Yêrêmi 29 - Nau Brah Ndu Ngơi 2023

Samƀŭt Y-Yêrêmi njuăl ma phung bu nhŭp leo phung Israel jêng dĭk tâm bri Babilôn

¹ Aơ jêng nau ngơi tâm samƀŭt nơm mbơh lor Y-Yêrêmi njuăl tă bơh Yêrusalem ăn ma phung bu ranh hôm klen tâm phung ƀư bu nă, ăn ma phung kôranh ƀư brah, ma phung nơm mbơh lor, jêh ri ma lĕ rngôch phung ƀon lan, hađăch Y-Nêbukatnetsar hŏ nhŭp tă bơh Yêrusalem leo ma bri Babilôn.

² Samƀŭt nchih pakơi hađăch Jêkônia, mê̆ hađăch, lĕ phung kôranh bu char, lĕ phung kôranh Yuđa jêh ri Yêrusalem, phung blau rhăk jêh ri nơm chiăr bu hŏ njŭn jêh tă bơh Yêrusalem.

³ Nơm mbơh lor njuăl samƀŭt aơ ăn ma Y-Êlêasa, kon bu klâu Y-Saphan, jêh ri Y-Gêmaria, kon bu klâu Y-Hilkia, jêng bar hê phung Y-Sêdêkia, hađăch Yuđa, prơh hăn ma bri Babilôn gay tâm mâp đah Y-Nêbukatnetsar, hađăch Babilôn. Samƀŭt nchih pô aơ:

⁴ “Brah Yêhôva ma phung tahan, Brah Ndu Israel, lah ma lĕ rngôch phung Gâp ƀư ăn jêng bu nă tă bơh Yêrusalem rlet ma bri Babilôn:

⁵ ‘Ndâk hom ngih vâl jêh ri gŭ; tăm hom đang tơm si jêh ri sa play.

⁶ Nsông ur hom jêh ri geh kon bu klâu, bu ur. Nsông ur hom ăn ma kon bu klâu, nđăp sai ăn ma phung kon bu ur gay ăn khân păng deh kon geh sau. Bĭk rơ̆ hom rnoh bunuyh ta nây lơi ăn n'hŭch ôh.

⁷ Joi hom nau ndrŏng ăn ma ƀon toyh ntŭk Gâp prơh hăn khân may jêng bu nă. Mbơh sơm hom ma Brah Yêhôva kơl ăn ma ƀon nây, yor nau ndrŏng păng jêng nau ndrŏng khân may.’”

⁸ Brah Yêhôva ma phung tahan, Brah Ndu Israel lah pô aơ: “Lơi ta ăn phung nơm mbơh lor, phung gru gŭ ta nklang khân may ndơm khân may ôh; mâu lĕ iăt phung nkoch mbơi gay mbơi dơm dam.

⁹ Yorlah khân păng sŏk amoh Gâp gay lah nau mbơh lor ndơm mƀruh ma khân may. Gâp mâu mâp prơh khân păng hăn ôh.” Brah Yêhôva lah pônây.

¹⁰ Brah Yêhôva lah: “Lah lôch jêh pơh jât năm ăn ma phung Babilôn, Gâp mra hăn chop khâl khân may, mra ƀư lôch nau ton ueh jêh ma khân may, jêh ri mra njŭn leo khân may plơ̆ sĭt ma ntŭk aơ.”

¹¹ Brah Yêhôva lah: “Yorlah Gâp gĭt nau Gâp hŏ dăp jêh ma khân; nây jêng nau đăp mpăn mâu di ôh nau mhĭk, gay ma khân may geh du nar kăndơ̆ jêh ri du nau kâp gân.

¹² Nôk nây khân may mra kuăl dăn Gâp, văch mbơh sơm ma Gâp, jêh ri Gâp mra iăt nau khân may.

¹³ Khân may mra joi Gâp jêh ri dơi mâp, lah khân may tĭng joi Gâp ma lĕ nuih n'hâm.”

¹⁴ Brah Yêhôva lah: “Gâp mra ăn khân may dơi mâp Gâp jêh ri gâp mra njŭn leo khân may bơh ntŭk ƀư dĭk. Gâp mra rgum tay khân may bơh lĕ rngôch bri dak jêh ri bơh lĕ rngôch ntŭk Gâp hŏ mprơh khân may. Gâp mra njŭn khân may sĭt tă bơh ntŭk Gâp hŏ nhŭp veng leo jêh khân may.”

¹⁵ Yorlah khân may lah jêh: “Brah Yêhôva n'hao jêh phung mbơh lor ma he tâm Babilôn!”

¹⁶ Pôri, Brah Yêhôva lah nĕ aơ ma hađăch dôl gŭ ta sưng hađăch Đavit jêh ri ma lĕ rngôch phung ƀon lan gŭ tâm ƀon toyh aơ, tâm ban ma phung oh nâu khân may, jêng bunuyh bu mâu mprơh jêng bu nă ndrel khân may ôh.

¹⁷ Aơ jêng nau Brah Yêhôva ma phung tahan lah: “Aơ, Gâp mra njuăl đao, nau sât ji ngot, jêh ri nau ji tưp tât ta klơ khân păng; Gâp mra ƀư ma khân păng nâm bu lĕ play rvi ôm, mhĭk ngăn kŏ tât mâu dơi sa ôh.

