Yêrêmi 36 - Nau Brah Ndu Ngơi 2023

Y-Jêhôjakim su ndrom samƀŭt Y-Yêrêmi

¹ Tâm năm rơh puăn rô̆ Y-Jêhôjakim, kon bu klâu Y-Jôsia, hađăch Yuđa, geh nau Brah Yêhôva lah ma Y-Yêrêmi:

² “May sŏk hom du ndrom samƀŭt jêh ri nchih ta nây lĕ rngôch nau Gâp hŏ lah jêh đah may ma phung Israel, phung Yuđa, jêh ri ma lĕ rngôch bri dak, ntơm bơh nar Gâp lah jêh ma may bơh rnôk Y-Jôsia kŏ tât nar aơ.

³ Klăp lah phung Yuđa mra gĭt lĕ rngôch nau mhĭk Gâp mĭn jêh ŭch ƀư ma khân păng, khân păng plơ̆ sĭt tay, ăp nơm chalơi trong mhĭk păng, jêh ri Gâp yô̆ an nau djơh mhĭk jêh ri nau tih khân păng.”

⁴ Y-Yêrêmi kuăl Y-Baruk, kon bu klâu Y-Nêria, tât. Yêrêmi rŏ ăn ma Y-Baruk nchih ta ndrom samƀŭt lĕ rngôch nau Brah Yêhôva lah jêh ma păng.

⁵ Y-Yêrêmi ntĭnh ma Y-Baruk: “Gâp bu buay, mâu dơi lăp tâm ngih Brah Yêhôva ôh.

⁶ Yor nây ta nar ver ât sông sa, ăn may lăp ta ngih Brah Yêhôva jêh ri rŏ ăn ma phung ƀon lan tăng nau Brah Yêhôva tâm ndrom samƀŭt gâp hŏ rŏ ăn may nchih jêh. Tâm ban lĕ may răk ăn lĕ rngôch phung Yuđa văch tă bơh ma lĕ ƀon iăt đŏng.

⁷ Klăp lah khân păng mra plơ̆ tay vơh vơl ma Brah Yêhôva jêh ri chalơi trong mhĭk păng, yorlah nau nuih jêh ri hao nuih Brah Yêhôva hŏ mbơh jêh tâm rdâng đah ƀon lan aơ jêng krit toyh ngăn.”

⁸ Y-Baruk, kon bu klâu Y-Nêria, ƀư lĕ rngôch nau kôranh nơm mbơh lor Y-Yêrêmi hŏ nti jêh, rŏ nau Brah Yêhôva tâm ndrom samƀŭt tâm ngih Brah Yêhôva.

⁹ Tâm khay sĭn, năm rơh prăm rô̆ Y-Jêhôjakim, kon bu klâu Y-Jôsia, hađăch Yuđa, lĕ rngôch phung ƀon lan tâm ƀon Yêrusalem jêh ri lĕ rngôch phung ƀon lan văch tă bơh lĕ ƀon tâm n'gor Yuđa hăn tât ma ƀon Yêrusalem, mbơh tâm năng ver ât sông sa tanăp Brah Yêhôva.

¹⁰ Tâm ngih Brah Yêhôva, tâm jrô Y-Gêmaria, kon bu klâu kôranh nchih samƀŭt Y-Saphan, jêng jrô ta klơ nhuang kêng Mpông Pêr Mhe tâm ngih Brah Yêhôva, Baruk rŏ ăn ma lĕ rngôch ƀon lan tăng lĕ rngôch nau Y-Yêrêmi tă bơh tâm ndrom samƀŭt.

¹¹ Lah Y-Mika, kon bu klâu Y-Gêmaria, sau Y-Saphan, tăng jêh răk lĕ rngôch nau Brah Yêhôva ngơi bơh tâm ndrom samƀŭt,

¹² hăn ro trŭnh rlet ma ngih hađăch, lăp tâm jrô kôranh nchih samƀŭt. Lĕ rngôch phung kôranh rgum ta nây: Kôranh nchih samƀŭt Y-Êlisama, Y-Dêlaya kon bu klâu Y-Sêmaya, Y-Êlnathan kon bu klâu Y-Akbôr, Y-Gêmaria kon bu klâu Y-Saphan, Y-Sêdêkia kon bu klâu Y-Hanania, jêh ri lĕ rngôch phung kôranh.

¹³ Y-Mika nkoch ăn ma khân păng lĕ rngôch nau păng hŏ tăng jêh nôk Y-Baruk rŏ ndrom samƀŭt ăn phung ƀon lan iăt.

¹⁴ Rnôk nây, phung kôranh prơh Y-Jêhudi, kon bu klâu Y-Nêthania sau Y-Sêlêmia, se Y-Kusi, hăn mâp Y-Baruk, jêh ri ngơi: “Djôt hom tât ta aơ ndrom samƀŭt may rŏ jêh ăn phung ƀon lan iăt.” Y-Baruk, kon bu klâu Y-Nêria, djôt ndrom samƀŭt tâm ti jêh ri hăn mâp ma khân păng.

¹⁵ Khân păng lah ma păng; “Gŭ hom jêh ri rŏ ăn hên iăt.” Y-Baruk rŏ ăn ma khân păng iăt.

¹⁶ Ƀiălah, tăng jêh lĕ rngôch nau ngơi, khân păng klach tâm rle uănh ndrăng nơm jêh nây lah ma Y-Baruk; “Hên mra mbơh ma hađăch lĕ nau ngơi aơ.”

