Yêrêmi 22 - Nau Brah Ndu Ngơi 2023

Nau mbơh lor ma hađăch Yuđa

¹ Brah Yêhôva lah: “Hăn trŭnh hom rlet ma ngih hađăch Yuđa, ta nây may mbơh nau ngơi aơ.

² May ngơi hom: ‘Hơi hađăch Yuđa, nơm dôl gŭ ta sưng hađăch Đavit! Hađăch ndrel ma phung oh mon jêh ri phung ƀon lan hađăch jêng phung luh lăp ta mpông ƀon, rkêng hom tôr iăt nau Brah Yêhôva!’

³ Brah Yêhôva lah: ‘Ƀư hom nau sŏng jêh ri nau di, rklaih bunuyh bu tŭn jot bơh ti nơm mhĭk. Mâu ƀư nau tih mâu lah nau ƀai ôh ma phung bu năch, ma lĕ phung kon đơi ma phung bu ur ndrô. Lơi ƀư pling mham ma nơm mâu geh nau tih ta ntŭk aơ.

⁴ Tơlah khân may tông bâr nanê̆ ngăn ma nau ngơi aơ, pôri mra geh phung hađăch ndơn gŭ ta sưng hađăch Y-Đavit klơ ndeh seh jêh ri ncho klơ seh, ndrel ma phung oh mon jêh ri phung ƀon lan lăp luh tâm lĕ mpông pêr ngih hađăch aơ.

⁵ Ƀiălah tơlah khân may mâu ŭch rkêng tôr iăt ôh nau aơ, Brah Yêhôva lah, Gâp ton nchŏng ma săk Gâp nơm pô aơ ngih hađăch aơ mra jêng rngot njăp.’

⁶ Aơ jêng nau Brah Yêhôva lah ma ngih hađăch phung Yuđa: ‘Gâp uănh may jêng nâm bu Gilêat, Nâm bu n'gơn nâm Liban, Ƀiălah nanê̆ Gâp mra njêng may bri rdah, Lĕ ƀon mâu geh bunuyh gŭ ôh.

⁷ Gâp mra prăp rơm ndrăp phung ƀư rai geh ndơ tâm lơh Ŭch nkhĭt may; Khân păng mra kăl lĕ tơm si sêdar dŭt ueh uĭn may geh Jêh ri klŭp tâm ŭnh.’

⁸ Lĕ ntil mpôl bunuyh hăn rgăn ƀon aơ, tâm ôp ndrăng khân păng: ‘Mâm ƀư Brah Yêhôva hŏ lơh nâm bu pônây ma ƀon toyh aơ?’

⁹ Mra geh bunuyh plơ̆ lah: ‘Yorlah phung ƀon lan tâm ƀon nây hŏ chalơi jêh nau tâm rnglăp đah Yêhôva Brah Ndu khân păng, yơk mbah jêh ri rhŏ ma lĕ brah êng.’

¹⁰ Lơi ta nhĭm ôh ăn ma bunuyh lĕ khĭt jêh, Mâu lĕ nhĭm vơl ma khân păng; Ƀiălah nhĭm hom ma nơm du hăn, Yorlah păng mâu mra lŏ plơ̆ sĭt, Mâu hôm saơ ntŭk tâp sok koh klŏ păng nơm đŏng ôh.

¹¹ Yorlah Yêhôva lah ma Y-Salum, kon bu klâu Y-Jôsia hađăch Yuđa, nơm chiă uănh thoi ntrok mbơ̆ păng jêng Y-Jôsia, jêh ri jêng bunuyh hŏ du jêh bơh ntŭk aơ nâm bu pô aơ: ‘Hađăch nây mâu mra plơ̆ ta nĕ đŏng ôh,

¹² ƀiălah mra khĭt ntŭk n'gor bu njŭn leo jêng bu nă jêh ri păng mâu hôm saơ đŏng ôh bri aơ.’

¹³ Rêh ni ngăn ma nơm ndâk ngih păng ma nau kue, Ndâk jrô ma nau mâu sŏng; Dŏng bunuyh chiau meng pah kan dơm dam hĕ, Mâu lĕ nkhôm kan ăn ma khân păng.

¹⁴ Păng lah: ‘Gâp mra ndâk du mlâm ngih toyh, Ndrel ma âk jrô huy.’ Jêh nây păng ƀư âk mpông bloh, Mpir ndop ma tơm si sêdar, Jêh ri mhĭng nhom ma dak êr chăng.

