Yêrêmi 16 - Nau Brah Ndu Ngơi 2023

Nau Brah Ndu ŭch mĭn ta nau rêh Y-Yêrêmi

¹ Nau Brah Yêhôva lah ma gâp:

² “Lơi may nđăp ur, mâu lĕ deh phung bu klâu kon bu ur tâm ntŭk aơ.”

³ Yorlah Yêhôva lah kơt aơ ma phung kon bu klâu kon bu ur mra deh tâm ntŭk aơ, jêh ri ma phung me mbơ̆ hŏ deh khân păng tâm n'gor aơ:

⁴ “Khân păng mra khĭt yor nau ji tưp, mâu geh bunuyh nhĭm nhhiăng ăt mâu lĕ geh bunuyh tâp brôi. Khân păng mra jêng nâm bu buh ta klơ măt neh. Bu mra khĭt khân păng ma pêh đao jêh ri sa sât ji ngot. Săk jăn khĭt khân păng mra ƀư ndơ sa ăn ma phung sĭm klơ trôk jêh ri ma mpô mpa bri ta klơ neh.”

⁵ Brah Yêhôva lah: “Lơi ta lăp tâm trôm ngih geh nau rngot ndrê, lơi ta nhĭm nhhiăng mâu lah bonh leng ma khân păng, yorlah Gâp hŏ sŏk sĭt jêh nau đăp mpăn, nau rŏng nâp jêh ri nuih n'hâm yô̆ nđach du luh bơh phung ƀon lan aơ,” Brah Yêhôva lah pônây.

⁶ “Bunuyh toyh phung jê̆ mra khĭt da dê tâm neh aơ. Mâu geh nuyh tâp brôi, mâu lĕ geh nuyh nhĭm vơl, mâu lĕ rek tor săk jăn nơm mâu lah poih bôk yor khân păng.

⁷ Mâu geh nơm nkê̆ch ƀănh ăn ma phung klâng ndrê gay bonh leng khân păng ma bunuyh hŏ khĭt; mâu đŏng geh lĕ nơm ăn kachok tâm pă nau rngot yor nau khĭt mê̆ mbơ̆ khân păng.

⁸ May mâu đŏng lăp ôh ngih geh nkra nhêt sa gay gŭ sông sa nhêt ndrel khân păng.

⁹ Yorlah Brah Yêhôva ma phung tahan, Brah Ndu phung Israel, lah: ‘Aơ, tanăp măt khân may, tâm rô̆ khân may, Gâp mra ƀư ăn n'gor aơ mâu hôm geh nau răm maak ma bâr mprơ, mâu hôm geh bâr klay ƀăn.’

¹⁰ Dôl may mbơh ăn ma phung ƀon lan aơ lĕ rngôch nau nây, khân păng mra ôp may: ‘Mâm ƀư Brah Yêhôva tâm nal nkhŭt nau mhĭk dŭt krit kir aơ tât ma hên? Moh nau mhĭk hên? Moh nau hên hŏ ƀư tih đah Yêhôva Brah Ndu hên?’

¹¹ May ngơi hom ma khân păng pô aơ Brah Yêhôva lah: ‘Yor phung chô yau khân may hŏ chalơi jêh Gâp tĭng lĕ brah êng, hŏ pah kan jêh ri yơk mbah ma lĕ brah nây. Khân păng hŏ chalơi jêh Gâp, mâu djôt prăp ôh nau vay Gâp.

¹² Bi khân may ƀư nau mhĭk rlau lơn ma phung chô yau khân may đŏng; ăp nơm khân may ma nau dăng bôk tĭng nuih n'hâm mhĭk păng nơm, mâu ŭch tông bâr Gâp ôh.

¹³ Yor ri, Gâp mra ngluh khân may bơh bri aơ, klŭp khân may jêh ri phung chô yau khân may ta du n'gor mâu mâp gĭt ôh. Ntŭk nây, khân may mra nar măng pah kan ma lĕ brah êng; yorlah Gâp mâu mra ăn đŏng nau ueh ma khân may ôh.’”

¹⁴ Yor ri, Brah Yêhôva lah: “Nanê̆ mra geh nar bu mâu hôm lah: ‘Tĭng nâm Brah Yêhôva gŭ rêh mro mrăng, jêng Nơm hŏ njŭn leo jêh kon sau Israel du luh bơh n'gor bri Êjipt,’

¹⁵ Ƀiălah mra lah: ‘Tĭng nâm bu Brah Yêhôva gŭ rêh mro mrăng, jêng Nơm hŏ njŭn leo kon sau phung ƀon lan Israel plơ̆ sĭt tă bơh mpeh pa lơ jêh ri tă bơh lĕ rngôch bri dak khân păng bu hŏ mprơh tât.’ Yorlah Gâp mra njŭn tay khân păng plơ̆ sĭt ma bri Gâp hŏ ăn jêh ma phung chô yau khân păng.”

¹⁶ Brah Yêhôva lah: “Aơ, Gâp prơh joi âk phung blau seng ka tât nhŭp khân păng. Jêh nây, Gâp prơh joi âk phung nchron gay nchron khân păng ta klơ ăp yôk, ăp gôl, jêh ri tâm ăp nđa lŭ.

¹⁷ Yorlah măt Gâp kâp uănh tâm lĕ trong khân păng. Khân păng mâu dơi du ôh bơh măt Gâp, jêh ri nau tih khân păng mâu đŏng dơi king măt Gâp.

¹⁸ Lor lơn Gâp mra mplơ̆ nau mhĭk ma khân păng n'hao bar tơ̆ jêh ri nau tih khân păng hŏ ƀư jêh, yorlah khân păng hŏ ƀư ƀơ̆ ƀơch neh Gâp bơh săk jăn khĭt lĕ rup brah di ma nau tâm rmot, jêh ri ƀư bêng ma drăp ndơn đah lĕ ndơ di ma nau ƀơ̆ ƀơch.”

¹⁹ Ơ Brah Yêhôva, May jêng n'hâm suan dăng ktang jêh ri pôih nâp ma gâp, Ntŭk nde krap gâp tâm nar rêh ni! Ntơm bơh nglĕ dŭt rplay neh, Lĕ bri dak mra văch ma May jêh ri lah: “Phung chô yau hên knŏng sŏk dơn lĕ brah mƀruh ndơm, Lĕ nau dơm dam, jêh ri mâu dơi geh nau khlay ôh.

²⁰ Dơi lĕ kon bunuyh njêng êng phung brah ma păng nơm? Ƀiălah phung brah nây mâu di jêng brah ôh!”

²¹ “Yor nây, Gâp mra ăn ma khân păng gĭt, Nanê̆, tơ̆ aơ Gâp mra nti ăn khân păng gĭt Nau ktang jêh ri nau brah Gâp. Jêh ri khân păng mra gĭt Amoh Gâp jêng Yêhôva.”