Yêrêmi 38 - Nau Brah Ndu Ngơi 2023

Bu nklăch Y-Yêrêmi tâm ntu jru

¹ Y-Sêphatia, kon bu klâu Y-Matan, Y-Gêdalia, kon bu klâu Y-Pashur, Y-Jukal, kon bu klâu Y-Sêlêmia, jêh ri Y-Pashur, kon bu klâu Y-Malkija, tăng da dê nau Y-Yêrêmi mbơh nkoch tanăp ma lĕ rngôch phung ƀon lan:

² “Brah Yêhôva lah: ‘Mbu nơm hôm gŭ tâm ƀon aơ mra khĭt ma tak đao, ma nau sa sât ji ngot, mâu lah ma nau ji tưp; ƀiălah mbu nơm luh jao săk păng nơm ma phung Kaldê mra dơi rêh; khân păng mra dơi rklaih nau rêh nâm bu geh drăp ndơ jêh ri mra rêh.’

³ Brah Yêhôva lah: ‘N'hêl nanê̆ bu mra jao ƀon aơ ma ti phung tahan hađăch Babilôn, hađăch nây mra pit in ƀon aơ.’”

⁴ Phung kôranh lah ma hađăch: “Ăn bu nkhĭt lơi bunuyh aơ, yorlah đơ nau păng ngơi ƀư rdja nuih n'hâm phung tahan hôm tâm ƀon aơ tâm ban ma lĕ rngôch phung ƀon lan. Bunuyh aơ mâu joi ôh nau ueh ma phung ƀon lan ƀiălah knŏng djôt leo ma nau rai yot dơm.”

⁵ Hađăch Sêdêkia sĭt lah: “Aơ, păng dôl gŭ tâm ti khân may. Hađăch mâu dơi ƀư nau tâm rdâng đah nau khân may ŭch mĭn ôh.”

⁶ Khân păng nhŭp ro Y-Yêrêmi jêh ri nklăch tâm ntu Y-Malkija kon bu klâu hađăch, tâm nhuang phung tahan gak. Khân păng nklăch ntrŭnh Y-Yêrêmi ma rse brăt. Tâm ntu mâu geh dak ôh, knŏng geh bŏk dơm; Y-Yêrêmi rhuh tâm bŏk nây.

Y-Êbet-Mêlek rklaih Y-Yêrêmi

⁷ Kôranh bu char Y-Êbet-Mêlek, bunuyh Êthiôpi, dôl gŭ tâm ngih hađăch tăng nau bu nklăch Y-Yêrêmi tâm ntu dak. Rnôk nây hađăch dôl gŭ ta Mpông Pêr Benjamin.

⁸ Y-Êbet-Mêlek luh tă bơh tâm ngih hađăch lah ma hađăch:

⁹ “Ơ kôranh gâp hađăch, phung bunuyh aơ hŏ ƀư jêh nau mhĭk ma nơm mbơh lor Y-Yêrêmi. Khân păng hŏ nklăch păng tâm ntu dak gay ma păng khĭt ji ngot tâm dâng nây, yorlah tâm ƀon mâu hôm geh piăng let đŏng ôh.”

¹⁰ Hađăch ntĭnh ro ma Y-Êbet-Mêlek, bunuyh Êthiôpi: “Sŏk hom pe jât nuyh bu klâu ma may bơh ntŭk aơ tât đŏt ngluh nơm mbơh lor Y-Yêrêmi luh bơh ntu dak, êlor ma păng khĭt.”

¹¹ Y-Êbet-Mêlek leo phung bunuyh nây ndrel ma păng jêh ri hăn lăp ma ngih hađăch, tât ta du ntŭk tâm dâng jay prăp ndô ndơ. Ta ntŭk nây păng sŏk bok sat jêh ri kho ao ơm, jêh nây ntrŭnh rse brăt ăn ma Y-Yêrêmi tâm ntu dak.

¹² Y-Êbet-Mêlek, bunuyh Êthiôpi, lah ma Y-Yêrêmi: “Ăn may săp ƀaƀă bok sat jêh ri kho ao ơm ta nklang păl vak jêh ri rse brăt.” Y-Yêrêmi ƀư di tâm ban pônây.

¹³ Khân păng đŏt huai Y-Yêrêmi ma rse brăt n'hao ngluh tă bơh ntu. Y-Yêrêmi gŭ tay tâm nhuang tahan gak.

Y-Sêdêkia ôp tay nau mĭn Y-Yêrêmi

¹⁴ Hađăch Sêdêkia prơh bunuyh hăn njŭn nơm mbơh lor Y-Yêrêmi mâp êng păng ta ntŭk mpông lăp tal pe tâm ngih Brah Yêhôva. Hađăch ngơi ma Y-Yêrêmi: “Gâp geh du ntil nau ŭch ôp may, lơi ta mo du ntil nau ôh.”

