Yêrêmi 3 - Nau Brah Ndu Ngơi 2023

Nau nkah phung Israel rmal nau tih

¹ Brah Yêhôva lah: “Tơlah nơm ri chalơi ur, Ur nơm nây luh du jêh ri sŏk sai êng, Pôri sai ơm păng mra plơ̆ tay Đah bu ur nây lĕ? Mâu di hĕ neh aơ hŏ ƀơ̆ ƀơch ngăn? Păng hŏ ƀư nau văng tĭr đah âk nơm rŏng, Hôm e mĭn plơ̆ tay đah Gâp hĕ?

² N'gơr hom măt uănh ma yôk hil! Geh lĕ ntŭk may mâu bê̆ch ndrel đah bu êng? May hŏ gŭ meng trong gay kâp nơm rŏng, Nâm bu phung Arabi tâm bri rdah. May hŏ ƀư ƀơ̆ ƀơch neh aơ Đah lĕ nau văng tĭr tih mhĭk ngăn.

³ Yor ri dak mih bu hŏ nchăng lơi jêh, Dak mih dŭt yan ăt mâu tât; Nđâp pônây may ăt mâu blau prêng, Măt kranh kơt lŭ tâm ban ma bu ur văng tĭr.

⁴ Mâu di hĕ ntơm bơh kăl e may hŏ kuăl Gâp: ‘Ơ Mbơ̆ gâp, May jêng mĭt jiăng gâp ntơm bơh nôk ndăm,

⁵ Di lĕ May ji nuih mro mrăng, Jêh ri nau ji nuih n'ho ro?’ Aơ, nđâp lah hŏ ngơi tâm ban pônây, May ăt ƀư nau mhĭk may nơm ŭch.”

Nuih n'hâm mâu răp jăp phung Israel

⁶ Tâm rô̆ hađăch Y-Jôsia chiă uănh, Brah Yêhôva lah ma gâp: “May saơ đŏng nau mâu răp jăp tâm phung Israel hŏ ƀư? Khân păng hŏ hao ăp yôk prêh, tât tâm dâng pŭm tơm si âk n'ha ƀư nau văng tir.

⁷ Gâp mĭn pô aơ lah jêh ƀư lĕ nau kan nây păng mra plơ̆ sĭt ma Gâp, ƀiălah păng mâu plơ̆ sĭt ôh. Oh bu ur mâu răp jăp păng jêng Yuđa hŏ saơ jêh nau nây.

⁸ Gâp saơ pô aơ dôl phung Israel ƀư rlăng yorlah nau văng tir, Gâp hŏ chalơi păng jêh ri ndơ̆ du pŏk samƀŭt tâm lơi ăn ma păng, ƀiălah oh bu ur păng jêng phung Yuđa mâu răp jăp mâu klach kir djê̆, ăt hôm thoi đŏng nau văng tĭr.

⁹ Yorlah uănh mâu tih ôh nau păng văng tir yor nây păng ƀư ƀơ̆ ƀơch êng păng nơm ndrel ma neh aơ, văng tĭr đah lŭ jêh ri tơm si.

¹⁰ Tât pônây jêh oh bu ur mâu răp jăp păng jêng Yuđa ăt mƀruh nchơt, mâu lĕ nuih n'hâm plơ̆ sĭt ndrel ma Gâp.” Brah Yêhôva lah pô aơ.

¹¹ Brah Yêhôva lah ma gâp pô aơ: “Phung Israel mâu răp jăp ƀiălah hôm sŏng srăng lơn rđĭl đah phung Yuđa mâu răp jăp.

¹² Hăn hom, rle mpeh pa lơ mbơh lĕ nau aơ: ‘Hơi phung Israel mâu răp jăp, plơ̆ sĭt hom! Brah Yêhôva lah, Gâp mâu mra luh muh măt ji nuih ôh uănh ma khân may, Yorlah nuih n'hâm Gâp bêng ma nau yô̆ nđach; Gâp mâu mra ji nuih n'ho ro ôh.’ Brah Yêhôva lah pônây.

¹³ ‘Knŏng ŭch may dơn saơ nau tih may pô aơ: May hŏ tâm rdâng đah Yêhôva Brah Ndu; May hŏ nsong lam ntŭk tĭng brah phung bu năch tâm dâng ăp pŭm tơm si âk n'ha, Jêh ri mâu rkêng tôr ôh iăt nau Gâp.’” Brah Yêhôva lah pônây.

