Yêrêmi 40 - Nau Brah Ndu Ngơi 2023

Y-Yêrêmi jêng kon me

¹ Geh nau Brah Yêhôva lah ma Y-Yêrêmi jêh ma nau Y-Nêbusaradan kôranh chiă uănh toyh phung tahan gak mplơ̆ ăn kon me ma păng ta Rama. Rnôk Y-Nêbusaradan prơh joi Y-Yêrêmi pôri păng dôl bu nkông ndrel ma phung bu nă êng ƀon Yêrusalem jêh ri Yuđa dăch ma bu nhŭp djôt leo rlet ma Babilôn.

² Kôranh chiă uănh toyh phung tahan gak prơh kuăl Y-Yêrêmi tât jêh ri lah: “Yêhôva Brah Ndu khân may hŏ tâm nal ntrŭnh jêh nau mhĭk jŭr ta ntŭk aơ

³ jêh ri Brah Yêhôva hŏ ƀư jêh tĭng nau păng hŏ lah. Yorlah khân may ƀư tih tâm rdâng đah Brah Yêhôva jêh ri mâu tông bâr Păng ôh yor ri nau aơ hŏ geh tât jêh ăn ma khân may.

⁴ Aƀaơ gâp doh nkông bơh ta ti may. Tơlah may saơ nau hăn ndrel gâp tât ma bri Babilôn jêng ueh pôri hăn hom jêh ri gâp mra mât mray may. Tơlah may saơ nau hăn ndrel gâp ma bri Babilôn jêng mâu di pôri lơi ta hăn ôh. Aơ, lam bri dôl gŭ panăp măt may, moh ntŭk may mĭn jêng ueh jêh ri moh ntŭk hăn jêng di, ăn may hăn yơh.”

⁵ Yorlah Y-Yêrêmi ê hŏ plơ̆ sĭt ôh, yor ri Y-Nêbusaradan dăn lah đŏng: “May plơ̆ sĭt hom ma Y-Gêdalia, kon bu klâu Y-Ahikam, sau Y-Saphan, jêng bunuyh hađăch Babilôn njêng kôranh chiă uănh ma lĕ rngôch ƀon tâm n'gor bri Yuđa! May dơi lĕ gŭ ndrel ma nơm nây ta nklang phung ƀon lan may, mâu lah may hăn ta ntŭk may saơ di.” Kôranh chiă uănh toyh ma tahan phung gak ăn păng du kô̆ ndơ sông sa jêh ri ndơ nhhơr jêh ri ăn păng hăn.

⁶ Y-Yêrêmi hăn tât ta ntŭk Y-Gêdalia, kon bu klâu Y-Ahikam, ta ƀon Mispa, jêh ri gŭ rêh ndrel ma păng ta nklang phung ƀon lan hôm klen tâm n'gor.

Y-Gêdalia ƀư kôranh mât uănh n'gor Yuđa

⁷ Lah phung kôranh tahan jêh ri phung tahan hôm gŭ tâm ƀon jê̆ nơm tăng nau hađăch Babilôn hŏ ndâk Gêdalia, kon bu klâu Y-Ahikam, ƀư kôranh mât uănh tâm n'gor, jêh ri jao ma păng chiă uănh phung bu klâu, bu ur, kon se, jêng phung ndĭt trơi tâm n'gor, bu mâu veng leo ôh ƀư bu nă rlet ma bri Babilôn,

⁸ khân păng hăn mâp ma Y-Gêdalia ta ƀon Mispa. Phung kôranh tahan nây geh: Y-Ismaêl kon bu klâu Y-Nêthania, Y-Jôhanan jêh ri Y-Jônathan jêng phung kon bu klâu Y-Karêa, Y-Sêraya, kon bu klâu Y-Tanhumet, phung kon bu klâu Y-Êphai gŭ tâm ƀon Nêtôphat, jêh ri Y-Jêsanian, kon bu klâu bunuyh Makatit, ndrel ma phung tahan khân păng.

⁹ Y-Gêdalia, kon bu klâu Y-Ahikam, sau Y-Saphan, sơm ton ma khân păng jêh ri phung tahan khân păng: “Khân may lơi klach ôh pah kan ma phung kôranh Kaldê; gŭ hom tâm bri dak jêh ri pah kan ma hađăch Babilôn, ri mơ khân may mra geh nau đăp mpăn.

¹⁰ Bi gâp be, gâp mra gŭ ta ƀon Mispa gay tâm tang ma khân may vơt rom phung Kaldê dăch tât ta aơ jêh. Bi khân may, bun prăp hom ndrănh krăk ƀâu, kao play si yan vai, jêh ri dak ngi ôlive jêh nây prăp tâm lĕ yăng. Gŭ rêh hom tâm ƀon khân may hŏ pit in jêh.”

¹¹ Tâm ban pônây, lĕ rngôch phung Yuđa dôl gŭ tâm bri Môap jêh ri ta nklang phung kon sau Ammôn, tâm ntŭk bri Êđôm jêh ri tâm bri êng tăng hađăch Babilôn hŏ om du phung hôm gŭ tay tâm n'gor bri Yuđa, jêh ri hŏ ndâk jêh Y-Gêdalia, kon bu klâu Y-Ahikam, sau Y-Saphan, jêng kôranh mât uănh,

¹² pôri lĕ phung Yuđa nây tă bơh ăp ntŭk bu hŏ mprơh plơ̆ sĭt da dê ma n'gor bri Yuđa, tât ma Y-Gêdalia ta ƀon Mispa. Khân păng bun prăp âk ngăn ndrănh jêh ri kao play si yan vai.

¹³ Rnôk nây, Y-Jôhanan, kon bu klâu Y-Karêa, jêh ri lĕ rngôch phung kôranh phung tahan pit in nkual ƀon jê̆, văch joi ma Y-Gêdalia, ta ƀon Mispa, jêh ri lah:

¹⁴ “May gĭt lĕ Y-Balis, hađăch Amôn, hŏ prơh Y-Ismaêl, kon bu klâu Y-Nêthania, văch nkhĭt may?” Ƀiălah Y-Gêdalia, kon bu klâu Y-Ahikam, mâu iăt ôh nau khân păng mbơh.

¹⁵ Y-Jôhanan, kon bu klâu Y-Karêa, ngơi ma nau ndâp đah Y-Gêdalia ta ƀon Mispa: “Dăn may ăn ma gâp hăn nkhĭt lơi Y-Ismaêl, kon bu klâu Y-Nêthania, bu mâu mra gĭt ôh. Mâm ƀư ăn păng ngroh lơi nau rêh may, ƀư ăn ma lĕ rngôch phung Yuđa tâm rgum jŭm may mra nchah rai pru pra, jêh ri phung ƀon lan Yuđa hôm klen mra rai lôch?”

¹⁶ Ƀiălah Y-Gêdalia, kon bu klâu Y-Ahikam, lah ma Y-Jôhanan, kon bu klâu Y-Karêa, pô aơ: “Lơi may ƀư ôh nau nây! Nau may ngơi ma Y-Ismaêl mâu di ôh.”