Yêrêmi 17 - Nau Brah Ndu Ngơi 2023

Nau tih jêh ri nau rmal prăp ăn ma phung Yuđa

¹ “Nau tih ƀon lan Yuđa dơi nchih đah mâng nchih loih, Tor kach ma chiông lŭ mplanh diamôn, Ta klơ tâm trôm nuih n'hâm jêh ri ta nke lĕ nơng ƀư brah khân păng,

² Gay kon sau khân păng kah gĭt tay ma nơng ƀư brah Jêh ri lĕ n'gâng mbah Asêrim, Êp lĕ pŭm si âk n'ha Ta klơ lĕ dor prêh.

³ Ơ yôk Gâp tâm mir, Gâp mra jao lĕ drăp ndơ, drăp ndơ khlay may ăn ma phung ntŭng Yor nau tih may hŏ ƀư ta klơ lĕ ntŭk prêh Tâm lam bri may nơm.

⁴ May mra ƀư roh êng Drăp ndơn Gâp ăn jêh. Gâp mra nhŭp may pah kan ma phung rlăng đah may Tâm du n'gor may ê hŏ mâp gĭt; Yorlah may hŏ sŭnh ŭnh hao ji nuih ma Gâp, Pôri păng mra su hit mro mrăng.”

⁵ Brah Yêhôva lah: “Di ma rak rtăp ăn ma nơm nsing ma kon bunuyh, Sŏk nau nglay săk ƀư tur ti, Nuih n'hâm nkhah du bơh Brah Yêhôva.

⁶ Bunuyh nây nâm bu rlô pôm tâm bri rdah, Mâu saơ ôh nau ueh maak tât. Mra rêh ntŭk ndrêch rdah kro đang, Ta klơ neh chiăt boh mâu geh bunuyh gŭ ôh.

⁷ Ueh maak yơh mbu nơm nsing ma Brah Yêhôva, Sŏk Brah Yêhôva ƀư ntŭk mbin nsing ma păng.

⁸ Bunuyh nây nâm bu tơm si tăm gŭ kơh dak n'hor, Hon reh tĭng n'hor dak hoch; Mâp trôk duh ăt mâu klach ôh N'ha ăt ndrêh ueh. Mâp năm prăng phang mâu đŏng rvê ir lĕ Ăt luh play mâu rlu ôh.

⁹ Nuih n'hâm bu jêng mƀruh nchơt lơn ma lĕ ntil mpô mpa, Jêh ri jêng nau djơh mhĭk ngăn. Mbu nơm dơi gĭt?

¹⁰ Gâp, Brah Yêhôva, sek uănh nau mĭn, Rlong uănh nuih n'hâm bu, Plơ̆ ăn ma ăp nơm tĭng nâm trong păng hăn, Jêh ri tĭng nâm play kao bơh kan khân păng ƀư.”

¹¹ Nơm ƀư ndrŏng mâu geh nau sŏng, Tâm ban ma sĭm tat-ta păn tăp sĭm êng mâu di păng nơm deh ôh; Tât n'gul nau rêh, drăp ndơ du lĕ, Jêh ri nglĕ dŭt nau rêh knŏng hôm jêng nơm rluk.

Nau Y-Yêrêmi mbơh

¹² Ntơm bơh saơm, sưng hađăch chrêk ma lơp gŭ ntŭk prêh klơ, Jêng ntŭk ngih brah kloh ueh ma hên!

¹³ Ơ Brah Yêhôva, nau kâp gân ma phung Israel, Mbu nơm dun May geh nau prêng da dê! Mbu nơm plăch ndŭr kơi đah May bu mra nchih amoh ta ndruyh neh, Yorlah khân păng hŏ chalơi jêh Brah Yêhôva jêng tu dak rêh.

¹⁴ Ơ Brah Yêhôva! Dăn May ƀư bah ăn gâp gay gâp dơi bah; Dăn May sâm rklaih gâp gay gâp dơi rklaih; Yorlah May jêng Nơm gâp mât ton tâm rnê.

¹⁵ Ri, khân păng lah ma gâp: “Ta ntŭk nau Brah Yêhôva ngơi? Mâm dĭng mâu saơ nau mbên!”

