Yêrêmi 23 - Nau Brah Ndu Ngơi 2023

Kâp gân ma nar kăndơ̆

¹ Brah Yêhôva lah: “Rêh ni ngăn ma phung rmăk biăp ƀư rai jêh ri ƀư nchah rai pru pra biăp tâm ndrêch gơ̆ Gâp!

² Yor nây, aơ jêng nau Yêhôva Brah Ndu phung Israel prăp ăn ma phung rmăk biăp chiă uănh phung ƀon lan Gâp: ‘Khân may hŏ ƀư nchah rai pru pra jêh biăp Gâp, mprơh du jêh ri mâu njrăng ma khân păng. Aơ, Gâp mra rkêng tôr iăt tâm rdâng đah khân may yor nau mhĭk khân may ƀư jêh,’ Brah Yêhôva lah pônây.

³ Gâp nơm mra rgum biăp hôm klen luh bơh lĕ rngôch bri dak Gâp hŏ mprơh jêh khân păng tât. Gâp mra njŭn khân păng plơ̆ sĭt ma ndrêch gơ̆ khân păng nơm; khân păng mra bĭk rơ̆ dŭt âk ngăn.

⁴ Gâp mra dơm phung rmăk biăp gay chiăp leo khân păng jêh ri khân păng mâu hôm klach, mâu lĕ rdja klach krit đŏng ôh, jêh ri mâu mra nhhơt roh du mlâm biăp lĕ,” Brah Yêhôva lah pônây.

N'gĭng nau sŏng srăng ăn ma Đavit

⁵ Brah Yêhôva lah: “Aơ, lĕ nar mra tât, Gâp mra ăn n'hao ma Y-Đavit du N'gĭng Sŏng Srăng; Păng mra chiă uănh nâm bu du huê hađăch, gŭ ngao ma nau blau mĭn, Mra ƀư ma nau sŏng nau di tâm bri dak.

⁶ Tâm rô̆ hađăch nây, phung Yuđa mra dơi geh nau tâm rklaih; Phung Israel mra gŭ rêh đăp rmên. Ntơ amoh ma Nơm nây jêng: ‘Brah Yêhôva nau sŏng srăng he!’”

⁷ Brah Yêhôva lah: “Yor nây, aơ, nar mra tât, phung bunuyh mâu mra hôm lah đŏng ôh: ‘Tĭng nâm Brah Yêhôva gŭ rêh mro mrăng, jêng Nơm hŏ njŭn jêh phung ƀon lan Israel du luh bơh bri Êjipt.’

⁸ Ƀiălah bu mra lah: ‘Tĭng nâm Brah Yêhôva gŭ rêh mro mrăng, jêng Nơm hŏ njŭn jêh noi deh ngih Israel sĭt bơh mpeh pa lơ, bơh lĕ rngôch bri dak Păng hŏ mprơh jêh khân păng tât.’ Khân păng mra gŭ tâm bri khân păng nơm.”

Phung mbơh lor nklă

⁹ Ma lĕ nơm mbơh lor: Nuih n'hâm gâp lĕ nchah rai; Nting nđăng Gâp lêt rgănh; Gâp nâm bu bunuyh nhŭl ndrănh, Nâm bu bunuyh nhŭl ndrănh hâu ngăn yor ndrănh, Yor Brah Yêhôva Yor lĕ rngôch nau kloh ueh Păng.

¹⁰ Bri dak bêng ma phung văng tĭr; Geh nau rak rtăp rĭ dĭng bri dak geh nau rngot rvê, Lĕ rngôch ndrêch gơ̆ tâm bri rdah kro da dê jêh. Trong khân păng hăn jêng nau kue, Nau dơi khân păng djôt jêng nau mâu di.

¹¹ Brah Yêhôva lah: “Nơm mbơh lor nđâp kôranh ƀư brah mra rai da dê, Gâp saơ nau mhĭk khân păng tâm nklang ngih Gâp.

¹² Yor nây trong khân păng Mra jêng nâm bu trong mbĭr prah tâm nau ngo, Bu mra mprơh khân păng lăp jêh ri chêh prah ta nây. Yorlah tât năm tâm rmal, Gâp mra ăn nau ji tưp ma khân păng,” Brah Yêhôva lah pônây.