¹⁷ Jêh nây khân păng ôp ma Y-Baruk: “Mbơh ăn ma hên gĭt mâm may dơi nchih lĕ rngôch nau ngơi aơ? Di lĕ nơm nây rŏ an ma may?”

¹⁸ Y-Baruk sĭt lah: “Păng rŏ an ma gâp nau ngơi aơ, jêh ri gâp dŏng dak ôch nchih ta ndrom samƀŭt ntâu.”

¹⁹ Phung kôranh lah ma Y-Baruk, “May jêh ri Y-Yêrêmi, du krap hom lơi ăn du huê bunuyh gĭt ôh ta ntŭk khân may gŭ.”

²⁰ Phung kôranh dơm ndrom samƀŭt ntâu tâm jrô kôranh nchih samƀŭt Y-Êlisama, jêh nây khân păng lăp mâp hađăch tâm nhuang ngih jêh ri nkoch ăn ma hađăch lĕ rngôch nau kan.

²¹ Hađăch prơh Y-Jêhudi njŭn ndrom samƀŭt tât, Y-Jêhudi sŏk ndrom samƀŭt tă bơh jrô kôranh nchih samƀŭt Y-Êlisama jêh ri rŏ ăn hađăch ndrel ma lĕ rngôch phung kôranh gŭ êp hađăch tăng.

²² Rnôk nây jêng khay sĭn, hađăch dôl gŭ tâm ngih păng tâm yan sĭt puh, panăp măt păng geh năk ŭnh dôl hit.

²³ Ăp tơ̆ Y-Jêhudi rŏ geh pe puăn kô̆ tâm ndrom samƀŭt, hađăch sŏk pêh tor samƀŭt koh lơi jêh ri klŭp mƀăr tâm năk ŭnh, kŏ tât ŭnh sa lĕ ndrom samƀŭt tâm ŭnh năk.

²⁴ Hađăch nđâp ma phung tĭng ndô̆ păng hŏ tăng lĕ rngôch jêh nau nây, ƀiălah mâu du huê klach ôh mâu lah nkhêk bok ao khân păng nơm.

²⁵ Nđâp lah Y-Êlnathan, Y-Dêlaya jêh ri Y-Gêmaria dăn ma hađăch lơi su ôh ndrom samƀŭt nây, ƀiălah păng mâu ŭch iăt ôh.

²⁶ Hađăch ntrŭnh ăn ma Y-Jêrahmel, kon bu klâu Y-Hammêlek, ăn ma Y-Sêraya, kon bu klâu Y-Asriêl, jêh ri Y-Sêlêmia, kon bu klâu Y-Apdel, hăn nhŭp kôranh nchih samƀŭt Y-Baruk jêh ri nơm mbơh lor Y-Yêrêmi; ƀiălah Brah Yêhôva pôn bar hê nây.

Y-Yêrêmi phat dôih ma hađăch Jêhôjakim

²⁷ Jêh hađăch su lơi ndrom samƀŭt ntâu nây geh nau ngơi Y-Baruk hŏ nchih tay tĭng nau rŏ bơh mbung Y-Yêrêmi, geh nau Brah Yêhôva lah ma Y-Yêrêmi kơt aơ:

²⁸ “May sŏk hom du ndrom samƀŭt ntâu êng jêh ri nchih tay lĕ rngôch nau ngơi hŏ nchih jêh tâm ndrom samƀŭt saơm Y-Jêhôjakim, hađăch Yuđa, hŏ su jêh.

²⁹ Bi ma Y-Jêhôjakim, hađăch Yuđa, ăn may lah: Brah Yêhôva lah: ‘May lĕ su lơi jêh ndrom samƀŭt ntâu nây jêh ri lah: Mâm ƀư may nănh nchih pô aơ hađăch Babilôn mra văch tât nanê̆ ngăn ƀư rai bri aơ jêh ri mra ƀư rai lĕ rngôch bunuyh nđâp mpô mpa rong?’

³⁰ Yor nau nây, Brah Yêhôva lah ma Y-Jêhôjakim, hađăch Yuđa pô aơ: ‘Păng mâu mra geh du huê nơm gŭ ta sưng hađăch Đavit; săk jăn păng bu mra pla lơi tâm nklang duh dôl nar, jêh ri ăn bĕ dak ngom tâm dôl măng.

³¹ Gâp mra tâm rmal păng, noi deh păng, jêh ri phung kôranh păng, yor nau mhĭk khân păng. Gâp mra ăn tât ma khân păng, jêh ri ma phung gŭ tâm ƀon Yêrusalem jêh ri phung Yuđa, lĕ rngôch nau mhĭk tât Gâp hŏ mbơh jêh ma khân păng ƀiălah khân păng mâu ŭch iăt ôh.’”

³² Y-Yêrêmi sŏk đŏng du ndrom samƀŭt ntâu êng ăn ma kôranh nchih samƀŭt Y-Baruk, kon bu klâu Y-Nêria. Păng nchih tay tĭng lĕ rngôch nau bơh mbung Y-Yêrêmi hŏ geh nchih jêh nau ngơi tâm ndrom samƀŭt ntâu Y-Jêhôjakim, hađăch Yuđa, hŏ su jêh tâm ŭnh. Păng kơi ntop âk nau ngơi ƀoi nĕ.