Yêrêmi 32 - Nau Brah Ndu Ngơi 2023

Yêrêmi rvăt du lôk mir

¹ Tâm năm rơh jât hađăch Sêdêkia bri Yuđa, jêng năm rơh jât ma pham hađăch Nêbukatnetsar, geh nau Brah Yêhôva lah ma Y-Yêrêmi.

² Tâm rnôk nĕ, phung tahan hađăch Babilôn gŭ nchueng lơh ƀon Yêrusalem, bi ma nơm mbơh lor Y-Yêrêmi dôl bu krŭng tâm nhuang ngih phung tahan gak tâm ngih hađăch Yuđa.

³ Y-Sêdêkia, hađăch Yuđa, hŏ krŭng jêh păng jêh ri lah: “Moh nau may nănh mbơh lor jêng Brah Yêhôva lah: ‘Aơ, Gâp mra jao ƀon toyh aơ tâm ti hađăch Babilôn jêh ri hađăch nây mra dơi pit in ƀon;

⁴ Y-Sêdêkia, hađăch Yuđa, mâu mra klaih ôh bơh ti phung Kaldê, ƀiălah bu mra jao păng tâm ti hađăch Babilôn. Y-Sêdêkia saơ đăp măt jêh ri tâm ngơi mbung đah mbung măt đah măt ma hađăch Babilôn nây.

⁵ Y-Sêdêkia bu mra leo nsĭt rlet Babilôn păng mra gŭ ta nây kŏ tât Gâp chop khâl păng; nđâp lah khân may tâm rdâng đah phung Kaldê mâu mra dơi ôh.’ Brah Yêhôva lah pônây?”

⁶ Y-Yêrêmi lah; “Geh nau Brah Yêhôva ngơi ma gâp pô aơ:

⁷ Aơ Y-Hanamel, kon bu klâu Y-Salum kônh may, mra mâp may jêh ri lah: ‘May rvăt hom mir gâp ta ƀon Anathôt, yorlah may dơi geh nau chuai gay ma rvăt mir nây.’

⁸ Y-Hanamel, kon bu klâu kônh gâp, tông bâr Brah Yêhôva văch ma gâp tâm nhuang ntŭk phung tahan gak, jêh ri lah: ‘Gâp dăn ma may rvăt tay mir gâp ta ƀon Anathôt, tâm bri Benjamin, yorlah may geh nau dơi chuai jêh ri dơi jêng tâm mir nây; dăn may rvăt ăn ma may nơm.’ Rnôk nây, gâp gĭt nau nây jêng nau Brah Yêhôva ngơi!

⁹ Pônây gâp rvăt mir ta ƀon Anathôt bơh Y-Hanamel, kon bu klâu kônh gâp, jêh ri gâp hŏ veh ăn păng bơi ma bar rhiăng gram prăk.

¹⁰ Gâp nchih samƀŭt nau nkol, tâp pŏng păng, jă bunuyh mbơh gĭt nanê̆ jêh nây veh prăk ta klơ njing.

¹¹ Gâp sŏk samƀŭt tăch, geh samƀŭt kơt nchih tâp pŏng ndrel nau nkol jêh ri nau vay dăp, jêh ri samƀŭt nchih kơt mâu geh tâp pŏng

¹² jêh ri ăn ma Y-Baruk, kon bu klâu Y-Nêria, sau Y-Mahseya, tanăp Y-Hanamel, kon bu klâu kônh gâp, tanăp bunuyh mbơh gĭt nanê̆ phung nây hŏ nchih kach jêh amoh ta samƀŭt rvăt, tâm ban tanăp lĕ rngôch phung Yuđa dôl gŭ tâm nhuang ntŭk phung tahan gak.

¹³ Tanăp măt khân păng, gâp ntĭnh ma Y-Baruk pô aơ:

¹⁴ Brah Yêhôva ma phung tahan, Brah Ndu Israel, lah: ‘Sŏk hom samƀŭt rvăt aơ, lĕ samƀŭt tâp pŏng jêh nđâp samƀŭt ê hŏ tâp pŏng ôh, prăp ta du mlâm yăng neh, gay dơi prăp jŏ.’

¹⁵ Yorlah Brah Yêhôva ma phung tahan, Brah Ndu Israel, lah: ‘Bu mra rvăt đŏng ngih, mir, jêh ri đang krăk ƀâu tâm bri aơ.’

