Yêrêmi 39 - Nau Brah Ndu Ngơi 2023

Bu ƀư rai ƀon Yêrusalem

¹ Khay jât, năm rơh sĭn rnôk rô̆ Y-Sêdêkia, hađăch Yuđa, Y-Nêbukatnetsar, hađăch Babilôn, djôt leo ndrel ma phung tahan hăn văch tâm lơh jêh ri văr jŭm ƀon Yêrusalem.

² Ta nar sĭn khay puăn năm rơh jât ma nguay rnôk rô̆ Y-Sêdêkia, ƀon toyh bu lơh rai.

³ Lĕ rngôch phung kôranh toyh bri Babilôn tât da dê jêh ri gŭ ta mpông pêr tâm nklang. Nây jêng Y-Nergal-Sarêser, Y-Samgar-Nêbô, Y-Sarsêkim ƀư bôk kôranh bu char, Y-Nergal-Sarêser ƀư bôk kôranh sek uănh mănh, ndrel ma lĕ rngôch phung kôranh toyh phung ƀaƀă hađăch Babilôn.

⁴ Lah saơ khân păng, Y-Sêdêkia, hađăch Yuđa, jêh ri lĕ rngôch phung tahan du krap luh du tă ƀon toyh. Dôl măng, khân păng tĭng trong tâm n'gar kao hađăch, rgăn mpông pêr vah vang bar mpêr jêh ri hăn rlet mpeh ma Arabah.

⁵ Ƀiălah phung tahan Kaldê hăn tĭng jêh ri tĭng ban Y-Sêdêkia tâm neh lâng ƀon Yêrikô; khân păng nhŭp hađăch jêh ri njŭn ăn ma Y-Nêbukatnetsar, hađăch Babilôn, ta ƀon Ribla, tâm bri Hamat. Ta nây, hađăch Y-Nêbukatnetsar phat dôih hađăch Sêdêkia.

⁶ Hađăch Babilôn nkhĭt phung kon bu klâu Y-Sêdêkia tanăp măt hađăch nây ta ƀon Ribla; hađăch Babilôn đă nkhĭt đŏng lĕ rngôch phung kôranh Yuđa.

⁷ Hađăch nây rloch lơi măt Y-Sêdêkia, nkông ma rse rvăk kông gay njŭn leo ma bri Babilôn.

⁸ Phung Kaldê su ngih hađăch jêh ri ngih vâl phung ƀon lan, ƀư rai lơi mpêr ƀon toyh Yêrusalem.

Phung ƀon lan bu nhŭp ƀư bu nă

⁹ Kôranh phung tahan gak jêng Y-Nêbusaradan nhŭp lĕ rngôch phung ƀon lan hôm klen tâm ƀon, phung hŏ lăp, jêh ri phung ƀon lan hôm klen tâm ƀon nây, djôt leo njêng bu nă tâm bri Babilôn.

¹⁰ Bi phung ƀon lan o ach, mâu geh ôh drăp ndơn, pôri kôranh tahan gak Y-Nêbusaradan ăn khân păng gŭ tâm bri Yuđa, ndrel ƀơk ăn ma khân păng đang krăk ƀâu jêh ri mir.

¹¹ Y-Nêbukatnetsar, hađăch Babilôn, ntrŭnh nau ăn ma Y-Nêbusaradan kôranh phung tahan gak, ma nau Y-Yêrêmi, lah pô aơ:

¹² “Njŭn păng sĭt, mât mray ăn ueh. Lơi ta ƀư mhĭk ma păng ôh ƀiălah ƀư tĭng nau păng nơm ŭch.”

¹³ Y-Nêbusaradan kôranh phung tahan gak, Y-Neburaban kôranh uănh ngih hađăch, Y-Nergal-Sarêser kôranh nơm sek uănh mănh, jêh ri lĕ rngôch phung kôranh toyh hađăch Babilôn,

¹⁴ prơh bunuyh hăn njŭn Y-Yêrêmi luh bơh tâm nhuang phung tahan gak jêh nây jao păng ma Y-Gêdalia, kon bu klâu Y-Ahikam, sau Y-Saphan, njŭn păng sĭt tâm ngih. Y-Yêrêmi gŭ rêh ta nklang phung ƀon lan.

Nau ton ăn ma Y-Êbet-Mêlek

¹⁵ Dôl hôm bu krŭng tâm nhuang phung tahan gak, geh nau Brah Yêhôva lah ma Y-Yêrêmi kơt aơ:

¹⁶ “May mâp hom jêh ri lah ma Y-Êbet-Mêlek, bunuyh Êthiôpi, pô aơ: ‘Brah Yêhôva ma phung tahan, Brah Ndu Israel, lah: Aơ, Gâp dăch ƀư jêh nau Gâp lah ma ƀon aơ nây jêng nau mhĭk mâu di ăn nau ueh uĭn ôh. Tât nar nĕ, lĕ nau nây mra jêng nau nanê̆ tanăp măt may.’

¹⁷ Brah Yêhôva lah: ‘Ƀiălah tâm nar nây, Gâp mra rklaih may, may mâu mra jao tâm ti phung bunuyh ƀư ăn may klach ôh.

¹⁸ Yorlah nanê̆ ngăn Gâp mra rklaih may, may mâu mra khĭt tâm dâng mpiăt đao ôh. May mra mât mray nau rêh may nơm nâm bu dơi geh ndơ pit sŏk, yorlah may rnơm nsing jêh ma Gâp,’ Brah Yêhôva lah pônây.”