Yêrêmi 25 - Nau Brah Ndu Ngơi 2023

Pơh jât năm ƀư bu nă

¹ Tâm năm rơh puăn rô̆ Y-Jêhôjakim, kon bu klâu Y-Jôsia, hađăch Yuđa, nây jêng năm rơh nguay rô̆ Y-Nêbukatnetsar, hađăch bri Babilôn, geh nau lah ma Y-Yêrêmi lah tât ma lĕ rngôch phung ƀon lan Yuđa.

² Nơm mbơh lor Y-Yêrêmi mbơh lĕ nau ngơi nây ăn ma lĕ rngôch phung ƀon lan n'gor Yuđa jêh ri lĕ rngôch phung gŭ tâm ƀon Yêrusalem pô aơ:

³ “Hŏ bar jât ma pe năm ntơm bơh năm rơh jât ma pe rô̆ Y-Jôsia, kon bu klâu Y-Amôn, hađăch n'gor Yuđa, tât ma nar aơ, nau Brah Yêhôva hŏ lah ma gâp, jêh ri gâp hŏ ngơi mâu rlu ma khân may, ƀiălah khân may mâu ŭch iăt ôh.

⁴ Nđâp lah Brah Yêhôva hŏ ƀaƀơ mprơh phung oh mon Păng hăn, nây jêng phung nơm mbơh lor, tât ma khân may ƀiălah khân may mâu iăt ôh, mâu rkêng tôr iăt.

⁵ Khân păng lah: ‘Plơ̆ sĭt hom, ăn ăp nơm tâm phung khân may chalơi hom tă bơh trong nau mhĭk jêh ri nau păng ƀư tih, jêh nây khân may mra dơi gŭ tâm bri Brah Yêhôva hŏ ăn jêh ma khân may jêh ri phung chô yau khân may bơh rnôk saơm kŏ tât ƀaƀơ n'ho ro.

⁶ Lơi tĭng phung brah êng ôh ŭch pah kan jêh ri yơk mbah ma khân păng; lơi ta nsônh nuih Gâp ôh sŏk ma kan ti khân may ƀư, ri mơ Gâp mâu mra ƀư mhĭk ôh ma khân may.’

⁷ Brah Yêhôva lah: ‘Ƀiălah khân may mâu iăt Gâp ôh, sŏk ma kan ti khân may ƀư nsônh nuih Gâp ăn tât nau mhĭk ma khân may nơm.’

⁸ Yor nây, Brah Yêhôva ma phung tahan lah: ‘Yorlah khân may mâu iăt ôh nau Gâp ngơi,

⁹ aơ, Gâp mra prơh hăn lĕ rngôch băl mpôl bunuyh tâm bri mpeh pa lơ jêh ri Y-Nêbukatnetsar, hađăch bri Babilôn, oh mon Gâp, tât tâm rdâng đah bri aơ jêh ri ƀon lan gŭ tâm bri păng, ndrel ma lĕ rngôch bri dak gŭ văr jŭm nây. Gâp mra ƀư rai khân păng, ƀư ăn ma khân păng jêng du ntil ndơ ƀơ̆ bơch, du nau bu gơm mưch, du ntŭk jêng rngot njăp n'ho ro.’ Brah Yêhôva lah pônây.

¹⁰ ‘Gâp mra ƀư ăn ta nklang khân păng mâu hôm geh bâr mprơ răm maak, bâr klay bâr ƀăn, nteh bu rvah mpăl, jêh ri mâu hôm ang nchrat ang ŭnh kađen.

¹¹ Lĕ rngôch bri aơ mra jêng du ntŭk rngot njăp, ƀơ̆ ƀơch, lĕ rngôch phung mpôl băl aơ mra pah kan ma hađăch bri Babilôn tâm pơh jât năm.’

¹² Brah Yêhôva lah: ‘Lah lĕ lôch jêh pơh jât năm, Gâp mra tâm rmal hađăch bri Babilôn jêh ri mpôl băl bunuyh nây, bri phung Kaldê, yor nau mhĭk khân păng, jêh ri njêng bri nây jêng rngot njăp n'ho ro.

¹³ Gâp mra ƀư lĕ rngôch nau Gâp ngơi ma bri dak nây, lĕ rngôch nau nchih jêh tâm ndrom samƀŭt aơ, nây jêng nau Y-Yêrêmi hŏ mbơh lor jêh tâm rdâng đah lĕ rngôch bri dak.

¹⁴ Khân păng nơm yơh pah kan ma bri dak toyh ktang jêh ri ma phung hađăch êng ktang lơn; jêh ri Gâp mra plơng bôk khân păng tĭng nâm nau khân păng ƀư jêh ri kan ti khân păng.’”

Kachok nau ji nuih Brah Ndu

¹⁵ Yêhôva Brah Ndu phung Israel hŏ lah ma gâp pô aơ: “May sŏk hom kachok ndrănh nau ji nuih aơ bơh ti Gâp, jêh ri ăn lĕ rngôch bri dak Gâp prơh may hăn nhêt kachok nây.

¹⁶ Khân păng mra nhêt, mra chuat hăn ndĭt ndiu jêh ri ji nuih yor đao Gâp njuăl ta nklang khân păng.”

