Yêrêmi 19 - Nau Brah Ndu Ngơi 2023

Du mlâm yăng chah

¹ Brah Yêhôva lah: “May tât hom ntŭk nơm mon glah rvăt du mlâm yăng ma neh gŭch. Jêh nây may jă du huê bar hê phung kôranh bu ranh tâm phung ƀon lan jêh ri phung kôranh ƀư brah ranh rlau lơn hăn ndrel ma may

² tât ta rlŭng Ben Hinôm, kêng trong lăp mpông rsong. Ta nây, may mbơh hom lĕ nau Gâp lah ma may.

³ May lah hom: ‘Hơi lĕ phung hađăch Yuđa jêh ri phung gŭ ta ƀon Yêrusalem, rkêng hom tôr iăt nau Brah Yêhôva. Brah Yêhôva ma phung tahan, Brah Ndu Israel lah: Aơ, Gâp mra nkhŭt nau mhĭk jŭr ntŭk aơ, kŏ tât mbu nơm tăng nau ngơi nây mra ji tôr,

⁴ yorlah khân păng hŏ chalơi jêh Gâp, ƀư ntŭk aơ jêng ntŭk blă blơ. Ntŭk aơ, khân păng nhhơr ndơ ƀâu kah ma lĕ brah êng jêng lĕ brah ndơm dam khân păng nơm tâm ban ma phung chô yau khân păng, jêh ri lĕ phung hađăch Yuđa mâu mâp gĭt da dê. Khân păng hŏ ƀư jêh ntŭk aơ bêng ma mham mâu mâp geh nau tih ôh.

⁵ Khân păng hôm ndâk lĕ ntŭk prêh ăn brah Baal gay gŭch kon bu klâu khân păng ƀư mpa ƀư brah gŭch ma brah Baal. Nây jêng nau Gâp mâu mâp trŭnh, mâu ntĭm nti, jêh ri nuih n'hâm Gâp mâu lĕ prot mĭn tât.’

⁶ Yor nây, Brah Yêhôva lah: ‘Aơ, lĕ nar mra tât, ntŭk aơ bu mâu mra ntơ jêng Tôphet mâu lah rlŭng Ben Hinôm đŏng ôh, bu mra ntơ jêng Rlŭng Sreh Nkhĭt.

⁷ Ta ntŭk aơ, Gâp mra ƀư rai lơi nau ƀư nchră phung Yuđa jêh ri phung Yêrusalem, Gâp mra ăn ma khân păng cha lôt prah tâm dâng mpiăt đao tanăp phung rlăng, jêh ri tâm dâng ti ma phung joi ŭch ƀư rai nau rêh khân păng. Gâp mra jao săk jăn khĭt khân păng ƀư ndơ sa ăn ma sĭm klơ trôk jêh ri mpô mpa bri.

⁸ Gâp mra njêng ƀon aơ ma nau rai, ƀư nau gơm ma neh ntu; bunuyh prot rgăn hih rhâl da dê jêh ri gơm mưch yorlah lĕ rngôch nau sôt rmanh păng.

⁹ Gâp mra ƀư ăn khân păng sa puăch phung kon bu klâu kon bu ur khân păng nơm. Dôl rnôk bu nchueng jŭm, geh phung rlăng jêh ri phung joi ŭch ƀư rai nau rêh njŭn ma nau rêh ni, khân păng sa puăch ndrăng băl khân păng nơm.’

¹⁰ Jêh nây may dong nchah yăng tanăp phung bunuyh hăn ndrel ma may,

¹¹ jêh ri lah ma khân păng pô aơ Brah Yêhôva ma phung tahan lah: ‘Gâp mra dong nchah phung ƀon lan aơ jêh ri ƀon aơ nâm bu dong du mlâm yăng neh uk, mâu hôm dơi tâm njĭr tay đŏng ôh. Bu mra tâp ta Tôphet kŏ tât mâu hôm geh ntŭk tâp đŏng ôh.’

¹² Brah Yêhôva lah: ‘Gâp mra ƀư ma ntŭk aơ ndrel ma ƀon lan gŭ ta păng nâm bu pô nĕ; Gâp mra ƀư ăn ma ƀon aơ tâm ban Tôphet.

¹³ Ngih vâl ƀon Yêrusalem jêh ri lĕ rngôch ngih phung hađăch Yuđa, nây jêng lĕ rngôch ngih bu hŏ su jêh ndơ ƀâu kah yơk mbah ma lĕ mănh tâm trôk jêh ri hŏ ƀư ndơ nhhơr nhêt ăn ma lĕ brah êng ta klơ chor ngih, bu mra ƀư ƀơ̆ da dê tâm ban Tôphet.’”

¹⁴ Pakơi Y-Yêrêmi du bơh Tôphet, jêng ntŭk Brah Yêhôva mprơh păng hăn ngơi mbơh lor, păng gŭ dâk tâm ndring ngih Brah Yêhôva, jêh ri lah ma lĕ rngôch phung ƀon lan:

¹⁵ “Brah Yêhôva ma phung tahan, Brah Ndu phung Israel lah, lah: ‘Aơ, Gâp dăch ăn ma ƀon aơ jêh ri lĕ ƀon gŭ dăch ma lĕ rngôch nau mhĭk tât Gâp hŏ mbơh lor jêh, yorlah khân păng dăng bôk dăng trô ko mâu ŭch iăt ôh nau Gâp.’”