Yêrêmi 34 - Nau Brah Ndu Ngơi 2023

Mbơh lor nau tât ma Sêdêkia

¹ Aơ jêng nau Brah Yêhôva lah ma Y-Yêrêmi rnôk Y-Nêbukatnetsar, hađăch Babilôn, ndrel ma lĕ rngôch phung tahan hađăch nây, lĕ rngôch bri hađăch ta neh ntu jêh ri lĕ rngôch ndŭl mpôl gŭ tâm dâng nau dơi chiă uănh hađăch nây, tâm lơh đah ƀon Yêrusalem jêh ri ƀon văr jŭm.

² Yêhôva, Brah Ndu Israel, lah: “May hăn ngơi hom ma Y-Sêdêkia, hađăch Yuđa, pô aơ Brah Yêhôva lah: ‘Aơ, Gâp jao ƀon aơ tâm ti hađăch Babilôn, hađăch nây mra su ƀon ma ŭnh.

³ May nơm mâu mra klaih tă bơh hađăch nây, ƀiălah bu mra nhŭp jêh ri jao tâm ti hađăch nây. May mra saơ ma măt hađăch Babilôn, tâm ngơi măt đah măt ma hađăch nây jêh ri may mra hăn ma bri Babilôn.’

⁴ Nđâp lah kơt nĕ, hơi Y-Sêdêkia, hađăch Yuđa, iăt hom nau Yêhôva! Brah Yêhôva lah ma hađăch kơt aơ: ‘May mâu mra khĭt yor ma đao ôh,

⁵ ƀiălah mra khĭt tâm nau đăp mpăn. Bu mra su ndơ ƀâu ăn ma may nâm bu hŏ su ăn ma phung chô yau may, jêng phung hađăch lor ma may jêh ri bu nhĭm vơl klâng may: “Vư, hơi kôranh ơi!” Gâp nơm yơh ngơi nau aơ, Brah Yêhôva lah pônây.’”

⁶ Nơm mbơh lor Y-Yêrêmi ngơi lĕ nau nây ma Y-Sêdêkia, hađăch Yuđa, tâm ƀon Yêrusalem,

⁷ tâm rnôk phung tahan hađăch Babilôn dôl hăn tâm lơh đah ƀon Yêrusalem jêh ri ma lĕ rngôch ƀon hôm e tâm n'gor Yuđa, nây jêng ƀon Lakis jêh ri Asêka; yorlah lĕ ƀon tâm n'gor Yuđa knŏng hôm klen bar rplay ƀon nâp aơ.

⁸ Jêh hađăch Sêdêkia ƀư jêh du nau tâm rnglăp đah lĕ rngôch phung ƀon lan ta ntŭk Yêrusalem, mbơh nau kon me ăn ma khân păng pôri geh nau Brah Yêhôva lah ma Y-Yêrêmi:

⁹ “Ăn lĕ rngôch bunuyh mƀơk phung dĭk Hêbrơ, phung bu klâu nđâp ma bu ur, mâu geh nơm dơi kân bunuyh n'gor Yuđa, oh nâu păng, ƀư dĭk đŏng ôh.

¹⁰ Lĕ rngôch phung kôranh jêh ri phung ƀon lan dơi râng da dê ma nau tâm rnglăp nây, ăp nơm mra mƀơk lơi phung dĭk păng, bu klâu tâm ban ma bu ur, mâu dơi kân gay ƀư dĭk đŏng ôh.” Khân păng hŏ iăt nau jêh ri mƀơk ma lĕ khân păng.

¹¹ Ƀiălah pa kơh nây khân păng tâm rgâl nau mĭn, nhŭp tay phung bu klâu jêh ri bu ur dĭk khân păng hŏ ăn jêng kon me sĭt ƀư dĭk nâm bu saơm.

