Yêrêmi 18 - Nau Brah Ndu Ngơi 2023

Nơm mon glah jêh ri neh uk

¹ Aơ jêng nau Brah Yêhôva lah ma Y-Yêrêmi:

² “May gơnh hom jŭr tâm ngih bunuyh mon glah, ta nây Gâp mra ăn may tăng bâr Gâp.”

³ Gâp hăn jŭr ro tâm ngih nơm mon glah, jêh ri aơ, păng dôl ƀư kan ta klơ du mlâm sưng rvah.

⁴ Tơlah glah ma neh uk dôl mon tâm ti păng lĕ djơh, păng mon tay njêng glah êng di ma nau mĭn păng nơm ŭch.

⁵ Nôk aơ, geh nau Brah Yêhôva lah ma gâp:

⁶ “Hơi ngih Israel, Gâp mâu dơi ƀư ma khân may nâm bu nơm mon glah aơ hĕ?” Brah Yêhôva lah: “Hơi ngih Israel, mâm neh uk gŭ tâm ti nơm mon glah, khân may gŭ tâm ti Gâp tâm ban pônây lĕ.

⁷ Dôl Gâp mbơh nau rôk tơm, ƀư nchah mâu lah ƀư rai lơi du bri dak mâu lah ma du ƀon bri hađăch êng nây,

⁸ ƀiălah tơlah bri dak Gâp tâm nal ma nau tâm rmal nây chalơi nau mhĭk pôri Gâp mra plơ̆ rgâl nau mĭn ƀư nau mhĭk ma khân păng.

⁹ Ăt geh tơ̆ Gâp mbơh nau ndâk njêng păng, brôi tăm du bri dak mâu lah du ƀon bri hađăch êng nây,

¹⁰ ƀiălah tơlah bri dak nây ƀư nau mhĭk tâm dâng măt Gâp, mâu iăt ôh bâr Gâp, pôri Gâp mra tâm rgâl nau mĭn ăn nau ueh uĭn ăn ma khân păng.

¹¹ Pônây, aƀaơ aơ may ngơi hom ma phung Yuđa jêh ri phung gŭ tâm ƀon Yêrusalem pô aơ: ‘Brah Yêhôva lah: Aơ, Gâp dôl tâm nal djôt nau mhĭk tât ăn ma khân may jêh ri dăp kan tâm rdâng đah khân may. Ăn nơm tâm khân may chalơi hom trong mhĭk jêh ri nkra tay trong ndrel ma lĕ kan khân may ƀư!’

¹² Ƀiălah khân păng lah: ‘Mâu khlay ôh! Hên mra hăn tay tĭng nâm dăp kan hên nơm; ăp nơm mra ƀư tĭng nâm nau dăng nuih n'hâm mhĭk păng nơm.’”

¹³ Yor ri, Brah Yêhôva lah: “Ôp hom tâm lĕ bri dak Geh nơm hŏ mâp tăng jêh nau tâm ban pônây lĕ? Bu ur druh Israel Hŏ ƀư du nau mhĭk toyh ngăn.

¹⁴ Mâp geh đŏng dak pler bri Liban Lêk hoch ta klơ n'gơn yôk lĕ? Mâu lah n'hor dak nđik hoch tât tă bơh ngai Suăt kro hêng lĕ?

¹⁵ Ƀiălah phung ƀon lan Gâp hŏ chuêl jêh Gâp, Su ndơ ƀâu kah ăn ma phung brah, Jêng brah ƀư ăn ma khân păng chêh prah ta trong hăn, Tâm lĕ trong hăn bơh kăl e, Gay ma khân păng hăn tâm lĕ trong Mâu hŏ dơi ƀư ôh.

¹⁶ Bri dak khân păng jêng ntŭk rngot njăp, Ƀư nau gơm mưch mro mrăng ma neh ntu; Nơm sĭt nơm hăn hih rhâl da dê Knŏng hôm gĭt rteh bôk.

¹⁷ Gâp mra ƀư ăn khân păng nchah rai pru pra tanăp măt phung rlăng Nâm bu sial tă luh nar khôm rdu. Tâm nar khân păng geh nau ji tưp, Gâp rle măt mâu uănh ma khân păng.”

Nau nchră tâm rdâng ma Y-Yêrêmi

¹⁸ Khân păng lah: “Kay lŏng, he nchră hom nau tâm rdâng ma Y-Yêrêmi. Yorlah kôranh ƀư brah mâu kƀah nau vay, bunuyh blau mĭn mâu kƀah ôh nau nkah nti, phung nơm mbơh lor mâu kƀah ôh nau mbơh. Văch hom, he mra dŏng mbung mpiăt he ngơi đah păng, lơi ta mĭn ntreng ôh lĕ nau păng ngơi.”

¹⁹ Ơ Brah Yêhôva, dăn mĭn rmiăng treng uănh gâp, Jêh ri rkêng tôr iăt nau ngơi phung tâm rdâng đah gâp!

²⁰ Geh lĕ nơm sŏk nau mhĭk mplơ̆ ăn nau ueh? Ƀiălah khân păng kuyh jêh ntu ƀư rai lơi nau rêh gâp. Dăn May kah gĭt pô aơ gâp lĕ tă gŭ dâk tanăp măt May Gay dăn nau ueh ăn ma khân păng, Jêh ri dăn May mâu nkhŭt ôh nau ji nuih ta khân păng.

²¹ Yor nây, dăn May jao kon sau khân păng ăn ma nau sât ji ngot, Jêh ri jao khân păng ma pêh đao. Phung bu ur mra roh kon jêh ri jêng ndrô, Phung bu klâu khĭt yor ji tưp, Phung mom ndăm cha lôt khĭt ma pêh đao ta nklang ntŭk tâm lơh.

²² Dăn ăn bâr kuăl rklaih huy luh bơh ngih khân păng, Dôl May ƀư ăn phung ntŭng rduh lơh ndal! Yorlah khân păng hŏ kuyh ntu gay nhŭp gâp, Drăng dăk ăn ma jâng gâp chêh prah.

²³ Ƀiălah Brah Yêhôva ơi, May nơm hŏ gĭt Lĕ nau nchră khân păng hŏ ndâk jêh gay nkhĭt gâp. Lơi ta yô̆ an ôh ma nau mhĭk khân păng, Lơi jut ôh nau tih khân păng bơh măt May. Ƀiălah ăn khân păng chêh prah tanăp măt May; Ăn tâm rmal khân păng tâm dôl May ji nuih.