Yêrêmi 27 - Nau Brah Ndu Ngơi 2023

Y-Yêrêmi kuăl tông bâr hađăch Babilôn

¹ Dôl Y-Sêdêkia, kon bu klâu Y-Jôsia, hađăch Yuđa, ntơm chiă uănh, pôri geh nau Brah Yêhôva lah ma Y-Yêrêmi:

² Brah Yêhôva lah ma gâp: “Ƀư hom ma may nơm du mlâm rse ntâu jêh ri du mlâm mâng mbăk, jêh ri văn ta trô ko.

³ Jêh nây, ăn may njuăl samƀŭt tât ma hađăch bri Êđôm, hađăch bri Môap, hađăch phung kon sau Y-Amôn, hađăch bri Tyre, jêh ri hađăch bri Sidôn, tă bâr mbung phung mbơh văch jêh ma ƀon Yêrusalem tâm mâp đah ma Y-Sêdêkia, hađăch Yuđa.

⁴ Ăn may ntĭnh lĕ phung mbơh nây mra lah ma phung kôranh pô aơ: Brah Yêhôva ma phung tahan, Brah Ndu Israel, hŏ lah: Aơ jêng nau khân may lah ma phung kôranh khân may:

⁵ ‘Gâp yơh jêng Nơm dŏng nau brah dŭt toyh jêh ri ling tur ti rhăk njêng rplay neh, kon bunuyh jêh ri mpô mpa ta neh ntu, jêh ri jao neh ntu nây ăn ma mbu tĭng nau mĭn Gâp.

⁶ Aƀaơ, Gâp hŏ jao jêh lĕ rngôch bri aơ tâm ti Y-Nêbukatnetsar, hađăch bri Babilôn, oh mon Gâp. Nđâp ma lĕ rngôch mpô mpa tâm ndrêch Gâp ăt jao ma hađăch gay ma khân păng pah kan ma hađăch nây.

⁷ Lĕ rngôch bri dak mra pah kan hađăch nây jêh ri ma kon sau păng, kŏ tât rnôk lĕ bri dak toyh ktang, phung hađăch toyh tâm tŭn mpet bri dak păng nơm.

⁸ Tơlah moh ƀon lan mâu lah moh ƀon bri hađăch mâu pah kan ôh ma hađăch nây, jêng Y-Nêbukatnetsar, hađăch Babilôn, jêh ri mâu anh mbăk hađăch Babilôn tâm trô ko păng, pôri Gâp mra tâm rmal ƀon lan nây ma đao, ma nau sa sât ji ngot, ma nau ji tưp, kŏ tât ti hađăch ƀư rai lĕ khân păng, Brah Yêhôva lah pônây.

⁹ Yor nây, lơi ta iăt ôh nau phung mbơh lor, phung gru, phung nkoch mbơi, phung sek uănh mănh, mâu lah phung n'hŭm. Khân păng lah ma khân may pô aơ: Khân may mâu mra pah kan ma hađăch Babilôn ôh.

¹⁰ Nau khân păng mbơh lor knŏng nau mƀruh gay ma bu ƀư ma khân may luh bơh bri dak khân may nơm, ƀư ma Gâp mra mprơh khân may jêh ri bu mra ƀư rai lơi.

¹¹ Ƀiălah moh ƀon lan anh mâng mbăk hađăch Babilôn ta trô ko jêh ri pah kan ma hađăch nây, pôri Gâp mra ăn păng gŭ tay tâm bri păng nơm gay jik kai jêh ri gŭ ta nây.’ Brah Yêhôva lah pônây.”

¹² Gâp ăt ngơi ma Y-Sêdêkia, hađăch Yuđa, lĕ nau ƀoi nĕ: “Mbăk hom mâng mbăk hađăch Babilôn ta trô ko, jêh ri pah kan ma hađăch jêh ri ma ƀon lan hađăch nây, ri mơ khân may dơi rêh.

¹³ Mâm ƀư may jêh ri phung ƀon lan may rŏng khĭt đah đao, sa sât ji ngot, nau ji tưp nâm bu nau Brah Yêhôva hŏ lah ma mbu ƀon lan mâu mra pah kan ôh ma hađăch Babilôn?

¹⁴ Lơi ta iăt ôh nau phung nơm mbơh lor lah ma khân may: ‘Khân may mâu mra pah kan ôh ma hađăch Babilôn’, yor nây nau khân păng ngơi ma khân may knŏng jêng nau mbơh lor mƀruh dơm.

¹⁵ Brah Yêhôva ngơi lah: ‘Gâp mâu mâp prơh khân păng hăn ôh, ƀiălah khân păng sŏk amoh Gâp gay lah nau mbơh lor nklă mƀruh. Yor nây, Gâp mra mprơh khân may hăn jêh ri ƀư rai khân may ndrel ma phung mbơh lor hŏ mbơh lor ăn ma khân may.’”

¹⁶ Gâp ngơi ma phung kôranh ƀư brah, jêh ri lĕ rngôch phung ƀon lan pô aơ: “Brah Yêhôva lah: Lơi iăt ôh nau phung mbơh lor mbơh lor ma khân may pô aơ: ‘Mâu hôm jŏ đŏng lĕ ndơ dŏng tâm ngih Brah Yêhôva mra dơi djôt plơ̆ sĭt tă bơh Babilôn,’ yorlah khân păng hŏ ngơi nau mbơh lor nklă mƀruh ma khân may.

¹⁷ Lơi ta iăt khân păng ôh. Pah kan hom ma hađăch Babilôn ri mơ khân may mra dơi rêh. Mâm ƀư ƀon toyh aơ mra jêng rngot njăp?

¹⁸ Tơlah n'hêl nanê̆ ngăn khân păng jêng phung mbơh lor jêh ri nau Brah Yêhôva ngơi gŭ ndrel ma khân păng, pôri ăn khân păng mbơh sơm ma Brah Yêhôva ma phung tahan gay ma lĕ ndơ dŏng hôm e klen tâm ngih Brah Yêhôva, tâm ngih hađăch Yuđa jêh ri tâm ƀon Yêrusalem bu mâu djôt leo ôh ma bri Babilôn.

¹⁹ Yorlah Brah Yêhôva ma phung tahan hŏ lah ma lĕ meh n'gâng kông, lĕ drŏng dak, jêh ri lĕ ndơ dŏng hôm e klen tâm ƀon aơ,

²⁰ nây jêng đơ ndơ Y-Nêbukatnetsar, hađăch Babilôn, ê hŏ djôt leo ôh dôl nhŭp Y-Jêkônia, kon bu klâu Y-Jêhôjakim, hađăch Yuđa, bơh Yêrusalem njŭn leo ma n'gor Babilôn ndrel ma lĕ rngôch phung ndrŏng n'gor Yuđa jêh ri Yêrusalem.

²¹ Nanê̆, Brah Yêhôva ma phung tahan, Brah Ndu Israel, hŏ lah ma lĕ ndơ dŏng hôm e klen tâm ngih Brah Yêhôva, tâm ngih hađăch Yuđa jêh ri tâm Yêrusalem pô aơ:

²² ‘Lĕ rngôch ndơ dŏng nây bu mra djôt leo rlet ma ƀon Babilôn jêh ri prăp ta nây kŏ tât nar Gâp chop khâl ma khân păng. Rnôk nây, Gâp mra djôt plơ̆ sĭt lĕ ndơ nây jêh ri ăn tay ntŭk aơ.’ Brah Yêhôva lah pônây.”