¹⁶ Lôch jao samƀŭt rvăt nây ăn ma Y-Baruk, kon bu klâu Y-Nêria, gâp mbơh sơm ma Brah Yêhôva pô aơ:

¹⁷ ‘Ơ Yêhôva Brah Ndu ơi! May yơh geh nau brah toyh jêh ri mpang ti brah toyh may rhăk njêng jêh trôk jêh ri neh ntu! Mâu geh ôh du ntil nau jêng jêr ir ma May.

¹⁸ May tâm mpơl nau yô̆ tât rbăn rô̆ nuyh, ƀiălah rmal nau tih phung mbơ̆ tât ma phung kon sau. Ơ! May jêng Brah Ndu dŭt toyh jêh ri Nơm geh nau brah, amoh May jêng Brah Yêhôva ma phung tahan.

¹⁹ Nau Păng mĭn dăp ƀư toyh ngăn ngên, kan Păng bêng ma nau brah. Măt Păng sol uănh ma lĕ rngôch trong kon bunuyh gay ăn nau nkhôm ma ăp nơm bunuyh tĭng nâm trong jêh ri tĭng nâm play ueh tă bơh kan khân păng ƀư.

²⁰ May hŏ ƀư jêh tâm mpơl nau mbên khlay ir ar tâm n'gor bri Êjipt, jêh ri n'ho tât ma nar aơ May hôm e ƀư tay tâm bri Israel tâm ban ma lĕ rngôch ntŭk êng; May hŏ ƀư ăn amoh May geh nau lư n'găr jêh nâm bu nar aơ.

²¹ May hŏ dŏng lĕ nau tâm mpơl nau mbên khlay ir ar, yơr mpang ti ktang jêh ri ling tur ti, ƀư nau krit toyh njŭn leo jêh phung ƀon lan May Israel du luh tă bơh n'gor bri Êjipt.

²² May ăn jêh ma khân păng bri aơ, du mlâm bri geh ndơ sông sa rmeh ler, May hŏ ton jêh ăn ma phung chô yau khân păng.

²³ Khân păng hŏ lăp jêh ri dơn bri aơ ƀư drăp ndơn, ƀiălah khân păng mâu ŭch tông bâr May ôh, mâu rêh tĭng nau vay May, mâu ƀư tĭng ôh du ntil tâm lĕ rngôch nau May ntĭnh. Yor nây, May ăn tât jêh lĕ nau mhĭk aơ ma khân păng.

²⁴ Ri, ăp ntŭk pôih hŏ bât tât êp ƀon toyh, gay lơh pit in păng. Yor ma pêh đao, sa sât ji ngot, nau ji tưp, yor nây ƀon aơ tŭp tâm ti phung Kaldê dôl tâm lơh đah khân păng. Nau May lah hŏ geh tât jêh, May saơ rah vah ngăn!

²⁵ Ơ Brah Yêhôva, May hŏ lah jêh ma gâp: “Sŏk hom prăk rvăt mir aơ, jêh ri jă bunuyh mbơh gĭt nanê̆.” Pô nĕ ƀon aơ hŏ tŭp tâm ti phung Kaldê kđôi!’”

²⁶ Geh nau Brah Yêhôva lah ma Y-Yêrêmi:

²⁷ “Aơ, Gâp jêng Yêhôva, Brah Ndu ma lĕ rngôch bunuyh; geh lĕ moh nau jêr ir ma Gâp đŏng?

²⁸ Yor ri, Brah Yêhôva lah: Aơ, Gâp mra jao ƀon aơ tâm ti phung Kaldê, tâm ti Y-Nêbukatnetsar, hađăch Babilôn, jêh ri hađăch nây mra pit sŏk ƀon.

²⁹ Phung Kaldê dôl rduh tâm lơh đah ƀon aơ mra văch tât su ƀon aơ, su rai lơi lĕ ngih bu nhhơr ndơ ƀâu kah ma brah Baal ta klơ chor jêh ri ƀư ndơ nhhơr nhêt ăn ma brah êng, gay nsônh nuih Gâp.

³⁰ Yorlah ntơm bơh kon se, phung kon sau Israel jêh ri phung kon Yuđa knŏng gĭt ƀư nau mhĭk tâm dâng măt Gâp. Nanê̆ ngăn, phung kon sau Israel knŏng nsônh nuih Gâp ma lĕ kan ti khân păng ƀư, Brah Yêhôva lah pônây.