¹⁵ Di lĕ may dơi ƀư hađăch, Yorlah may tâm rlong ndâk ngih ma tơm si sêdar lĕ? Mâu di hĕ mbơ̆ may hŏ nhêt sa Jêh ri ƀư nau sŏng ma nau di, Pôri dơi geh nau ndrŏng ktang nây hĕ?

¹⁶ Păng phat dôih ma nau sŏng ăn ma phung o ach jêh ri phung pưt kƀah, Pôri dơi geh nau ndrŏng ktang. Brah Yêhôva lah: ‘Mâu di hĕ nâm bu pônây jêng nau gĭt năl ma Gâp?

¹⁷ Ƀiălah măt jêh ri nuih n'hâm may Knŏng ŭch sŏk drăp nkhôm ma nau mâu sŏng, Ƀư pling mham nơm mâu geh tih ôh, Ƀư nau tŭn jot jêh ri djơh mhĭk.’”

¹⁸ Yor nây, ma nau Y-Jêhôjakim, kon bu klâu Y-Jôsia, hađăch Yuđa, Brah Yêhôva lah: “Bu mâu mra nhĭm vơl ôh ma păng: ‘Ơ nâu, nâu gâp ơi!’ mâu lah ‘Ơ yuh, yuh gâp ơi!’ Bu mâu lĕ klâng rngot ma păng: ‘Ơ kôranh, kôranh gâp!’ Mâu lah ‘Ơ nau chrêk rmah, nau chrêk rmah păng!’

¹⁹ Bu mra tâp păng nâm bu du mlâm seh bri, Bu uih jêh ri mƀăr lơi padih mpông ƀon Yêrusalem.

²⁰ Hao hom nâm Liban jêh ri lŭng nter, Sŏk hom bâr nter vơl ta klơ bri Basan; Kuăl nter klơ yôk ntŭk Abarim! Yorlah lĕ rngôch phung may rŏng lĕ rai lôch da dê.

²¹ Gâp hŏ ngơi jêh ma may dôl nôk geh nau mpăn rlêk, Ƀiălah may lah: ‘Gâp mâu ŭch gŭ iăt ôh.’ Ntơm bơh jê̆, nau rêh jêng may hŏ nâm bu pônây, May mâu mâp tông bâr ma Gâp ôh.

²² Sial mra đô̆ rdu lĕ rngôch phung rmăk biăp may, Phung may rŏng mra hăn jêng bu nă; Nôk nây, may mra prêng jêh ri uh ah Yor lĕ rngôch nau mhĭk may.

²³ May jêng nơm gŭ ta nklang bri Liban Gŭ đăp mpăn tâm lĕ ngih toyh ma tơm si sêdar, Dôl nau ji tât ta may, may mra rđêng nđor, Ji kruăt nâm bu du huê bu ur dôl deh kon!”

²⁴ Brah Yêhôva lah: “Nâm bu Gâp gŭ rêh mro mrăng, nđâp lah Y-Jêhôjakin, kon bu klâu Y-Jêhôjakim, hađăch Yuđa, jêng rgên chrăk ta ti ma Gâp, Gâp ăt doh lơi may.

²⁵ Gâp mra jao may tâm ti phung ŭch ƀư mhĭk nau rêh may, tâm ti phung may klach, nây jêng tâm ti Nêbukatnetsar, hađăch Babilôn jêh ri tâm ti bunuyh Kaldê.

²⁶ Gâp mra mprơh may jêh ri me deh ma may tâm bri êng, mâu di jêng ntŭk tâp sok koh klŏ may ôh, jêh ri may mra khĭt ta nĕ.

²⁷ Bi ma ntŭk neh huêng khân păng ŭch plơ̆ sĭt, mâu mra dơi plơ̆ sĭt.”

²⁸ Pônây di lĕ Y-Jêhôjakin aơ jêng yăng chah rai jêh lĕ bu mưch rmot hĕ? Yăng mâu geh nơm ŭch rŏng ôh? Mâm ƀư hađăch nây jêh ri lĕ rngôch noi deh păng bu mƀăr lơi, Bu klŭp mƀăr tâm du bri khân păng mâu gĭt năl ôh?

²⁹ Ơ neh, neh, neh! Iăt hom nau Brah Yêhôva.

³⁰ Brah Yêhôva lah pô aơ: “Nchih dơn hom bunuyh aơ jêng nâm bu nơm mâu geh kon, Du huê bunuyh lĕ nau rêh mâu geh nau jêng; Yorlah noi deh păng mâu geh du huê geh nau jêng, Dơi gŭ ta sưng hađăch Đavit Jêh ri chiă uănh tâm n'gor Yuđa đŏng ôh!”