¹⁴ Brah Yêhôva Lah: “Hơi phung kon mâu răp jăp, plơ̆ sĭt hom! Yorlah Gâp jêng kôranh ma phung khân may. Gâp mra sŏk tă bơh phung khân may ăp ƀon du huê, ăp ndŭl mpôl bar hê, Jêh ri djôt tât ma Siôn.

¹⁵ Gâp mra ăn khân may phung chiăp ueh nuih n'hâm Gâp. Khân păng mra sŏk nau gĭt rbăng jêh ri nau blau mĭn rong siăm khân may.”

¹⁶ Brah Yêhôva lah đŏng: “Dôl khân may bĭk rơ̆ jêh ri hao jêng âk tâm n'gor, nôk nây bu mâu mra ngơi tât ma Hip Nau Tâm Rnglăp Brah Yêhôva đŏng ôh! Bu mâu hôm mra mĭn mâu lah nkah kah gĭt tât, mâu hôm nhhuach mâu lah ŭch pâng du mlâm Hip êng.

¹⁷ Rnôk nây bu mra ntơ Yêrusalem jêng sưng Hađăch Brah Yêhôva. Lĕ rngôch mpôl bunuyh mra tâm rƀŭn tâm amoh Brah Yêhôva ta ƀon Yêrusalem, khân păng mâu mra dăng bôk ôh rêh tĭng nuih n'hâm mhĭk khân păng nơm đŏng.

¹⁸ Tâm nar nây, ngih Yuđa mra hăn ndrel ma ngih Israel, jêh nây khân păng mra nsum ndrel luh bơh neh mpeh pa lơ, plơ̆ sĭt ma n'gor Gâp hŏ ăn ma phung chô yau khân may ƀư drăp ndơn.

¹⁹ Gâp hŏ lah: ‘Mâm ƀư gay njŭn may lăp ta phung kon Gâp, Jêh ri ăn ma may du ntŭk bri ueh ngăn. Drăp ndơn khlay lơn ta nklang ndŭl mpôl bunuyh. Gâp hŏ lah: May mra kuăl Gâp jêng “Mbơ̆ gâp.” Jêh ri mâu mra ndôn kơi chalơi Gâp.

²⁰ Ƀiălah hơi ngih phung Israel, Mâm du huê bu ur mâu răp jăp chalơi sai păng. Pôri khân may ăt mâu răp jăp đah Gâp pônây lĕ.’ ” Brah Yêhôva lah pônây.

²¹ Geh bâr lŭng nter dơi tăng bơh lĕ dor hil, Nây jêng bâr phung kon Israel nhĭm nhhiăng vơl dăn, Yorlah khân păng hŏ hăn vĭ nhhơt trong, Hŏ chuêl Yêhôva Brah Ndu khân păng.

²² “Hơi phung kon mâu răp jăp, plơ̆ sĭt hom! Gâp mra ƀư bah nau mâu răp jăp khân may.” Khân may plơ̆ lah: “Aơ, phung hên tât ma May, Yorlah May jêng Yêhôva Brah Ndu hên.

²³ Nau yơk mbah klơ lĕ dor prêh Jêh ri nau drơu drơu ăp yôk nanê̆ knŏng jêng nau mƀruh nchơt. N'hêl nanê̆, knŏng tâm Yêhôva Brah Ndu hên Ri mơ geh nau tâm rklaih ăn phung Israel.

²⁴ Ntơm bơh hên hôm mom ndăm, Brah khư ma nau bêk prêng hŏ rvăn lĕ kan chô yau hên, Phung biăp, phung ndrôk, Phung kon bu klâu, kon bu ur khân păng.

²⁵ Hên di ma lâng bê̆ch tâm nau bêk prêng, Ntâk klơ hên nau bêk prêng. Yorlah lĕ rngôch hên nđâp ma chô yau hên Hŏ ƀư tih đah Yêhôva Brah Ndu da dê; Ntơm bơh hôm mom ndăm tât aƀaơ, Phung hên mâu ŭch iăt nau Yêhôva Brah Ndu hên.”