Yêrêmi 20 - Nau Brah Ndu Ngơi 2023

Y-Yêrêmi jêh ri Y-Pashur

¹ Y-Pashur, kon bu klâu kôranh ƀư brah Y-Imer, ƀư kôranh chiă uănh ngih Brah Yêhôva, hŏ tăng Y-Yêrêmi mbơh lor lĕ nau aơ.

² Y-Pashur dong nơm mbơh lor Y-Yêrêmi, nkông păng tâm mpông pêr Benjamin, jêng mpông pêr mpeh klơ tâm ngih Brah Yêhôva.

³ Nar pakơi, Y-Pashur ntĭnh doh nkông ăn ma Y-Yêrêmi. Y-Yêrêmi lah ma păng: “Brah Yêhôva mâu ntơ amoh may jêng Y-Pashur đŏng ôh ƀiălah ntơ may jêng Magor Misabip.

⁴ Yorlah Brah Yêhôva lah: ‘Aơ, Gâp mra ƀư may jêng nau klach krit ngăn ăn may nơm jêh ri ma lĕ rngôch mĭt jiăng may. Khân păng mra cha lôt khĭt tâm dâng đao phung rlăng jêh ri măt may nơm saơ nau nây. Gâp mra jao lĕ rngôch phung ƀon lan Yuđa tâm ti hađăch Babilôn, hađăch nây mra njŭn leo khân păng jêng bu nă ma bri Babilôn jêh ri dŏng đao nkhĭt khân păng.

⁵ Gâp mra jao lĕ rngôch drăp ndơ tâm ƀon, lĕ rngôch ndơ, ăp ndơ khlay, tâm ban lĕ rngôch jay ndơ khlay phung hađăch Yuđa tâm ti phung rlăng khân păng. Phung rlăng mra sŏk ntŭng, sŏk pit jêh ri djôt leo ma bri Babilôn.

⁶ Bi may, hơi Y-Pashur, may nơm jêh ri phung gŭ tâm ngih may bu mra ƀư jêng bu nă da dê. May mra tât ma Babilôn, khĭt jêh ri tâp ta nây ndrel ma lĕ rngôch phung mĭt jiăng may, jêng phung bunuyh hŏ iăt nau mbơh lor nklă may.’”

Nau Y-Yêrêmi vơl nduyh

⁷ Ơ Brah Yêhôva, May hŏ nsŭk nsôr jêh ma gâp, Gâp lĕ geh nau May nsŭk nsôr; May ktang lơn ma gâp, Jêh ri May hŏ dơi jêh. Lĕ nar gâp ƀư ƀaƀơ nau gơm ăn ma neh ntu, Ăp bunuyh mưch rmot ma gâp.

⁸ Ăp tơ̆ gâp ngơi gâp mra lah huy, Gâp nter huy, “Nau ƀai jêh ri ƀư rai!” Yorlah nau Brah Yêhôva Rĭ dĭng bu mưch jêh ri bêk prêng ma gâp ăp nar.

⁹ Tơlah gâp ngơi: “Gâp mâu mra ngơi tât ma Păng đŏng ôh; Gâp mâu mra tâm amoh Păng đŏng ôh,” Nau May ngơi nâm bu chiông ŭnh su hit nuih n'hâm gâp, Put ndâp tâm nting gâp, Gâp hŏt rgănh yor nau ât rklăk, Mâu hôm dơi dơn ôh.

¹⁰ Yorlah gâp tăng nau ngơi ƀŭk dŭk suyh: “Nau krit klach puăn mpeh! Phong hom! Ăn he phong hom păng!” Lĕ rngôch phung mĭt jiăng may Ŭch ma gâp chêh prah da dê. Khân păng lah: “Gĭt lah păng tŭp tâm nau ndơm, He mra dơi đah păng, Jêh ri plơng bôk păng.”

¹¹ Ƀiălah Brah Yêhôva gŭ ndrel ma gâp nâm bu du huê tahan janh ktang ma klach ngăn; Yor nây phung ƀư mhĭk ma gâp mra chêh prah, Mâu mra dơi đah gâp ôh. Khân păng mâu mra dơi ôh Jêh ri prêng hâu ngăn ngên, Nau prêng n'ho ro, Mâu dơi chuêl ôh.

¹² Ơ Brah Yêhôva ma phung tahan, May jêng Nơm sek uănh bunuyh sŏng srăng, Nơm dơi uănh tâm nuih n'hâm jêh ri tâm nau mĭn. Ăn gâp saơ nau May har plơng bôk ma khân păng, Yorlah gâp hŏ ngơi nkoch jêh kan gâp ma May.

¹³ Mprơ hom ma Brah Yêhôva, Tâm rnê hom ma Brah Yêhôva! Yorlah Păng hŏ tâm rklaih jêh huêng bunuyh o ach Bơh ti phung mhĭk.

¹⁴ Khư ma nau rak rtăp ăn ma nar bu deh ma gâp! Nar mê̆ deh ma gâp mâu khư dơi geh nau ueh uĭn!

¹⁵ Khư ma nau rak rtăp ăn ma bunuyh mbơh nau mhe ăn ma mbơ̆ gâp: “May geh du huê kon, du huê kon bu klâu!” Ƀư ăn ma mbơ̆ gâp bêng ma nau hâk maak.

¹⁶ Ăn ma bunuyh nây tâm ban lĕ rngôch ƀon toyh Brah Yêhôva hŏ ƀư rai jêh mâu djê̆ lê̆ nau yô̆ nđach ôh. Ơm ôi, păng tăng bâr kuăl rklaih; Tât nar nklang bôk, păng tăng troh nter rduh tâm lơh.

¹⁷ Yorlah mâu hŏ nkhĭt gâp bơh tâm ndŭl mê̆ Gay ma mê̆ gâp ƀư môch ăn ma gâp, Ntreo gâp du bông nau rêh.

¹⁸ Mâm ƀư gâp luh du bơh ndŭl mê̆ Gay saơ nau hŏt r'ah rngot rvê, Du bông nau rêh anh nau prêng?