Yêrêmi 42 - Nau Brah Ndu Ngơi 2023

Y-Yêrêmi nkah ma phung ƀon lan mâu dơi hăn ma n'gor Êjipt

¹ Rnôk nây, lĕ rngôch phung kôranh tahan jêh ri Y-Jôhanan kon bu klâu Y-Karêa, Y-Asaria kon bu klâu Y-Hôsaya, jêh ri lĕ rngôch phung ƀon lan, ntơm bơh kon se tât bunuyh toyh

² văch tât da dê lah ma nơm mbơh lor Y-Yêrêmi: “Dăn may dơn hom nau ŭch dăn hên gay mbơh sơm ma Yêhôva Brah Ndu may ăn ma hên, jêng phung bunuyh hôm klen gŭ ta aơ. Nâm bu may saơ jêh, hên knŏng hôm e djê̆ dơm mâu geh âk tâm ban ma saơm.

³ Dăn Yêhôva Brah Ndu may ntĭm ăn ma hên trong hên mra hăn jêh ri kan hên mra ƀư!”

⁴ Nơm mbơh lor Y-Yêrêmi lah ma khân păng: “Gâp hŏ tăng jêh! Aơ, gâp mra mbơh sơm ma Yêhôva Brah Ndu khân may tĭng nâm nau khân may dăn. Gâp mra mbơh ma khân may gĭt lĕ ntil nau Brah Yêhôva plơ̆ lah ma khân may, mâu prăp tay du ntil nau ôh.”

⁵ Khân păng lah đŏng ma Y-Yêrêmi: “Mbơh sơm ma Brah Yêhôva nau ngăn jêh ri răp jăp mbơh an ăn ma hên, tơlah hên mâu ƀư tĭng nâm nau Yêhôva Brah Ndu may prơh may ntĭm nti ma hên,

⁶ Nđâp tơlah ueh mâu lah mhĭk, hên ăt tông bâr Yêhôva Brah Ndu hên, jêng Nơm hên prơh may hăn tât, gay ma tông bâr Yêhôva Brah Ndu hên, pôri hên mra geh nau ueh maak.”

⁷ Jât nar pakơi, geh nau Brah Yêhôva lah ma Y-Yêrêmi.

⁸ May kuăl Y-Jôhanan, kon bu klâu Y-Karêa, jêh ri lĕ rngôch phung kôranh tahan dôl gŭ ndrel păng, ndrel ma lĕ rngôch phung ƀon lan ntơm bơh kon se jê̆ tât ma bunuyh toyh,

⁹ jêh ri lah: “Yêhôva Brah Ndu Israel, jêng Nơm khân may hŏ prơh gâp hăn jêh gay mpơl nau vơl dăn tanăp măt Păng, lah pô aơ:

¹⁰ ‘Tơlah khân may hôm dŏng gŭ tâm n'gor bri aơ pôri Gâp mra ndâk mâu rơih lơi ôh, mra brôi tăm mâu geh rôk lơi ôh; yorlah Gâp nhhuach ma nau mhĭk Gâp hŏ ƀư jêh ma khân may.

¹¹ Lơi ta klach ôh ma hađăch Babilôn, jêng ma nơm khân ay may klach; Brah Yêhôva lah, lơi klach ôh ma hađăch nây, yorlah Gâp gŭ ndrel ma khân ay may gay koh dŏng jêh ri tâm rklaih khân may tă bơh ti hađăch nây.

¹² Gâp mra yô̆ nđach ma khân may jêh ri ƀư ăn ma hađăch nây ăt mra yô̆ nđach đŏng ma khân ay may, jêh ri ăn khân ay may plơ̆ sĭt ma bri dak khân ay may nơm.’

¹³ Ƀiălah tơlah khân may lah: ‘Hên mâu ŭch gŭ tâm bri aơ ôh;’ khân may mâu tông ôh bâr Yêhôva Brah Ndu khân may,

¹⁴ jêh ri lah pô aơ: ‘Mâu, hên ŭch hăn ma n'gor bri Êjipt, jêng ntŭk hên mâu mra saơ nau tâm lơh, mâu tăng bâr nŭng đŏng ôh, hên mâu mra rvê kƀah ndơ sông sa đŏng ôh, jêh ri hên mra gŭ rêh ta nây yơh,’

¹⁵ pôri, ơ phung Yuđa hôm e klen nây, iăt hom nau Brah Yêhôva! Brah Yêhôva ma phung tahan, Brah Ndu Israel lah: ‘Lah khân ay may ŭch hăn tât ma n'gor bri Êjipt gay gŭ ta nây,

¹⁶ pôri đao khân may klach mra tĭng ban khân may tâm n'gor bri Êjipt; nau sa sât ji ngot khân may klach krit ngăn mra tĭng groi khân may tât ma n'gor bri Êjipt, jêh ri khân may mra khĭt ta nây.

¹⁷ Yor nây, phung bunuyh săch hăn rlet ma bri Êjipt mra khĭt ma đao, nau sa sât ji ngot, jêh ri nau ji tưp. Mâu geh ôh du huê nơm tâm khân păng hôm e rêh; mâu geh du huê klaih bơh nau mhĭk Gâp mra nkhŭt ma khân păng.’

¹⁸ N'hêl nanê̆ yơh, Brah Yêhôva ma phung tahan, Brah Ndu Israel, lah: ‘Nâm bu Gâp hŏ nkhŭt jêh nau nuih jêh ri nau ji nuih ma phung gŭ tâm ƀon Yêrusalem, lah khân may hăn rlet ma bri Êjipt, Gâp mra nkhŭt nau ji nuih Gâp ma khân may tâm ban lĕ. Khân may mra jêng ndơ bu suai rak jêh ri nau klach krit, nau rak rtăp jêh ri nau bêk prêng. Khân ay may mâu mra hôm saơ ntŭk aơ đŏng ôh.’

¹⁹ Ơ phung Yuđa hôm e klen, Brah Yêhôva hŏ lah jêh ma khân may: ‘Lơi ta hăn ôh ma n'gor bri Êjipt.’ Ăn khân ay may gĭt rah vah ngăn nar aơ gâp mbơh jêh ăn ma khân ay may.

²⁰ Khân may ndơm êng khân may nơm. Khân ay may hŏ prơh jêh gâp hăn tât ma Yêhôva Brah Ndu khân ay may jêh ri lah ma gâp: ‘Ăn yor ma phung hên mbơh sơm hom ma Yêhôva Brah Ndu hên, ăn ma hên gĭt moh nau Yêhôva Brah Ndu hên lah ma may pônây hên mra tĭng ƀư.’

²¹ Nar aơ, gâp mbơh jêh nau nây ma khân ay may, ƀiălah khân ay may mâu tông ôh bâr Yêhôva Brah Ndu hŏ mprơh jêh gâp hăn mbơh tay ma khân ay may.

²² Pônây, ăn gĭt nanê̆ ngăn pô aơ ma khân ay may mra khĭt ma đao, ma nau sa sât ji ngot, jêh ri ma nau ji tưp tâm ntŭk khân ay may ŭch hăn gŭ.”