Yêrêmi 43 - Nau Brah Ndu Ngơi 2023

Bu djôt leo Y-Yêrêmi ma n'gor bri Êjipt

¹ Lôch jêh nau Y-Yêrêmi nkoch ma lĕ rngôch phung ƀon lan lĕ nau Yêhôva Brah Ndu, nây jêng lĕ rngôch nau ngơi Yêhôva Brah Ndu khân păng hŏ prơh jêh păng hăn nkoch tay ma khân păng tăng,

² pôri Y-Asaria, kon bu klâu Y-Hôsaya, jêh ri Y-Jôhanan, kon bu klâu Y-Karêa, ndrel ma phung nklă êng, lah ma Y-Yêrêmi: “May ngơi mƀruh! Yêhôva Brah Ndu hên mâu prot prơh ôh păng ngơi đah hên: ‘Mâu dơi hăn tât ôh ma bri Êjipt ŭch gŭ ta nây.’

³ Ƀiălah Y-Baruk nơm yơh, kon bu klâu Y-Nêria, nsŭk may tâm rdâng đah hên, ŭch jao hên tâm ti phung Kaldê, gay ma khân păng nkhĭt hên mâu lah njŭn leo hên jêng bu nă tâm bri Babilôn.”

⁴ Tâm ban pônây lĕ, Y-Jôhanan, kon bu klâu Y-Karêa, lĕ rngôch phung kôranh tahan jêh ri lĕ rngôch phung ƀon lan mâu tông ôh bâr Brah Yêhôva ntĭnh mra gŭ tay tâm bri Yuđa.

⁵ Ƀiălah, Y-Jôhanan, kon bu klâu Y-Karêa, jêh ri lĕ rngôch phung kôranh tahan leo lĕ rngôch phung Yuđa hôm e klen dôl gŭ tâm bri Yuđa hăn ma bri Êjipt; nây jêng phung bu nă plơ̆ sĭt tay tă bơh lĕ rngôch bri dak bu hŏ mprơh jêh khân păng,

⁶ nây jêng bu klâu, phung bu ur, phung kon se, ndrel ma phung kon bu ur hađăch, jêh ri lĕ rngôch phung bunuyh Y-Nêbusaradan, kôranh tahan gak, hŏ lơi jêh ma Y-Gêdalia, kon bu klâu Y-Ahikam, sau Y-Saphan, jêh ri nđâp ma lĕ rngôch nơm mbơh lor Y-Yêrêmi jêh ri Y-Baruk, kon bu klâu Y-Nêria.

⁷ Pônây khân păng hăn lăp ma bri Êjipt yorlah mâu tông ôh nau Brah Yêhôva. Jêh ri khân păng hăn tât ta Tahpanhes.

⁸ Ta ƀon Tahpanhes, geh nau Brah Yêhôva lah ma Y-Yêrêmi:

⁹ “Tanăp măt phung Yuđa, ăn may sŏk lĕ lŭ toyh jêh ri pôn lŭ nây tâm ndơ tâm krêp tâm dâng pĭt trong, klơ ntŭk lăp ngih hađăch Pharaôn tâm ƀon Tahpanhes.

¹⁰ Jêh nây may lah ma khân păng: Brah Yêhôva ma phung tahan, Brah Ndu Israel, lah: ‘Aơ, Gâp mra prơh hăn kuăl oh mon Gâp jêng Y-Nêbukatnetsar, hađăch Babilôn, jêh ri Gâp mra ndâk sưng hađăch păng ta klơ lŭ toyh Gâp mhe pôn aơ; păng mra ling bok nchăng ăn gui n'hâm ta klơ.

¹¹ Hađăch nây mra văch jêh ri tâm lơh đah bri Êjipt; Mbu nơm khĭt mra khĭt, Mbu nơm ƀư bu nă ƀư jêng bu ăn, Mbu nơm bu sreh ma đao jêng bu sreh ma đao!

¹² Gâp mra klŭp su ma ŭnh lĕ jây rhŏ brah phung brah n'gor bri Êjipt; Y-Nêbukatnetsar mra su ma ŭnh jêh ri njŭn leo phung brah khân păng. Hađăch nây djôt ntŭng lĕ bri Êjipt nâm bu rmăk biăp nhŭp lĕ si tâm bok ao păng, jêh nây du hăn ma nau đăp mpăn.

¹³ Hađăch nây mra mbang nchah lơi lĕ n'gâng ƀư brah ta Bet-Sêmes, tâm bri Êjipt, jêh ri mra su ma ŭnh lĕ jây rhŏ brah ma lĕ brah n'gor bri Êjipt.’”