¹⁵ Y-Yêrêmi lah ro ma hađăch Y-Sêdêkia: “Tơlah gâp mbơh ăn may gĭt, mâu hĕ may nkhĭt gâp? Lah gâp mbơh êng ma may, n'hêl nanê̆ may mâu mra iăt lĕ nau gâp.”

¹⁶ Hađăch Sêdêkia ton săk ma nau ndâp ma Y-Yêrêmi pô aơ: “Tĭng nâm Brah Yêhôva gŭ rêh mro mrăng, jêng Nơm hŏ rhăk njêng jêh huêng he, gâp mâu mra nkhĭt may ôh, jêh ri mâu jao may ma ti phung joi ngroh lơi nau rêh may ôh.”

¹⁷ Y-Yêrêmi lah ma Y-Sêdêkia: “Yêhôva Brah Ndu ma phung tahan, Brah Ndu Israel lah pô aơ: ‘Tơlah may luh jao săk may nơm phung kôranh ma hađăch Babilôn pônây may mra dơi rêh, jêh ri ƀon aơ bu mâu mra su ôh ma ŭnh; may jêh ri phung tâm ngih may mra gŭ rêh.

¹⁸ Ƀiălah tơlah may mâu yơr ti ôh đah phung kôranh hađăch Babilôn, ƀon aơ bu mra jao ma ti phung Kaldê, khân păng mra su ƀon aơ ma ŭnh, jêh ri may mâu mra klaih ôh tă bơh ti khân păng.’”

¹⁹ Hađăch Sêdêkia lah ma Y-Yêrêmi: “Gâp klach lah gâp hŏ luh jao săk gâp nơm ma phung tahan Kaldê, phung Yuđa mra jao gâp ma ti khân păng jêh ri khân păng ƀư mhĭk ma gâp.”

²⁰ Y-Yêrêmi lah: “Bu mâu mra jao may ôh. Knŏng ŭch may tông tĭng bâr Brah Yêhôva moh nau gâp hŏ lah jêh ma may, pônây may mra dơi geh nau ueh jêh ri hôm dơi geh nau rêh.

²¹ Ƀiălah tơlah may mâu ŭch hăn ran nta săk ôh aơ jêng nau Brah Yêhôva mpơl ăn ma gâp:

²² ‘Aơ, lĕ rngôch phung bu ur hôm tâm ngih hađăch Yuđa bu mra veng leo ăn ma phung kôranh hađăch Babilôn; khân păng mra lah ma hađăch pô aơ: Phung mĭt jiăng may nsing Hŏ ndơm jêh may jêh ri dơi lơn đah may; Aƀaơ, lah jâng may hŏ rhuh jru jêh tâm bŏk, Pôri khân păng der ngai đah may.’

²³ Lĕ rngôch phung ur kon hađăch bu mra njŭn leo ăn ma phung Kaldê; bi ma hađăch ăt mâu mra klaih ôh bơh ti khân păng, ƀiălah hađăch Babilôn mra nhŭp jêh ri bu mra su ƀon aơ ma ŭnh.”

²⁴ Nôk aơ Y-Sêdêkia lah ma Y-Yêrêmi, “Lơi ta ăn bu gĭt nau ngơi aơ, may mâu mra khĭt ôh.

²⁵ Tơlah phung kôranh gĭt nau gâp hŏ ngơi jêh đah may pôri khân păng mra văch ôp ma may jêh ri lah: ‘Nkoch tay ăn ma hên moh nau may ngơi jêh đah hađăch tâm ban lĕ moh nau hađăch hŏ lah jêh đah may, lơi ta pôn mo du ntil ndơ ôh pônây mơ hên mâu mra nkhĭt may’;

²⁶ ăn may plơ̆ lah hom: ‘Gâp hŏ vơl dăn jêh ma hađăch lơi ta nhŭp ôh gâp plơ̆ sĭt ma ngih Y-Jônathan, klach lah gâp khĭt ta nây.’”

²⁷ N'hêl nanê̆ ngăn, lĕ rngôch phung kôranh joi mâp ma Y-Yêrêmi jêh ri ôp Y-Yêrêmi. Păng sŏk tĭng nâm nau hađăch hŏ ntăm jêh plơ̆ lah ma phung kôranh. Khân păng mâu hôm ôp păng đŏng ôh, yorlah bu mâu gĭt ôh nau nây.

²⁸ Pônây, Y-Yêrêmi hôm gŭ tâm nhuang tahan gak kŏ tât nar bu lơh sŏk ƀon Yêrusalem. Lah ƀon Yêrusalem lĕ rai...