¹⁶ Bi ma gâp, gâp mâu gơnh chalơi ôh nau pah kan rmăk biăp ƀiălah tĭng May yơh. May gĭt, gâp mâu kâp gân ôh nau mhĭk tât. Nau ngơi luh ta bơh bâr mbung gâp Gŭ tanăp măt May da dê.

¹⁷ Lơi ta ăn gâp klach ôh; May jêng ntŭk ma gâp nde krap tâm nar rêh ni.

¹⁸ Dăn ƀư ăn ma phung ƀư mhĭk ma gâp mra geh nau bêk prêng, Ƀiălah gâp nơm mâu geh nau prêng ôh; Dăn ƀư ăn ma khân păng rdja nuih, Ƀiălah gâp mâu geh nau rdja nuih ôh! Dăn nkhŭt ta klơ khân păng nar mhĭk tât, Ƀư rai khân păng bar tơ̆!

Djôt prăp nar saƀat

¹⁹ Brah Yêhôva lah ma gâp: “May hăn hom gŭ dâk ta mpông pêr phung ƀon lan, nây jêng mpông pêr lĕ phung hađăch Yuđa vay lăp luh, jêh ri ta ntŭk lĕ rngôch mpông ƀon Yêrusalem.

²⁰ May lah ma khân păng: ‘Hơi lĕ hađăch phung Yuđa, lĕ rngôch ƀon lan Yuđa, jêh ri lĕ rngôch ƀon lan gŭ ta ƀon Yêrusalem, jêng phung rgăn lĕ mpông pêr aơ, rkêng tôr iăt hom nau Brah Yêhôva!

²¹ Brah Yêhôva lah: Lĕ khân may mât hom nau rêh khân may nơm, lơi ta tung mbăk ôh tâm nar saƀat, ăt mâu lĕ tuy anh ndơ găn ta lĕ mpông ƀon Yêrusalem.

²² Tâm nar saƀat, lơi ta tung mbăk luh bơh ngih khân may, lơi ta ƀư du ntil kan ôh, ƀiălah kah gĭt hom prăp êng nar saƀat jêng kloh ueh nâm bu Gâp hŏ ntăm jêh ma phung chô yau khân may.

²³ Ƀiălah, chô yau khân may mâu ŭch iăt ôh, mâu meng. Khân păng dăng bôk dăng trô ko mâu rkêng tôr iăt, mâu sŏk dơn nau nkra nti.’

²⁴ Brah Yêhôva lah: ‘Tơlah khân may gơih iăt Gâp, mâu tung mbăk lăp lĕ mpông ƀon nây tâm nar saƀat, ƀiălah gĭt prăp êng nar saƀat jêng kloh ueh jêh ri mâu ƀư moh nau kan tâm nar nây,

²⁵ pôri phung hađăch thoi sưng hađăch Đavit jêh ri phung kôranh mra gŭ ndeh seh, ncho seh, ndrel ma phung kôranh Yuđa jêh ri phung ƀon lan gŭ ta ƀon Yêrusalem mra găn ta lĕ mpông mpêr lăp tâm ƀon; jêh ri ƀon nây mra hôm n'ho ro.

²⁶ Phung ƀon lan tă bơh lĕ ƀon n'gor Yuđa jêh ri lĕ n'gor êp kêng Yêrusalem, bơh neh Benjamin, bơh neh Sêphêla, bơh bri dor yôk, jêh ri bơh Nêgep, mra văch tât, djôt leo ndơ ƀư brah gŭch jêh ri lĕ ndơ ƀư brah, ndơ ƀư brah rnih môi jêh ri ndơ ƀâu kah, ndrel ndơ ƀư brah tâm rnê lah ueh, tât ma ngih Brah Yêhôva.

²⁷ Ƀiălah tơlah khân may mâu tông ôh bâr Gâp gay gĭt prăp êng ma nar saƀat jêng kloh ueh, jêh ri nar saƀat hôm tung mbăk hăn lăp mpông ƀon Yêrusalem, pôri gâp mra sŭnh ŭnh ta mpông ƀon, ŭnh nây mra su rai lĕ ngih hađăch ƀon Yêrusalem, mâu geh nơm dơi buh nhhât ôh.’”