¹³ “Gâp hŏ saơ jêh nau brŭt ndrăng Phung nơm mbơh lor Samari; Khân păng mbơh lor ma amoh brah Baal, Ƀư nhhơt trong ma ƀon lan Israel Gâp.

¹⁴ Ƀiălah nklang phung mbơh lor gŭ ta Yêrusalem, Gâp hŏ saơ jêh nau mhĭk: Khân păng ƀư tih văng tĭr, chuat hăn tâm nau mƀruh; Khân păng ƀư ntop nau dăng ktang ăn ma ti phung ƀai, Kŏ tât mâu geh bunuyh chalơi nau mhĭk khân păng. Gâp uănh lĕ rngôch khân păng nâm bu Sôdôm, Jêh ri phung ƀon lan gŭ ta Yêrusalem nâm bu Gômôrơ.”

¹⁵ Yor nây, Brah Yêhôva ma phung tahan lah ma phung mbơh lor nây pô aơ: “Ri, Gâp mra ăn phung ƀon lan aơ sa dak si tăng Jêh ri ăn nhêt dak kăch, Yorlah lĕ phung mbơh lor gŭ ta Yêrusalem Hŏ ƀư ăn nau rai yot lam ăp bri dak.”

¹⁶ Brah Yêhôva ma phung tahan lah: “Lơi ta iăt ôh nau phung mbơh lor mbơh ma khân may. Khân păng srih nau kâp gân ma nau dơm dam Ngơi nau tâm saơ yor bơh khân păng nơm mĭn êng Mâu di bơh trôm mbung Brah Yêhôva lah ôh.

¹⁷ Khân păng lah ƀaƀơ đah phung tâm rmot ma Gâp pô aơ: ‘Brah Yêhôva lah: Khân may mra geh nau đăp mpăn.’ Jêh ri lah ma phung geh nuih n'hâm dăng: ‘Mâu geh nau mhĭk mra tât ma khân may ôh.’

¹⁸ Pônây, mbu dơi dâk tâm nau tâm rgum Brah Yêhôva, Gay mêt uănh jêh ri iăt nau Păng? Mbu hŏ rkêng tôr jêh ri iăt tĭng nau Păng ngơi?

¹⁹ Aơ, nau phŭt sial Brah Yêhôva Nây jêng nau Păng ji nuih hŏ hao ntoh, Nau phŭt sial vănh blông, Vănh trŭnh ta bôk phung ƀai.

²⁰ Nau Brah Yêhôva ji nuih mâu mra rngơt ôh Kŏ tât nôk Păng ƀư jêh ri lôch Lĕ nau mĭn tâm nuih n'hâm Păng. Tâm lĕ nar lôch dŭt, Khân may gĭt rbăng rah vah nau nây.

²¹ Gâp mâu prơh hăn phung mbơh lor aơ ôh, Ƀiălah khân păng hŏ nchuăt; Gâp mâu lah ma khân păng, Ƀiălah khân păng hŏ mbơh lor.

²² Tơlah khân păng dâk tâm nau Gâp tâm rgum, Pôri hŏ mbơh nau Gâp ăn ƀon lan Gâp, Kơl ƀon lan Gâp chalơi trong mhĭk, Jêh ri der ngai lĕ nau ƀư mhĭk.”

²³ Brah Yêhôva lah: “Di lĕ Gâp jêng Brah Ndu gŭ dăch mâu di jêng Brah Ndu gŭ ngai bơh?”

²⁴ Brah Yêhôva lah: “Mbu dơi nde krap păng nơm tâm ntŭk ndâp gay Gâp mâu dơi saơ lĕ?” Brah Yêhôva lah đŏng: “Mâu di hĕ Gâp mpơl ăp ntŭk, ăp lĕ ndâr trôk jêh ri neh ntu hĕ?

²⁵ Gâp hŏ tăng jêh nau phung mbơh lor aơ ngơi. Khân păng hŏ tâm amoh Gâp mbơh lor nklă pô aơ: ‘Gâp saơ nau mbơi jêh! Gâp saơ nau mbơi jêh!’

²⁶ Ndah jŏ lĕ phung mbơh lor mƀruh aơ hôm thoi đŏng sŏk đŏng nuih n'hâm mƀruh nchơt mbơh lor nklă mƀruh? Kŏ tât ndah jŏ khân păng ăt lah luh lĕ nau ngơi ndơm tă bơh nuih n'hâm khân păng?

