Yêrêmi 35 - Nau Brah Ndu Ngơi 2023

Leo trong phung Rêkap răp jăp

¹ Lăp tâm rô̆ Y-Jêhôjakim, kon bu klâu Y-Jôsia, hađăch n'gor Yuđa, geh nau ngơi tă bơh Brah Yêhôva lah ma Y-Yêrêmi pô aơ:

² “May hăn mâp hom jêh ri tâm ngơi đah ngih phung Rêkap, jă khân păng tât ma ngih Brah Yêhôva, njŭn khân păng lăp tâm du mlâm jrô êng jêh ri ăn khân păng nhêt ndrănh.”

³ Yor nây Gâp leo Y-Jasania, kon bu klâu Y-Yêrêmi, sau Y-Habasinia, phung oh nâu păng, lĕ rngôch phung kon bu klâu păng, jêh ri lĕ ngih Rêkap

⁴ lăp tâm Brah ngih Yêhôva. Gâp njŭn leo khân păng lăp tâm jrô phung kon bu klâu Y-Hanan, kon bu klâu Y-Igdalia, bunuyh Brah Ndu, gŭ êp jrô phung kôranh, ta klơ jrô Y-Maseya, kon bu klâu Y-Salum, jêng nơm chiă njrăng mpông.

⁵ Gâp ndrăp lĕ yăng bêng ma dak ndrănh jêh ri kachok tanăp măt kon sau ngih phung Rêkap, jêh ri lah ma khân păng: “Nhêt hom ndrănh gâp aơ!”

⁶ Ƀiălah khân păng plơ̆ lah: “Hên mâu mra nhêt ôh ndrănh, yorlah chô yau hên jêng Y-Jêhônadap, kon bu klâu Y-Rêkap hŏ ntĭnh jêh ma hên pô aơ: ‘Khân may jêh ri kon sau khân may lơi ta nhêt ôh ndrănh,

⁷ ăt mâu lĕ ndâk ngih, lơi ta srih ntil, lơi ta tăm mâu lah rvăt đang krăk ƀâu, ƀiălah ăn khân may gŭ tâm vâl bok lĕ nar khân may gŭ rêh gay ma khân may gŭ rêh jŏ nar tâm bri khân may gŭ njơh ƀât lât.’

⁸ Hên tông lĕ bâr Y-Jêhônadap, kon bu klâu Rêkap, chô yau hên ntĭnh jêh ma hên. Tâm lĕ nar hên gŭ rêh, ur, kon bu klâu, kon bu ur hên mâu nhêt ndrănh da dê.

⁹ Hên mâu dơi ndâk ngih gay ma gŭ, mâu geh đang krăk ƀâu, mâu lah mir, jêh ri ntil găr,

¹⁰ ƀiălah ăn hên gŭ tâm vâl bok. Hên hŏ tông bâr jêh ri tĭng ƀư lĕ ntil chô yau hên jêng Y-Jêhônadap ntĭnh nti jêh.

¹¹ Ƀiălah rnôk Y-Nêbukatnetsar, hađăch Babilôn, văch lơh bri dak aơ, hên tâm lah ndrăng nơm: ‘Kay lŏng he hăn hao Yêrusalem gay der ma phung tahan Kaldê jêh ri phung tahan Siri.’ Yor nây, hên gŭ tâm ƀon Yêrusalem.”

¹² Rnôk nây geh nau Brah Yêhôva lah ma Y-Yêrêmi:

¹³ “Brah Yêhôva ma phung tahan, Brah Ndu Israel, lah: Hăn ngơi hom ma phung Yuđa jêh ri phung gŭ ta ƀon Yêrusalem pô aơ: Brah Yêhôva lah: ‘khân may mâu sŏk dơn nau nkah nti, jêh ri mâu iăt hĕ nau Gâp ngơi?

¹⁴ Nau Y-Jêhônadap, kon bu klâu Y-Rêkap, ntĭnh ma phung kon sau păng mâu dơi nhêt ôh ndrănh, khân păng hŏ iăt jêh nau, kŏ tât nar aơ khân păng mâu nhêt ôh ndrănh yorlah hŏ tông jêh nau chô yau khân păng ntăm. Bi Gâp, Gâp lah ƀaƀơ ma khân may ƀiălah khân may mâu iăt ôh nau Gâp.

¹⁵ Gâp ƀaƀơ prơh hăn jêh lĕ rngôch phung oh mon Gâp, jêng phung nơm mbơh lor, hăn tât lah ma khân may: “Ăp nơm tâm khân may mra chalơi trong mhĭk jêh ri tâm rgâl nau khân may ƀư. Lơi ta tĭng ôh gay pah kan ma lĕ brah êng, ri mơ khân may mra gŭ tâm bri Gâp hŏ ăn jêh ma khân may jêh ri ma phung chô yau khân may.” Ƀiălah khân may mâu mâp rkêng tôr, jêh ri mâu iăt ôh nau Gâp.

¹⁶ Phung kon sau Y-Jêhônadap, kon bu klâu Y-Rêkap, hŏ djôt prăp jêh nau phung chô yau khân păng ntăm, ƀiălah phung ƀon lan aơ mâu tông ôh nau Gâp.’

¹⁷ Yor nây, Yêhôva Brah Ndu ma phung tahan, Brah Ndu Israel lah: ‘Aơ, Gâp ăn tât ma phung Yuđa jêh ri lĕ rngôch phung gŭ tâm ƀon Yêrusalem lĕ rngôch nau mhĭk djơh Gâp hŏ mbơh lor jêh ăn ma khân păng, yorlah Gâp ngơi khân păng mâu iăt, Gâp kuăl khân păng mâu plơ̆ lah ôh.’”

¹⁸ Bi ma ngih phung Rêkap, Y-Yêrêmi lah: “Brah Yêhôva ma phung tahan, Brah Ndu Israel, lah: ‘Yorlah khân may hŏ tông jêh nau phung chô yau khân may ntăm jêng Y-Jêhônadap, djôt prăp lĕ rngôch nau vay păng, jêh ri ƀư tĭng lĕ rngôch nau păng ntăm ma khân may.’

¹⁹ Yor nây, Brah Yêhôva ma phung tahan, Brah Ndu Israel, lah pô aơ: ‘Y-Jêhônadap, kon bu klâu Y-Rêkap, mâu mra pưt ôh du huê bunuyh dâk panăp Gâp.’”