¹⁸ Gâp mra njuăl ma đao, nau sât ji ngot, jêh ri nau ji tưp tĭng khân păng. Gâp mra njêng khân păng du ntil ndơ nkrit ngăn ma lĕ rngôch ƀon bri hađăch ta neh ntu, du ntil ndơ bu rak rtăp, du ntil nau ntêh rmot, du ntil nau gơm mưch, du ntil nau bêk prêng ta nklang lĕ rngôch mpôl băl bunuyh Gâp hŏ mprơh jêh khân păng.”

¹⁹ Brah Yêhôva lah: “Nây jêng yor khân păng mâu ŭch iăt ôh nau Gâp nđâp lah Gâp hŏ ƀaƀơ mprơh phung oh mon Gâp, jêng phung nơm mbơh lor, tât ma khân păng.” Brah Yêhôva lah đŏng: “Bi khân may ăt mâu ŭch iăt ôh.”

²⁰ Ƀiălah, ơ khân may jêng phung bu nă Gâp hŏ njŭn bơh Yêrusalem tât ma bri Babilôn, iăt hom nau Brah Yêhôva;

²¹ “Brah Yêhôva ma phung tahan, Brah Ndu Israel, lah ma Y-Ahap, kon bu klâu Y-Kôlaya, jêh ri ma Y-Sêdêkia, kon bu klâu Y-Maseya, jêng phung mbơh lor nklă mƀruh tâm amoh Gâp, pô aơ: ‘Aơ, Gâp mra jao khân păng tâm ti Y-Nêbukatnetsar, hađăch Babilôn, hađăch nây mra nkhĭt khân păng tanăp măt khân may.’

²² Lĕ rngôch phung Yuđa bu nhŭp veng leo gŭ tâm bri Babilôn mra sŏk bar hê aơ ƀư nau ngơi rak rtăp: ‘Dăn Brah Yêhôva rmal may nâm bu Y-Sêdêkia jêh ri Y-Ahap, jêng bar bunuyh hađăch Babilôn hŏ gŭch tâm ŭnh!’

²³ Yorlah khân păng hŏ ƀư jêh nau rluk tâm bri Israel, hŏ ƀư nau văng tĭr đah ur phung chiau meng, jêh ri hŏ tâm amoh Gâp ngơi ma lĕ nau mƀruh nau Gâp mâu mâp ntĭnh ôh. Gâp yơh jêng Nơm gĭt rah vah nau nây jêh ri mbơh nkoch ma nau nây.” Brah Yêhôva lah pônây.

²⁴ “Bi ma Y-Sêmaya gŭ tă ƀon Nêhêlam, may lah hom kơt aơ:

²⁵ Brah Yêhôva ma phung tahan, Brah Ndu Israel lah: ‘May njuăl jêh samƀŭt tâm amoh may nơm ma lĕ rngôch phung ƀon lan gŭ ta ƀon Yêrusalem, ma Y-Sêphania, kon bu klâu kôranh ƀư brah Y-Maseya, jêh ri ma lĕ rngôch phung kôranh ƀư brah pô aơ:

²⁶ Brah Yêhôva njêng jêh may ƀư kôranh ƀư brah ntrok an ma kôranh ƀư brah Y-Jêhôida gay chiă uănh tâm ngih Brah Yêhôva, jêh ri đă nkông jâng, văn ndrak ta trô ko ma lĕ rngôch phung rluk ntơ êng jêng nơm mbơh lor.

²⁷ Pônây mâm ƀư may mâu nduyh Y-Yêrêmi bunuyh Anathôt, dôl ngơi mbơh lor nây ăn ma khân may?

²⁸ Păng nơm yơh njuăl jêh samƀŭt tât ma bri Babilôn lah ma phung he: Rnôk rô̆ bu nhŭp veng hôm jŏ ngăn; ndâk hom ngih vâl jêh ri gŭ, tăm hom đang tơm si jêh ri sa play!’”

²⁹ Kôranh ƀư brah Y-Sêphania hŏ rŏ jêh samƀŭt aơ tâm tôr nơm mbơh lor Y-Yêrêmi.

³⁰ Nôk nây geh nau Brah Yêhôva lah ma Y-Yêrêmi:

³¹ “Njuăl hom samƀŭt aơ tât ma lĕ rngôch phung bu hŏ veng jêh: Brah Yêhôva lah ma Y-Sêmaya, bunuyh ƀon Nêhêlam kơt aơ: ‘Y-Sêmaya hŏ mbơh lor jêh ma khân may, ƀư ma khân may rnơm ma nau ngơi mƀruh, Gâp mâu mâp mprơh păng ôh.’

³² Yor nây, Brah Yêhôva lah: ‘Aơ, Gâp mra tâm rmal Y-Sêmaya, bunuyh ƀon Nêhêlam, jêh ri ndŭl deh păng. Mâu hôm geh du huê tâm Noi deh păng dơi rêh tâm nklang phung ƀon lan nây. Păng nơm ăt mâu mra saơ nau ueh Gâp mra ƀư ma phung ƀon lan Gâp, yorlah păng hŏ ngơi nau tâm rdâng đah Brah Yêhôva,’” Yêhôva lah pônây.