²⁷ Nau nây khân păng tâm nkoch ndrăng khân păng nơm lĕ nau mbơi, khân păng mĭn ŭch ƀư ma phung ƀon lan Gâp chuêl amoh Gâp nâm bu chô yau khân păng hŏ yor brah Baal chuêl amoh Gâp.

²⁸ Moh nơm mbơh lor geh nau mbơi, nkoch hom nau mbơi nây! Mbu nơm hŏ dơn jêh nau Gâp, răp jăp hom mbơh tay nau Gâp! Rhe dơi lĕ tâm rlŭk đah ba ƀlê?” Brah Yêhôva lah pônây.

²⁹ “Nau Gâp ngơi mâu di nâm bu ŭnh, nâm bu me nôp tôp nchah lŭ lĕ?” Brah Yêhôva lah pônây.

³⁰ Yor nây, aơ, Brah Yêhôva lah: “Aơ, Gâp tâm rdâng đah phung mbơh lor phung ntŭng ndrăng khân păng nơm nau Gâp ngơi.”

³¹ Brah Yêhôva lah: “Aơ, Gâp tâm rdâng đah phung mbơh lor phung dŏng mpiăt khân păng jêh ri lah: ‘Brah Yêhôva lah.’”

³² Brah Yêhôva lah: “Aơ, Gâp tâm rdâng đah phung dŏng mbơi mƀruh jêh ri mbơh lor. Khân păng nkoch nau mbơi jêh nây dŏng nau ngơi mƀruh, blă blơ ƀư ăn ma ƀon lan Gâp vĭ nhhơt, ƀiălah Gâp mâu prơh hăn, ăt mâu lĕ ntrŭnh khân păng. Khân păng mâu geh nau khlay ôh ăn ma phung ƀon lan aơ,” Brah Yêhôva lah pônây.

Nau mbơh lor nklă mƀruh

³³ “Dôl phung ƀon lan aơ, mâu lah du huê nơm mbơh lor, mâu lah du huê kôranh ƀư brah, ôp may pô aơ: ‘Moh ndơ Brah Yêhôva ƀư jâk?’ May plơ̆ lah: ‘May nơm yơh jêng ƀư jâk,’ jêh ri Brah Yêhôva lah: ‘Gâp mra chalơi lĕ khân may.’

³⁴ Bi ma nơm mbơh lor, kôranh ƀư brah, mâu lah du huê tâm phung ƀon lan lah: ‘Nau Brah Yêhôva ƀư jâk,’ pôri Gâp mra tâm rmal bunuyh nây ndrel ma phung tâm ngih vâl păng.

³⁵ Pônây, aơ jêng nau ăp nơm ôp phung chiau meng păng jêh ri ăp nơm ôp ma oh nâu păng: ‘Mâm nau Brah Yêhôva hŏ plơ̆ lah jêh?’ Mâu lah ‘Mâm nau Yêhôva lah jêh?’

³⁶ Nôk nây, khân may mâu dơi ngơi tât, ‘nau ngơi bơh Brah Yêhôva ƀư jâk’ đŏng ôh; yorlah bu nơm ngơi jêng jâk ăn bunuyh nây, yorlah khân may hŏ nsak nkhăng nau Brah Ndu gŭ rêh mro mrăng, jêng Brah Yêhôva ma phung tahan, Brah Ndu he.

³⁷ Pônây, may ôp hom ma nơm mbơh lor pô aơ: ‘Mâm nau Brah Yêhôva hŏ plơ̆ lah jêh ma may?’ mâu lah ‘Mâm nau Brah Yêhôva lah jêh ma may?’

³⁸ Ƀiălah tơlah khân may lah: ‘Nau Brah Yêhôva ƀư jâk,’ pô aơ Brah Yêhôva lah: Yorlah khân may hŏ ngơi, ‘Nau Brah Yêhôva ƀư jâk,’ dôl Gâp prơh bunuyh hăn tât jêh ri ntĭnh khân may mâu dơi lah ôh ‘Nau rah Yêhôva ƀư jâk.’

³⁹ Yor nây Gâp mra chuêl khân may jêh ri lơi khân may nđâp ma ƀon Gâp hŏ ăn ma khân may jêh ri phung chô yau khân may ngai bơh măt Gâp.

⁴⁰ Gâp mra ƀư ma khân may geh nau prêng ƀaƀơ, bu nduyh n'ho ro, mâu dơi chuêl ôh.”