Yêrêmi 21 - Nau Brah Ndu Ngơi 2023

Yêrusalem bu mra ƀư rai

¹ Aơ jêng nau Brah Yêhôva lah ma Y-Yêrêmi nôk hađăch Sêdêkia prơh Y-Pashur, kon bu klâu Y-Malkija, jêh ri Y-Sêphania, kon bu klâu kôranh ƀư brah Y-Maseya, tât ma păng jêh ri lah:

² “Ôp hom ma Brah Yêhôva kơl ma hên yorlah Nêbukatnetsar, hađăch Babilôn, văch tât gay tâm lơh đah hên; gĭt lah Brah Yêhôva yor ma hên mra ƀư lĕ rngôch kan khlay Păng jêh ri ƀư ăn ma hađăch nây du bơh hên.”

³ Y-Yêrêmi plơ̆ lah: “Ăn khân may lah ma Y-Sêdêkia pô aơ:

⁴ ‘Yêhôva Brah Ndu Israel lah: Aơ, Gâp mra plăch rlơ̆ lơi ndơ tâm lơh khân may dôl djôt tâm ti gay tâm lơh mprơh lơi hađăch Babilôn jêh ri bunuyh Kaldê aƀaơ nchueng jŭm khân may ta padih mpêr ƀon, jêh ri rgum khân păng ta nklang ƀon aơ.

⁵ Gâp nơm yơh, tâm nau duh nuih, ji nuih jêh ri nau ji nuih hâu ngăn ngên mra yơr mpang ti pơk huy jêh ri tur ti dăng ktang tâm lơh tâm rdâng dah khân may.

⁶ Gâp mra dong phung gŭ tâm ƀon aơ, lĕ rngôch bunuyh nđâp ma mpô mpa; khân păng mra khĭt ma nau ji tưp hâu ngăn.’

⁷ Brah Yêhôva lah: ‘Jêh nây, Gâp mra jao Y-Sêdêkia, hađăch Yuđa, phung oh mon păng jêh ri phung ƀon lan tâm ƀon, nâm bu ntĭt lĕ rngôch phung hôm klen pakơi nau ji tưp, tak đao, nau sât ji ngot, tâm ti Nêbukatnetsar, hađăch Babilôn, tâm ti phung rlăng khân păng jêh ri ma phung joi ƀư ngroh lơi nau rêh khân păng. Nêbukatnetsar mra lơh khân păng ma mpiăt đao, mâu mra yô̆ an, ti mâu djân, mâu geh nau rŏng.’

⁸ May ngơi hom ma phung ƀon lan aơ: ‘Brah Yêhôva lah: Aơ, Gâp dơm tanăp măt khân may trong njŭn tât ma nau rêh jêh ri trong njŭn tât ma nau khĭt.

⁹ Mbu nơm hôm gŭ tâm ƀon aơ mra khĭt yor ma đao, ma nau sât ji ngot, jêh ri ma nau ji tưp; ƀiălah mbu nơm du luh bơh ƀon jêh ri luh jao săk khân păng nơm ma bunuyh Kaldê dôl gŭ nchueng mra rêh; bunuyh nây ăt klaih săk jêh ri dơi prăp nau rêh păng nơm.’

¹⁰ Brah Yêhôva lah: ‘Yor Gâp hŏ tâm nal jêh nau ƀư mhĭk ntrok ma nau ƀư ueh ta ƀon aơ, yor nây ƀon aơ mra jao tâm ti hađăch Babilôn, jêh ri hađăch nây mra su ƀon aơ ma ŭnh.’

¹¹ Ma ngih hađăch Yuđa, may ngơi hom: ‘Iăt hom nau Brah Yêhôva ngơi.

¹² Hơi ngih Y-Đavit! Brah Yêhôva lah: Ăp ôi ƀư hom nau sŏng srăng, Rklaih hom bunuyh bu tŭn jot tă bơh ti nơm tŭn jot, Klach lah yor khân may ƀư nau mhĭk, Ma nau Gâp ji nuih hit nâm bu ŭnh.’ Mâu geh nơm dơi nhhât ôh.

¹³ Brah Yêhôva lah: ‘Hơi phung ƀon lan gŭ tâm rlŭng, Hơi lŭ toyh tâm neh lâng ri, Gâp tâm rdâng đah khân may, Jêng phung bunuyh nănh ngơi: Mbu nơm mra tât tâm rdâng đah gâp? Mbu nơm dơi lăp ntŭk he krap?’”

¹⁴ Brah Yêhôva lah: “Gâp mra tâm rmal khân may tĭng nâm kan khân may ƀư, Gâp mra sŭnh ŭnh tâm bri, Ŭnh mra sa lĕ rngôch ndơ gŭ văr jŭm păng.”