Yêrêmi 24 - Nau Brah Ndu Ngơi 2023

Bar mlâm bĭ play rvi

¹ Brah Yêhôva ăn gâp saơ bar mlâm bĭ play rvi dơm panăp ngih Brah Yêhôva. Nau aơ tât geh jêh Nêbukatnetsar, hađăch Babilôn, nhŭp Y-Jêkônia kon bu klâu Y-Jêhôjakim, hađăch Yuđa, ndrel ma phung kôranh bri Yuđa, phung blau rhăk jêh ri phung chiăr luh bơh Yêrusalem, njŭn leo ma bri Babilôn ƀư jêng bu nă.

² Du mlâm bĭ geh play rvi ueh ngăn, nâm bu play rvi dŭm bôk yan; bi bĭ êng dơm play rvi mhĭk ngăn, mhĭk ngăn kŏ tât bu mâu dơi sa ôh.

³ Brah Yêhôva ôp ma gâp: “Moh ndơ may saơ, ơ Y-Yêrêmi?” Gâp lah: “Gâp saơ play rvi, lĕ play rvi ueh ri ueh ngăn, bi ma play rvi mhĭk ri mhĭk ngăn, mhĭk kŏ tât mâu dơi sa ôh.”

⁴ Nôk aơ geh nau Brah Yêhôva lah ma gâp:

⁵ “Yêhôva Brah Ndu phung Israel lah pô aơ: ‘Nâm bu play rvi ueh aơ, Gâp mra mât mray jêh ri ƀư nau ueh uĭn ăn ma phung bu nă tă bơh bri Yuđa, jêng phung Gâp hŏ njŭn leo jêh bơh ntŭk aơ ăn khân păng hăn rlet ma bri Kaldê.

⁶ Gâp mra ntreng măt tât ma khân păng, ƀư nau ueh ma khân păng jêh ri njŭn leo khân păng plơ̆ sĭt ma bri aơ. Gâp mra ndâk njêng mâu di ƀư rai ôh; mra brôi tăm mâu di rôk lơi ôh.

⁷ Gâp mra ăn ma khân păng nuih n'hâm gĭt năl Gâp jêng Brah Yêhôva. Khân păng mra ƀư ƀon lan Gâp jêh ri Gâp mra ƀư Brah Ndu khân păng, yorlah khân păng mra lĕ nuih n'hâm plơ̆ sĭt tay ma Gâp.’

⁸ Brah Yêhôva lah: ‘Ƀiălah, tâm ban bunuyh ƀư ma play rvi mhĭk, mhĭk kŏ tât bu mâu dơi sa ôh, pônây lĕ ăt Gâp mra ƀư ma Y-Sêdêkia, hađăch Yuđa, phung kôranh, phung ƀon lan hôm e klen bơh Yêrusalem dôl gŭ tâm bri aơ, jêh ri phung dôl hôm gŭ rêh ntŭk bri Êjipt pônây lĕ.

⁹ Gâp mra njêng ăn khân păng plơ̆ jêng nau nkrit, du nau mhĭk tât ma lĕ rngôch ƀon bri hađăch ta neh ntu; du nau prêng, du nau bu gơm mưch, du nau ngơi mhĭk, du nau bu rak rtăp tâm lĕ rngôch ntŭk Gâp mprơh khân păng tât.

¹⁰ Gâp mra đă đao, nau sât ji ngot, nau ji tưp tât ta nklang khân păng, kŏ tât bu mra ƀư rai lĕ bơh neh Gâp hŏ ăn jêh ma khân păng jêh ri ma phung chô yau khân păng.’”