Yêrêmi 26 - Nau Brah Ndu Ngơi 2023

Bu dun nau Y-Yêrêmi nkah nti

¹ Dôl Y-Jêhôjakim, kon bu klâu Y-Jôsia, hađăch Yuđa, ntơm chiă uănh, geh nau lah tă bơh Brah Yêhôva.

² Brah Yêhôva lah pô aơ: “May gŭ dâk hom tâm ndring ngih Brah Yêhôva, mbơh lĕ rngôch nau Gâp ntĭnh jêh ăn ma may mra ngơi ma lĕ rngôch phung ƀon lan n'gor Yuđa hŏ văch yơk mbah tâm ngih Brah Yêhôva; mâu n'hŭch du rplay nau ngơi ôh.

³ Nanê̆ khân păng mra gŭ iăt may jêh ri lĕ rngôch mra chalơi tă bơh trong mhĭk gay plơ̆ sĭt tay. Nôk nây, Gâp mra rgâl nau mĭn ƀư lĕ nau mhĭk Gâp hŏ tâm nal ăn ma khân păng yor lĕ nau tih mhĭk khân păng ƀư.

⁴ Pô aơ may lah hom ma khân păng: Brah Yêhôva lah: ‘Tơlah khân may mâu ŭch iăt ôh nau Gâp, mâu rêh tĭng nau vay Gâp ndâk jêh tanăp khân may;

⁵ tơlah khân may mâu iăt nau phung oh mon Gâp, jêng phung nơm mbơh lor ngơi Gâp prơh hăn tât ma khân may âk tơ̆, khân may ơm mâu ŭch iăt ôh,

⁶ pôri Gâp mra phat ma ngih aơ nâm bu hŏ phat jêh ma ƀon Silô, jêh ri ƀư ma ƀon aơ jêng du nau rak rtăp ta nklang lĕ rngôch bri dak ta neh ntu.’”

⁷ Lĕ phung kôranh ƀư brah, phung mbơh lor, jêh ri lĕ rngôch phung ƀon lan tăng da dê nau Y-Yêrêmi mbơh nau aơ tâm ngih Brah Yêhôva.

⁸ Dôl Y-Yêrêmi ngơi lĕ jêh nau Brah Yêhôva ntăm ma păng mra mbơh ăn ma lĕ rngôch phung ƀon lan, pôri phung kôranh ƀư brah, phung mbơh lor, jêh ri lĕ rngôch phung ƀon lan nhŭp rdâng păng da dê jêh ri lah: “Nanê̆ may mra khĭt!

⁹ Mâm ƀư may nănh tâm amoh Brah Yêhôva ngơi mbơh lor pô aơ: ‘Ngih aơ mra jêng nâm bu ƀon Silô, ƀon toyh aơ mra jêng rngot njăp, mâu geh ƀon lan gŭ ôh’?” Nôk aơ, lĕ rngôch phung ƀon lan tâm gŭ jŭm Y-Yêrêmi tâm ngih Brah Yêhôva.

¹⁰ Dôl tăng nau nây, phung kôranh Yuđa du tă bơh ngih hađăch, hăn tât ma ngih Brah Yêhôva. Khân păng gŭ ta trong lăp Mpông Pêr Mhe ngih Brah Yêhôva.

¹¹ Rnôk aơ, phung kôranh ƀư brah jêh ri phung mbơh lor lah ma phung kôranh jêh ri ma lĕ rngôch phung ƀon lan pô aơ: “Bunuyh aơ khư ma nau khĭt yorlah hŏ mbơh lor tâm rdâng đah ƀon toyh aơ, nâm bu tôr khân may nơm hŏ tăng jêh.”

¹² Ƀiălah Y-Yêrêmi plơ̆ lah ma phung kôranh jêh ri ma lĕ rngôch phung ƀon pô aơ: “Brah Yêhôva hŏ prơh gâp ngơi lĕ rngôch nau mbơh lor ma ngih aơ jêh ri ƀon toyh aơ khân may hŏ tăng jêh.