¹² Jêh nau nây, geh nau Brah Yêhôva lah ma Y-Yêrêmi:

¹³ “Brah Yêhôva, Brah Ndu Israel lah: Dôl njŭn leo phung chô yau khân may du luh tă n'gor bri Êjipt, rklaih tă bơh ngih dĭk, Gâp hŏ ƀư jêh nau tâm rnglăp đah khân păng pô aơ:

¹⁴ ‘Tât năm tal pơh, ăn ăp nơm tâm lĕ khân may mplơ̆ ăn kon me ma bunuyh Hêbrơ hŏ bu tăch jêh ma may. Pakơi prao năm pah kan, may mra mplơ̆ ăn kon me ma bunuyh nây.’ Ƀiălah phung chô yau khân may mâu iăt ôh nau, mâu lĕ rkêng tôr iăt ma Gâp.

¹⁵ Aƀaơ aơ, khân may hŏ plơ̆ tay jêh ri ƀư nau di tâm dâng măt Gâp, lah mbơh nau kon me ăn ma nơm chiau meng păng. Khân may hŏ ƀư nau tâm rnglăp tanăp măt Gâp, tâm ngih dơi ntơ ma amoh Gâp.

¹⁶ Ƀiălah khân may hŏ plĕch nau mĭn jêh ri ƀư mhĭk amoh Gâp. Khân may plơ̆ nhŭp tay phung dĭk, bu klâu tâm ban ma bu ur, khân may lĕ ăn kon me jêh tĭng nâm khân păng ŭch, nchâp khân păng plơ̆ tay ƀư dĭk ma khân may tâm ban saơm.

¹⁷ Yor nây, Brah Yêhôva lah: pô aơ: ‘Khân may mâu tông ôh bâr Gâp, mâu geh du huê mbơh ôh nau kon me ma oh nâu jêh ri nơm chiau meng păng.’ Brah Yêhôva lah: ‘Aơ, Gâp mbơh “nau kon me” ma khân may, nâm bu ntĭt jao khân may mâp ma tak đao, nau ji tưp, sa sât ji ngot, mra ƀư ma khân may plơ̆ jêng tâm rmot ma lĕ rngôch bri hađăch ta neh ntu.

¹⁸ Mbu nơm hŏ ƀư tih đah nau tâm rnglăp Gâp, mâu djôt prăp ôh lĕ nau vay tâm nkol tâm rnglăp hŏ ƀư jêh tanăp Gâp, pôri Gâp mra ƀư ăn ma khân păng nâm bu ndrôk kon khân păng sreh ta n'gul jêh ri hăn rgăn ta vah vang nây.

¹⁹ Nanê̆ ngăn, phung kôranh Yuđa jêh ri Yêrusalem, phung kôranh bu char, phung kôranh ƀư brah, jêh ri lĕ rngôch phung ƀon lan gŭ tâm n'gor hŏ hăn rgăn jêh ta vah vang bar gâl ndrôk kon.

²⁰ Gâp mra jao khân păng tâm ti phung rlăng jêh ri phung ŭch ngroh lơi nau rêh khân păng. Săk jăn khĭt khân păng mra ƀư ndơ sa ăn ma sĭm klơ trôk sa jêh ri ma mpô mpa bri ta klơ neh.

²¹ Ăt Gâp mra jao Y-Sêdêkia hađăch Yuđa, jêh ri phung kôranh hađăch nây tâm ti phung rlăng jêh ri nơm ŭch ƀư mhĭk nau rêh khân păng, nây jêng ma ti phung tahan hađăch Babilôn jêng phung mhe du bơh khân may.’

²² Brah Yêhôva lah: ‘Aơ, Gâp mra ntĭnh ăn ma khân păng plơ̆ tay ma ƀon aơ; khân păng mra lơh, mra pit in, jêh ri sŏk ŭnh su ƀon nây. Gâp mra ƀư lĕ rngôch ƀon n'gor Yuđa mra jêng rngot njăp, mâu geh ƀon lan gŭ ôh.’”