Yêrêmi 30 - Nau Brah Ndu Ngơi 2023

Nau ton njêng tay ma Israel jêh ri Yuđa

¹ Aơ jêng nau Brah Yêhôva lah ma Y-Yêrêmi:

² “Yêhôva Brah Ndu Israel lah: ‘Nchih hom lĕ rngôch nau gâp ngơi ma may ta du drôm samƀŭt.’

³ Brah Yêhôva lah: ‘Aơ, nar panăp Gâp mra njŭn leo phung ƀon lan Israel jêh ri Yuđa Gâp plơ̆ sĭt tă bơh ntŭk jêng dĭk, Gâp mra njŭn leo khân păng sĭt tâm bri dak Gâp hŏ ăn jêh ma phung chô yau khân păng, jêh ri khân păng mra sŏk dơn bri dak nây ƀư drăp ndơn.’ Brah Yêhôva lah pônây.”

⁴ Aơ jêng nau Brah Yêhôva lah ma phung Israel jêh ri phung Yuđa:

⁵ “Brah Yêhôva lah: ‘He hŏ tăng jêh bâr nter nau phit phơr Nau klach krit, mâu di nau đăp mpăn ôh.

⁶ Ôp sek hom ri jêh ri sek uănh, Du huê bu klâu dơi deh lĕ? Mâm ƀư Gâp saơ ăp nơm bu klâu Muh măt jêng nglang pal Bar đah ti ut ndŭl nâm bu du huê bu ur ji deh?

⁷ Rêh ni ngăn! Nar nây klach krit ngăn Mâu mâp geh nar tâm ban ma nar nây; Nây jêng rơh nau rêh ni tât ma phung Yakôb, Ƀiălah păng mra dơi rklaih bơh nar nây.’

⁸ Brah Yêhôva ma phung tahan lah: ‘Tâm nar nây, Gâp mra nkê̆ch lơi mâng mbăk bơh trô ko may, Tôch lơi rse kât ma may, Phung bu năch mâu mra đă may pah kan đŏng ôh.

⁹ Ƀiălah khân păng mra pah kan ma Yêhôva Brah Ndu khân păng, Jêh ri hađăch he jêng Y-Đavit Gâp mra n'hao ăn ma khân păng.’

¹⁰ Brah Yêhôva lah: ‘Ơ Y-Yakôb, oh mon Gâp, lơi klach ôh. Ơ phung Israel, lơi klach krit ôh! Yorlah aơ, Gâp mra rklaih may luh bơh ntŭk ngai ngăn, Jêh ri phung kon sau may bơh bri bu nă. Y-Yakôb mra plơ̆ sĭt jêh ri rêh ueh lăng đăp rmên, Mâu hôm geh klach nuyh đŏng ôh.’

¹¹ Brah Yêhôva lah: ‘Yorlah Gâp gŭ ndrel ma may gay tâm rklaih may; Gâp mra ƀư rai lĕ bri dak Gâp hŏ nchah rai khân may tât ta nây, Ƀiălah đah may Gâp mâu ƀư rai lĕ ôh. May mâu mra der luh bơh nau tâm rmal Ƀiălah Gâp mra nduyh nkra may ma nau di.’

¹² Brah Yêhôva lah: ‘Nau rmanh may mâu dơi bah ôh, Sôt rmanh may glăm ngăn.

¹³ Mâu geh du huê koh dŏng ăn ma may, Sôt rmanh vay dơi săm bah, Ƀiălah may mâu geh dak si săm ôh.

¹⁴ Lĕ rngôch phung rŏng ma may hŏ chuêl jêh may, Mâu meng tât ma may: Yorlah Gâp hŏ dong may kŏ sôt nâm bu du huê rlăng dong, Nduyh nkra may nâm bu phung ƀai nduyh nkra, Yorlah nau may tih toyh ngăn, Nau djơh mhĭk may âk ngăn.

¹⁵ Mâm may hôm nter lah yor ji sôt rmanh may? Nau ji may mâu dơi bah ôh. Yorlah nau may tih toyh ngăn, Nau djơh mhĭk may âk ngăn Yor nây Gâp ƀư ma may nâm bu pônây.

¹⁶ Yor nây, lĕ rngôch mbu nơm rvăn may bu mra rvăn; Lĕ rngôch phung rlăng may, tâm ăp nơm mra hăn jêng bu nă; Mbu nơm tŭn jot may bu mra tŭn jot, Lĕ rngôch phung tŭn jot may, Gâp mra jao ma nau tŭn jot.’

¹⁷ Brah Yêhôva lah: ‘Gâp mra ăn tay n'hâm suan ma may, Ƀư bah sôt rmanh may, Yorlah khân păng ntơ may jêng nơm bu hŏ mƀăr lơi jêh: “Nây jêng ƀon Siôn, mâu geh bunuyh meng tât!”’

¹⁸ Brah Yêhôva lah: ‘Aơ, Gâp mra njŭn ngih bok Y-Yakôb plơ̆ sĭt bơh ntŭk jêng bu nă, Gâp mra yô̆ an ntŭk păng gŭ; Ƀon toyh aơ mra ndâk tay ta ntŭk rngot njăp, Ngih hađăch mra ndâk tay ta klơ ntŭk ơm.

¹⁹ Tă bơh ntŭk khân păng tăng nau mprơ tâm rnê Jêh ri bâr troh maak phung răm rhơn. Gâp mra ăn khân păng âk lơn, mâu di hŭch ôh Gâp mra ƀư đŏng khân păng dơi geh nau bu yơk, mâu hôm jêng jê̆ ôh.

²⁰ Phung kon khân păng mra jêng nâm bu rnôk saơm; Phung tâm rƀŭn khân păng mra jêng nâp tanăp Gâp; Gâp mra tâm rmal lĕ rngôch phung tŭn jot khân păng.

²¹ Kôranh khân păng tât bơh khân păng, Bunuyh chiă uănh ăt luh bơh khân păng. Gâp mra njŭn nơm nây văch dăch Gâp, jêh ri păng mra văch dăch Gâp, Yorlah mbu nơm janh văch dăch Gâp? Brah Yêhôva lah pônây.

²² Tâm ban pônây, khân may mra jêng phung ƀon lan Gâp, Gâp mra jêng Brah Ndu khân may.’”

²³ Aơ, sial phŭt Brah Yêhôva! Nau nuih Păng hŏ luh du jêh, Phŭt sial vănh blông rvah rvĭr Ta klơ bôk phung djơh mhĭk.

²⁴ Nau ji nuih gring gring Brah Yêhôva hâu ngăn mâu mra djoh ôh Kŏ tât Păng ƀư jêh ri ăn jêh Lĕ nau ŭch mĭn tâm nuih n'hâm Păng. Tâm nar nglĕ dŭt, Khân may gĭt rbăng nau nây.