¹⁷ Yor nây, gâp sŏk kachok nây bơh ti Brah Yêhôva jêh ri ăn lĕ rngôch bri dak Brah Yêhôva prơh gâp hăn tât ăn nhêt kachok nây tâm ban:

¹⁸ Yêrusalem jêh ri lĕ rngôch ƀon Yuđa, phung hađăch jêh ri phung kôranh ƀon, gay khân păng jêng rngot njăp rjăp, ƀơ̆ ƀơch, bu gơm mưch jêh ri rak rtăp nâm bu nar aơ;

¹⁹ Pharaôn, hađăch Êjipt, phung oh mon păng, phung kôranh jêh ri lĕ rngôch phung ƀon lan Êjipt;

²⁰ lĕ rngôch phung ƀon lan gŭ tâm rlŭk, lĕ rngôch hađăch n'gor bri Us, lĕ rngôch hađăch n'gor bri Philistin: nây jêng hađăch Askalôn, Gaxa, Êkron, jêh ri phung hôm e klen gŭ ta Asdôt;

²¹ Êđôm, Môap, kon sau Y-Amôn;

²² phung hađăch Tyre, lĕ rngôch hađăch Sidôn, jêh ri lĕ rngôch phung hađăch gŭ lĕ gôl dak mƀŭt;

²³ Dêdan, Têma, Bus, phung ƀon lan poih sŏk bar đah n'geng tôr;

²⁴ lĕ rngôch phung hađăch Arabi, phung hađăch tâm lĕ bri dak jêng lĕ ƀon lan tâm rlŭk gŭ rêh tâm bri rdah;

²⁵ lĕ rngôch hađăch Simri, lĕ rngôch hađăch Êlam, lĕ rngôch hađăch Mêdơ;

²⁶ lĕ rngôch hađăch bri mpeh pa lơ, gŭ ngai mâu lah gŭ dăch, lĕ hađăch aơ tât ma hađăch ri; lĕ rngôch ƀon bri hađăch ta klơ neh ntu. Hađăch Sêsăk mra nhêt nglĕ dŭt.

²⁷ “May ăt lah ma khân păng: Brah Yêhôva ma phung tahan, Brah Ndu phung Israel lah pô aơ: ‘Nhêt hôm kŏ tât nhŭl jêh ri hok, cha lôt hom jêh ri lơi dâk đŏng ôh, yor đao Gâp njuăl tât tâm nklang khân may!’

²⁸ Tơlah khân păng mâu ŭch dơn ôh kachok bơh ti may gay ma nhêt, pôri ăn may lah ma khân păng pô aơ Brah Yêhôva ma phung tahan lah: ‘N'hêl nanê̆ khân may mra nhêt!

²⁹ Yorlah aơ, ƀon ri jêng ƀon bu ntơ ma amoh Gâp ƀiălah Gâp ntơm ăn tât nau mhĭk, pônây khân may mra klaih ma nau tâm rmal lĕ? Mâu! Khân may mâu mra klaih ôh ma nau tâm rmal, yorlah Gâp kuăl đao tât ma lĕ rngôch phung gŭ ta neh ntu,’” Brah Yêhôva ma phung tahan lah pônây:

³⁰ “Yor nây, ăn may gơnh djôt nau ngơi aơ mbơh lor tâm rdâng đah khân păng: ‘Bơh ntŭk prêh ta klơ, Brah Yêhôva hŏ nter troh, Păng hŏ ngơi, bơh ntŭk kloh ueh Păng nter huy tâm rdâng đah phung biăp Păng, Păng ntơm ngơi kuăl nâm bu phung jot play krăk ƀâu, Tâm rdâng đah lĕ rngôch phung gŭ ta neh ntu.

³¹ Nau ngrông ngloh mra tât nglĕ dŭt rplay neh; Yorlah Brah Yêhôva tâm rdâng đah lĕ rngôch bri dak, Phat dôih lĕ rngôch nglay săk, Jao phung mhĭk ăn ma đao,’ Brah Yêhôva lah pônây.

³² Brah Yêhôva ma phung tahan lah: ‘Aơ, nau mhĭk mra lam ntŭk Bơh bri dak aơ rlet ma bri dak êng, Du rơh sial phŭt hâu ngăn văch tât Tă bơh ntŭk ngai ngăn ta neh ntu.’

³³ Tâm nar nây, săk phung khĭt Brah Yêhôva nkhĭt khĭt mra bêng lam măt neh. Mâu geh bunuyh nhĭm vơl mâu lah rgum gay tâp brôi, mâu lah rgum tay gay ma tâp brôi; khân păng jêng buh ta klơ măt neh!

³⁴ Hơi phung rmăk biăp, nhĭm vơl hom, ntơm ngơi vah vơl hom! Ơ phung kôranh phung biăp, rlă hom tâm ŭnh buh! Yorlah nar bu sreh nkhĭt khân may, nar bu ƀư nchah rai pru pra hŏ tât jêh, Khân may mra cha lôt nâm bu du mlâm yăng khlay.

³⁵ Phung rmăk biăp mâu hôm geh trong du der ôh, Phung kôranh leo phung biăp joi trong klaih mâu dơi lĕ.

³⁶ Ri, nau lŭng nter phung chiăp biăp, Nau nhĭm vơl phung kôranh leo phung biăp! Yorlah Brah Yêhôva ƀư rai ndrêch gơ̆ khân păng,

³⁷ Đơ ndrêch gơ̆ đăp mpăn hŏ jêng bri hŏng Yor nau ji nuih Brah Yêhôva.

³⁸ Nâm bu yau mŭr luh bơh trôm, Yorlah neh khân păng hŏ jêng nau tâm rmot Tâm dâng mpiăt đao tŭn jot, Jêh ri nau ji nuih hâu ngăn.”