Yêrêmi 41 - Nau Brah Ndu Ngơi 2023

Bu ŭch nkhĭt Y-Gêdalia

¹ Tâm khay pơh, Y-Ismaêl, kon bu klâu Y-Nêthania, sau Y-Êlisama, bơh noi deh hađăch, jêh ri jêng du kôranh toyh ma phung tahan hađăch, djôt leo jât nuyh bu klâu văch mâp ma Y-Gêdalia, kon bu klâu Y-Ahikam, ta ƀon Mispa. Dôl khân păng gŭ sông sa nhêt ndrel ta nây,

² pôri Y-Ismaêl, kon bu klâu Y-Nêthania, ndrel jât nuyh hăn tĭng, tăk đao nkhĭt khĭt Y-Gêdalia, kon bu klâu Y-Ahikam, sau Y-Saphan, jêng nơm hađăch Babilôn hŏ njêng kôranh toyh chiă uănh bri dak.

³ Y-Ismaêl nkhĭt lĕ rngôch phung Yuđa dôl gŭ ndrel ma Y-Gêdalia ta ƀon Mispa, nđâp ma phung Kaldê dôl gŭ ta nây.

⁴ Nar tal bar jêh nau nkhĭt ntŭng Y-Gêdalia, lah bu ê hŏ gĭt nau nây,

⁵ pôri geh pham jât nuyh bu klâu tât tă bơh Sichem, Silô, jêh ri tât tă bơh Samari. Khân păng poih têp kang, nsoh bok ao sat, rek tor êng săk jăn khân păng nơm, ti djôt leo ndơ ƀư brah rnih môi jêh ri ndơ ƀâu kah gay nhhơr tâm ngih Brah Yêhôva.

⁶ Y-Ismaêl, kon bu klâu Y-Nêthania, tă bơh Mispa luh vơt khân păng, n'ho hăn n'ho ma nhĭm. Dôl mâp khân păng, Y-Ismaêl lah: “Dăn lĕ rngôch khân may lăp mâp đah Y-Gêdalia, kon bu klâu Y-Ahikam.”

⁷ Dôl khân păng hăn tât tâm nklang ƀon Y-Ismaêl, kon bu klâu Y-Nêthania, ndrel ma lĕ rngôch phung băl păng hŏ nkhĭt jêh khân păng jêh ri mƀăr tâm ntu dak.

⁸ Ƀiălah geh jât nuyh tâm phung khân păng lah ma Y-Ismaêl: “Lơi ta nkhĭt hên ôh, yorlah hên geh jay prăp nkrem ndơ sông sa geh ba ôrgơ, ba bri, dak ngi play ôlive, jêh ri dak sŭt lĕ pôn jêh tâm mir.” Yor ri, Y-Ismaêl mâu hôm nkhĭt ôh khân păng ndrel ma lĕ rngôch oh nâu khân păng.

⁹ Ntu dak Y-Ismaêl, kon bu klâu Y-Nêthania, mƀăr săk phung păng hŏ nkhĭt jêh, jêng ntu dak Y-Gêdalia, nây jêng ntu dak hađăch Asa kuyh jêh gay king ma Y-Baêsa, hađăch Israel. Y-Ismaêl, kon bu klâu Y-Nêthania, hŏ plơ̆ brôi đŏng bêng ma săk jăn khĭt.

¹⁰ Jêh nây Y-Ismaêl nhŭp ƀư bu nă lĕ rngôch phung bunuyh ƀon lan hôm klen tâm ƀon Mispa, nây jêng phung kon bu ur hađăch jêh ri lĕ rngôch ƀon lan bu om gŭ ta ƀon Mispa, Y-Nêbusaradan kôranh toyh phung tahan gak hŏ jao jêh ăn ma Y-Gêdalia, kon bu klâu Y-Ahikam. Y-Ismaêl, kon bu klâu Y-Nêthania, nhŭp jêh ri ƀư khân păng nây jêng bu nă, jêh nây hăn rgăn ntŭk phung ƀon lan Ammôn.

¹¹ Lah Y-Jôhanan, kon bu klâu Y-Karêa, jêh ri lĕ rngôch phung kôranh tahan hăn tĭng păng, tăng jêh lĕ rngôch nau mhĭk Y-Ismaêl, kon bu klâu Y-Nêthania, hŏ ƀư jêh,

¹² pôri khân păng tâm rgum lĕ rngôch phung bu klâu khân păng jêh ri hăn tâm lơh đah Y-Ismaêl, kon bu klâu Y-Nêthania. Khân păng ban Y-Ismaêl ta dak nglao toyh Gibêôn.

¹³ Lah saơ Y-Jôhanan, kon bu klâu Y-Karêa, jêh ri lĕ rngôch phung kôranh tâm dâng păng pôri phung ƀon lan dôl gŭ ta ntŭk Y-Ismaêl răm maak da dê.

¹⁴ Lĕ rngôch bunuyh Y-Ismaêl nhŭp njŭn leo tă bơh Mispa plơ̆ sĭt da dê, hăn tĭng ma Y-Jôhanan, kon bu klâu Y-Karêa.

¹⁵ Bi ma Y-Ismaêl, kon bu klâu Y-Nêthania, ndrel ma pham nuyh, du klaih bơh Y-Jôhanan jêh ri hăn tât ntŭk phung ƀon lan Ammôn.

¹⁶ Y-Jôhanan, kon bu klâu Y-Karêa, jêh ri lĕ rngôch phung kôranh tahan păng djôt leo lĕ rngôch phung ƀon lan dơi rklaih tă bơh ti phung Y-Ismaêl, kon bu klâu Y-Nêthania, jêng phung hŏ nhŭp veng leo khân păng tă bơh Mispa jêh nau nkhĭt Y-Gêdalia, kon bu klâu Y-Ahikam. Lĕ rngôch khân păng jêng phung tahan tâm lơh geh, bu ur, kon se, jêh ri kôranh bu char Y-Jôhanan djôt sĭt da dê tă bơh Gibêôn.

¹⁷ Khân păng dâk hăn jêh ri veh nsrŭng ta ntŭk Ghêrut Chimham, êp ƀon Ƀêtlêhem, mĭn ŭch hăn ma n'gor bri Êjipt,

¹⁸ der ngai ma phung Kaldê. Khân păng klach phung Kaldê yorlah Y-Ismaêl, kon bu klâu Y-Nêthania, hŏ nkhĭt jêh Y-Gêdalia, kon bu klâu Y-Ahikam, nơm hađăch Babilôn hŏ ndâk jêh ƀư kôranh toyh chiă uănh bri dak.