³¹ Ntơm bơh nar bu dơi ndâk kŏ tât nar aơ, ƀon aơ hŏ ƀư ma Gâp ji nuih jêh ri nuih hâu ngăn. Gâp ŭch mƀăr lơi păng bơh măt Gâp

³² Yorlah lĕ rngôch nau mhĭk phung kon sau Israel jêh ri phung kon sau Yuđa, khân păng nơm yơh, phung hađăch, phung kôranh, lĕ phung kôranh ƀư brah, lĕ phung nơm mbơh lor khân păng, nđâp ma phung Yuđa jêh ri phung ƀon lan gŭ tâm Yêrusalem gay ƀư nsônh nuih Gâp,

³³ Khân păng ndôn kơi jêh ri pôn muh măt khân păng ma Gâp. Nđâp lah Gâp hŏ nti ma khân păng ƀaƀơ, khân păng ăt mâu ŭch iăt ôh, mâu sŏk dơn nau ntĭm nti.

³⁴ Khân păng hŏ dơm jêh lĕ ndơ ƀơ̆ ƀơch tâm trôm ngih dơi ntơ ma Amoh Gâp, gay ƀư ƀơ̆.

³⁵ Khân păng hŏ ndâk jêh lĕ ntŭk prêh klơ ăn ma brah Baal tâm rlŭng Ben-Hinôm, gay nhhơr phung kon bu klâu phung kon bu ur khân păng nơm ăn ma brah Môlek. Nây jêng nau Gâp mâu geh ntĭm nti, mâu mâp lĕ mĭn ma nau nây khân păng dơi ƀư nau tâm rmot aơ tâm ban pônây gay ăn phung Yuđa ƀư tih.

³⁶ Yor nây, aƀaơ aơ Yêhôva Brah Ndu Israel lah ma ƀon aơ khân may ngơi pô aơ păng hŏ tŭp tâm ti hađăch Babilôn yor ma pêh đao, nau sa sât ji ngot, nau ji tưp, kơt aơ:

³⁷ ‘Aơ, Gâp mra rgum tâm rƀŭn khân păng tă bơh lĕ rngôch bri Gâp hŏ mprơh jêh khân păng tâm nau hao nuih, nuih hâu ngăn jêh ri tâm nau ji nuih Gâp mra njŭn khân păng plơ̆ sĭt ma ntŭk aơ jêh ri ăn ma khân păng gŭ pah kan đăp mpăn.

³⁸ Khân păng mra jêng phung ƀon lan Gâp, jêh ri Gâp mra jêng Brah Ndu khân păng.

³⁹ Gâp mra ăn ma khân păng du nuih n'hâm, ndrel ma du trong gay ma khân păng dơi klach yơk ma Gâp lôch nau rêh khân păng, yor nây khân păng nơm jêh ri ndŭl deh ma phung kon sau khân păng dơi geh nau ueh da dê.

⁴⁰ Gâp mra ndâk ma khân păng du nau tâm rnglăp n'ho ro: Gâp mâu chalơi khân păng ôh jêh ri mâu rlu ăn nau ueh ma khân păng. Gâp mra dơm nau klach yơk ma Gâp tâm nuih n'hâm khân păng gay ma khân păng mâu chalơi Gâp đŏng ôh.

⁴¹ Gâp mra maak ƀư nau ueh ma khân păng, ma lĕ nuih n'hâm ma lĕ nau ktang tăm khân păng ma nau nâp tâm bri aơ.’

⁴² Brah Yêhôva lah: ‘Nâm bu Gâp hŏ ăn tât jêh lĕ rngôch nau mhĭk toyh ma phung ƀon lan aơ, tâm ban đŏng Gâp mra ăn tât ma khân păng lĕ nau ueh Gâp hŏ ton jêh ma khân păng,

⁴³ Bu mra rvăt mir tâm bri aơ, bri khân may ngơi: “Păng lĕ jêng rngol jêh, mâu geh bunuyh gŭ ôh, mâu lĕ geh mpô mpa, hŏ tŭp tâm ti phung Kaldê.”

⁴⁴ Bu mra rvăt mir ma prăk, nchih samƀŭt tăch, tâp pŏng tay, jă bunuyh nơm gĭt nanê̆ tâm bri Benjamin, jêh ri tâm ntŭk văr jŭm ƀon Yêrusalem, tâm lĕ rngôch ƀon n'gor Yuđa jêh ri tâm lĕ ƀon klơ yôk, n'gor Sêphêla jêh ri n'gor Nêgep. Yorlah Gâp mra ăn phung jêng bu nă plơ̆ sĭt tay đŏng.’” Yêhôva lah pônây.