâm amoh Brah Yêhôva, hên mâu mra iăt ôh.

¹⁷ Ƀiălah, hên mra ƀư nŭm lĕ nau hŏ ton jêh luh bơh ma mbung hên, mra nhhơr ndơ ƀâu kah jêh ri ƀư nau ndơ nhhơr nhêt ma hađăch bu ur tâm trôk, nâm bu hên jêh ri phung chô yau hên, phung hađăch jêh ri phung kôranh hên hŏ ƀư jêh tâm ƀon n'gor Yuđa jêh ri n'gŏ trong toyh ƀon Yêrusalem. Nôk nây, hên hŏ geh ndơ sông sa âk rmeh, gŭ rêh geh nau chăt hao, mâu geh nau mhĭk tât ôh.

¹⁸ Ƀiălah, ntơm bơh hên rlu nhhơr ndơ ƀâu kah jêh ri mâu ƀư ndơ nhhơr nhêt ăn ma hađăch bu ur tâm trôk, hên pưt kƀah ăp ntil ndơ jêh ri bu nkhĭt lĕ ma tak đao jêh ri nau sa sât ji ngot.

¹⁹ Rlau lơn dŏng, lah hên nhhơr ndơ ƀâu kah jêh ri ƀư ndơ nhhơr nhêt ma hađăch bu ur tâm trôk, mâm dĭng sai hên mâu gĭt hên ƀư ƀănh tĭng nâm rup hađăch bu ur jêh ri nhhơr ndơ nhhơr nhêt ăn ma brah nây lĕ?”

²⁰ Y-Yêrêmi lah ma lĕ rngôch phung ƀon lan, phung bu klâu jêh ri bu ur, ndrel phung mhe plơ̆ lah ăn ma păng kơt aơ:

²¹ “Di lĕ khân may jêh ri phung chô yau khân may, phung hađăch jêh ri phung kôranh khân ay may, ndrel phung ƀon lan tâm bri nây hŏ nhhơr jêh ndơ ƀâu kah tâm ăp ƀon toyh n'gor Yuđa jêh ri lĕ trong toyh ƀon Yêrusalem, Brah Yêhôva hŏ kah gĭt jêh ri hŏ prăp jêh tâm nau mĭn Păng nây lĕ?

²² Brah Yêhôva mâu hôm dơi srôih đŏng ôh lĕ nau mhĭk kan khân ay may ƀư jêh ri nau ƀơ̆ ƀơch khân ay may hŏ ƀư tih jêh, yor nây nar aơ bri dak khân ay may hŏ jêng nau bu rak rtăp jêh, jêng du ntŭk rngol, jêng ntŭk rngot klâng, mâu geh bunuyh gŭ ôh.

²³ Yorlah khân ay may hŏ su ndơ ƀâu kah jêh ri ƀư tih jêh ma Brah Yêhôva, mâu tông ôh bâr Brah Yêhôva, jêh ri mâu gŭ rêh tĭng nau vay, jêh ri nau vay dăp jêh ri nau Păng nkah nti, yor ri nau mhĭk aơ hŏ tât jêh ma khân ay may nar aơ.”

²⁴ Y-Yêrêmi lah đŏng ma lĕ rngôch phung ƀon lan jêh ri ma lĕ rngôch phung bu ur: “Ơ lĕ rngôch phung Yuđa dôl gŭ tâm n'gor bri Êjipt, iăt hom nau Brah Yêhôva!

²⁵ Brah Yêhôva ma phung tahan, Brah Ndu Israel, lah: Nanê̆ ngăn, khân may jêh ri ur khân may mbung hŏ ngơi ti hŏ ƀư. Khân may lah: ‘Hên mra ƀư ngăn nau hên hŏ ton jêh, mra nhhơr ndơ ƀâu kah, jêh ri ƀư ndơ nhhơr nhêt ma hađăch bu ur tâm trôk.’ Pôri djôt nâp nau ton jêh ri ƀư nŭm hom nau khân may ton!

²⁶ Ƀiălah, ơ lĕ rngôch phung Yuđa gŭ tâm bri Êjipt, iăt hom nau Brah Yêhôva! Brah Yêhôva lah: Aơ Gâp sŏk ma amoh toyh Gâp ton pô aơ tâm lam bri Êjipt mâu mra geh du huê bunuyh Yuđa hă mbung kuăl tâm amoh Gâp pô aơ: ‘Tĭng nâm Yêhôva Brah Ndu gŭ rêh mro mrăng!’

²⁷ Aơ, Gâp mra gŭ rngeh gay ƀư nau mhĭk tât ăn ma khân păng mâu di ƀư nau ueh ôh; lĕ rngôch phung bu klâu Yuđa dôl gŭ tâm bri Êjipt mra khĭt da dê ma đao jêh ri nau sât ji ngot kŏ tât khân păng rai lôch lĕ.

²⁸ Knŏng geh djê̆ dơm bunuyh klaih tă bơh tak đao nchuăt du tă bơh bri Êjipt plơ̆ sĭt tâm bri Yuđa. Rnôk nây, lĕ rngôch phung Yuđa hôm klen, jêng phung hŏ tât jêh ŭch gŭ tâm n'gor bri Êjipt aơ, mra gĭt mbu nau ngơi jêng di ngăn, nau ngơi Gâp mâu lah nau ngơi khân păng.

²⁹ Brah Yêhôva lah: ‘Aơ jêng nau mbên khlay ăn ma khân may gĭt Gâp mra tâm rmal khân ay may tâm ntŭk aơ, gay ma khân ay may gĭt pô aơ nau Gâp lah ma nau mhĭk tât jêng nau geh ngăn ma khân may.’

³⁰ Brah Yêhôva lah: ‘Aơ, Gâp mra jao Pharaôn Hôphra, hađăch bri Êjipt, ma ti phung rlăng păng, nây jêng tâm ti phung ŭch joi gay ngroh lơi nau rêh păng, nâm bu Gâp hŏ jao jêh Y-Sêdêkia, hađăch n'gor Yuđa, tâm ti Y-Nêbukatnetsar, hađăch bri Babilôn, jêng nơm rlăng ŭch joi gay nkhĭt Y-Sêdêkia.’”