¹³ Nôk aơ nkra hom trong khân may jêh ri nau khân may ƀư. Tông hom bâr Yêhôva Brah Ndu khân may pôri Brah Yêhôva mra rgâl nau mĭn ƀư lĕ nau mhĭk Păng hŏ mbơh ma khân may.

¹⁴ Bi gâp, aơ, gâp dôl gŭ tâm ti khân may. Khân may ƀư hom ma gâp tĭng nau khân may mĭn jêng di jêh ri khư ma nau ƀư.

¹⁵ Nđâp lah pônây, ăn khân may gĭt nanê̆ pô aơ lah nkhĭt gâp pôri khân may, ƀon toyh aơ jêh ri lĕ rngôch phung gŭ tâm ƀon mra sŏk dơn mham mâu geh ôh nau tih. Yorlah n'hêl nanê̆ ngăn Brah Yêhôva hŏ prơh gâp tât gay mbơh lĕ rngôch nau ngơi aơ lăp ta tôr khân may.”

¹⁶ Lĕ rngôch phung kôranh jêh ri lĕ rngôch phung ƀon lan lah ma phung kôranh ƀư brah jêh ri lĕ phung nơm mbơh lor pô aơ: “Bunuyh aơ mâu khư ma khĭt ôh, yorlah păng nây tâm amoh Yêhôva Brah Ndu he ngơi jêh đah he.”

¹⁷ Ƀaƀă phung kôranh bu ranh tâm bri nĕ dâk ngơi ma lĕ rngôch phung ƀon lan tâm rƀŭn:

¹⁸ “Y-Mika gŭ tâm ƀon Môrêset, nơm mbơh lor tâm rnôk Y-Hêsêkia, hađăch Yuđa, hŏ ngơi ma lĕ rngôch phung ƀon lan n'gor Yuđa pô aơ: Brah Yêhôva ma phung tahan lah: ‘Siôn bu mra chuar nâm bu lôk mir, Yêrusalem mra jêng du mbŭch rlâm rai nchah rngot njăp, Yôk ngih brah mra jêng yôk bri krŏng.’

¹⁹ Y-Hêsêkia, hađăch Yuđa, jêh ri lĕ rngôch ƀon lan phung Yuđa nkhĭt lơi păng nây lĕ? Mâu di hĕ hađăch hŏ klach yơk ma Brah Yêhôva jêh ri vơl dăn nau yô̆ Brah Yêhôva, pôri Brah Yêhôva tâm rgâl nau mĭn mâu nkhŭt nau mhĭk tâm ban ma Păng hŏ mbơh lor jêh ma khân păng lĕ? Bi aƀaơ he ŭch vơt dơn nau mhĭk toyh ngăn ma he nơm!”

²⁰ Geh du huê êng ăt hŏ mbơh lor jêh tâm amoh Brah Yêhôva, nây jêng Y-Uri, kon bu klâu Y-Sêmaya, gŭ tâm ƀon Kiriat-Jêarim. Păng ăt mbơh lor nau tâm rdâng đah ƀon toyh aơ jêh ri đah bri aơ, tâm ban ma Y-Yêrêmi hŏ ngơi.

²¹ Ƀiălah dôl hađăch Y-Jêhôjakim ndrel ma lĕ rngôch phung tahan janh ktang jêh ri lĕ rngôch phung kôranh tăng nau Y-Uri ngơi, pôri hađăch joi ŭch ƀư nkhĭt păng nây. Tăng nau nây, Y-Ur klach jêh ri nchuăt du rlet ma n'gor bri Êjipt.

²² Hađăch Jêhôjakim prơh ro Y-Êlnathan, kon bu klâu Y-Akbôr, jêh ri bunuyh ƀaƀă êng hăn ma bri Êjipt,

²³ nhŭp Y-Uri luh bơh bri Êjipt jêh ri têk leo ăn ma hađăch Y-Jêhôjakim. Hađăch ntrŭnh nau vay ƀư nkhĭt lơi păng nây ma đao jêh ri klŭp săk jăn tâm môch phung ƀon lan.

²⁴ Ƀiălah Y-Ahikam, kon bu klâu Y-Saphan, ngơi n'gang Y-Yêrêmi, mâu ăn păng khĭt tâm ti phung ƀon lan.