Yêrêmi 37 - Nau Brah Ndu Ngơi 2023

Nau kâp gân Y-Sêdêkia mâu geh nau ngăn

¹ Y-Sêdêkia, kon bu klâu Y-Jôsia, nơm Y-Nêbukatnetsar hađăch Babilôn ntăm ƀư jêng hađăch n'gor Yuđa ntrok an ma Y-Jêhôjakin, kon bu klâu Y-Jêhôjakim.

² Ƀiălah nđâp ma hađăch ndrel ma phung oh mon jêh ri phung ƀon lan tâm bri dak mâu iăt da dê nau Brah Yêhôva lah bơh bâr mbung nơm mbơh lor Y-Yêrêmi.

³ Hađăch Sêdêkia prơh hăn Y-Jêhukal, kon bu klâu Y-Sêlêmia, jêh ri kôranh ƀư brah Y-Sêphania, kon bu klâu kôranh ƀư brah Y-Maseya, hăn tât ngơi ma nơm mbơh lor Y-Yêrêmi: “Yor phung hên dăn may mbơh sơm ma Yêhôva Brah Ndu he.”

⁴ Rnôk nây, Y-Yêrêmi hôm dôl hăn nsong tâm nklang phung ƀon lan, ê hŏ nhŭp krŭng ôh.

⁵ Tâm nôk dôl nchueng jŭm ƀon Yêrusalem, phung tahan Kaldê tăng nau mbơh phung tahan Pharaôn hŏ luh jêh tă bri Êjipt, yor ri khân păng rŭch plơ̆ bơh Yêrusalem.

⁶ Nôk nây, geh nau Brah Yêhôva lah ma nơm mbơh lor Y-Yêrêmi:

⁷ “Yêhôva Brah Ndu Israel lah: ‘Khân may lah tay ma hađăch Yuđa, nơm hŏ prơh khân may hăn ôp ma Gâp, pô aơ: Aơ, phung tahan Pharaôn hŏ văch gay kơl khân may mra plơ̆ sĭt rlet bri dak khân păng jêng Êjipt.

⁸ Phung tahan Kaldê mra plơ̆ văch tay tâm lơh đah ƀon aơ. Khân păng mra pit in jêh ri su ma ŭnh ƀon aơ.’”

⁹ Brah Yêhôva lah: “Khân may lơi ta ndơm khân may nơm pô aơ: ‘N'hêl nanê̆ phung Kaldê mra rŭch luh bơh he,’ yorlah khân păng mâu mra plơ̆ rŭch ntŭk êng ôh.

¹⁰ Nđâp lah phung khân may dơi lơh lĕ rngôch phung tahan Kaldê lah khân păng tâm lơh đah khân may kŏ tât tâm ngih bok khân păng knŏng hôm e phung sôt rmanh, pôri ăp nơm ăt dâk su ƀon aơ ma ŭnh.”

Bu krŭng Y-Yêrêmi

¹¹ Jêh phung tahan Kaldê du jêh bơh Yêrusalem yorlah phung tahan Pharaôn dôl văch lơh,

¹² pôri Y-Yêrêmi du luh bơh Yêrusalem, hăn tât ma bri Benjamin gay păng sŏk dơn ma drăp ndơn ta nklang phung ƀon lan nây.

¹³ Ƀiălah dôl kôranh mbơh lor Y-Yêrêmi tât ta mpông pêr Benjamin geh du huê tahan gak amoh păng Y-Irijah, kon bu klâu Y-Sêlêmia, sau Y-Hanania hŏ nhŭp păng jêh ri lah: “May jêng nơm nchuăt du hăn gŭ mpeh phung tahan Kaldê!”

¹⁴ Y-Yêrêmi plơ̆ lah: “Ngơi nklă! Gâp mâu geh nchuăt tĭng phung tahan Kaldê ôh.” Ƀiălah Y-Irijah mâu ŭch iăt ôh, nhŭp nchâp Y-Yêrêmi jêh ri têk leo ăn ma phung kôranh.

¹⁵ Phung kôranh hao ji nuih ma Y-Yêrêmi; khân păng dong jêh ri krŭng păng tâm ngih kôranh nchih samƀŭt Y-Jônathan; yorlah khân păng hŏ njêng jêh ngih nây jêng ngih ndrung.

¹⁶ Pônây Y-Yêrêmi bu krŭng tâm ndrung, krŭng tâm ntu ngo, jêh ri bu ăn gŭ ta nây jŏ nar.

¹⁷ Jêh nây, Hađăch Sêdêkia prơh hăn njŭn leo Y-Yêrêmi sĭt ma ngih hađăch jêh ri ôp păng ma nau ndâp: “Geh lĕ nau Brah Yêhôva lah?” Y-Yêrêmi plơ̆ lah: “Geh lĕ!” Jêh nây păng lah tay: “Bu mra jao may tâm ti hađăch Babilôn.”

¹⁸ Y-Yêrêmi ôp đŏng ma Hađăch Sêdêkia: “Moh ndơ gâp hŏ ƀư nau mâu di đah may, ma phung oh mon may mâu lah ma phung ƀon lan aơ, tât may nhŭp krŭng gâp?

¹⁹ Phung mbơh lor may hŏ ngơi mbơh lor jêh pô aơ: ‘Hađăch Babilôn mâu mra tât văch lơh đah khân may mâu lah lơh ma bri aơ ôh,’ aƀaơ ta ntŭk khân păng gŭ?

²⁰ Rnôk aơ, Ơ hađăch jêng kôranh gâp dăn maak nuih n'hâm rkêng tôr iăt jêh ri sŏk dơn nau gâp vơl dăn. Lơi ta mplơ̆ sĭt tay gâp ma ngih kôranh nchih samƀŭt Y-Jônathan, klach lah gâp mra khĭt ta nây.”

²¹ Hađăch Sêdêkia ntĭnh njŭn leo Y-Yêrêmi tâm nhuang phung tahan gak, ăp nar ăn du glo piăng let tă bơh phung ƀư piăng let, kŏ tât ƀon nây mâu hôm geh piăng let đŏng ôh. Yor nây, Y-Yêrêmi hôm gŭ tâm nhuang tahan gak.