Yêrêmi 14 - Nau Brah Ndu Ngơi 2023

Nau prăng phang dŭt krit kir

¹ Aơ jêng nau ngơi Brah Yêhôva lah ma Y-Yêrêmi ma nau prăng phang:

² “N'gor Yuđa gŭ tâm nau klâng ndrê, Mpông ƀon lĕ rai; Phung ƀon lan nhĭm vơl da dê ăn ma ntŭk nây, Jêh ri tăng bâr ƀon Yêrusalem kuăl.

³ Phung ndrŏng prơh phung oh mon hăn joi dak; Khân păng hăn tât nglao, Ƀiălah mâu saơ dak ôh, Djôt yăng dơm plơ̆ sĭt; Khân păng prêng, rŭng răng, Nkŭm lơi bôk.

⁴ Klơ neh đang jêh, Yorlah mâu geh dak mih tŭp ta neh, Lĕ phung ƀư mir bêk prêng, Nkŭm lơi bôk.

⁵ Jun me deh kon tâm ndrêch jêh nây chalơi kon, Yorlah mâu geh gơ̆.

⁶ Seh bri gŭ ta klơ lĕ yôk hil, Nsôr n'hâm nthôk nthơk nâm bu so bri, Măt lĕ huănh Yor mâu geh gơ̆.”

⁷ “Ơ Brah Yêhôva, nđâp lah nau mhĭk hên ƀư mbơh nau tâm rdâng đah hên, Ăn yor amoh May ƀư yơh! Yorlah âk tơ̆ hên mâu răp jăp đah May; Hên hŏ ƀư tih đah may jêh.

⁸ Ơ Kôranh Brah, May jêng nau kâp gân ma phung Israel, Nơm tâm rklaih tâm nau rêh ni, Mâm ƀư may nâm bu du huê bu năch tâm n'gor aơ, Nâm bu du huê bu năch veh bê̆ch njưh du măng?

⁹ Mâm ƀư May nâm bu bunuyh phit phơr, Nâm bu du huê dăng ktang mâu dơi yơr ti tâm rklaih bu ôh? Ƀiălah, ơ Kôranh Brah, May hôm e gŭ ta nklang hên, Hên dơi ntơ ma amoh May, Lơi ta chalơi hên ôh!”

¹⁰ Brah Yêhôva lah ma phung ƀon lan aơ kơt aơ: “Khân păng ŭch hăn nsong blêng pônây, Mâu gĭt nkân bar jâng ôh; Yor ri Brah Yêhôva mâu sŏk dơn ôh khân păng. Aƀaơ aơ, Păng kah gĭt tay nau khân păng hŏ ƀư tih, Jêh ri rmal lơi nau tih khân păng.”

¹¹ Brah Yêhôva lah ma gâp: “Lơi ta may mbơh sơm nau ueh ôh ăn ma phung ƀon lan aơ.

¹² Nđâp lah khân păng ât sông sa, Gâp mâu mra iăt nau khân păng kuăl mbơh sơm; jêh ri nđâp lah khân păng nhhơr ndơ ƀư brah gŭch jêh ri ndơ ƀư brah rnih môi, Gâp ăt mâu dơn ôh; ƀiălah Gâp mra ƀư rai khân păng ma đao, nau sa sât ji ngot, jêh ri ma nau ji tưp.”

¹³ Ƀiălah gâp lah pô aơ: “Aơ! Ơ Kôranh Brah Yêhôva, geh phung nơm mbơh lor lah ma khân păng pô aơ: ‘Khân may mâu mra saơ đao, mâu lĕ geh nau sa sât ji ngot, yorlah Gâp mra ăn ma khân may gŭ tâm nau đăp mpăn nâp ktang tâm ntŭk aơ.’”

¹⁴ Brah Yêhôva lah đŏng ma gâp: “Lĕ phung nơm mbơh lor nây hŏ tâm amoh Gâp mbơh lĕ nau mƀruh nchơt. Gâp mâu mâp prơh khân păng hăn ôh, mâu mâp lĕ ntăm nau mâu lah moh nau lah ma khân păng. Khân păng mbơh lor ma khân may tĭng nau tâm mpơl mƀruh, nau ƀŭk rƀên, nau dơm dam, jêh ri nau ndơm luh bơh nuih n'hâm mhĭk khân păng nơm.”

¹⁵ Yor nây, Brah Yêhôva lah ntop đŏng: “Bi ma lĕ phung mbơh lor mâu tă bơh Gâp mprơh tât nănh ngơi tâm amoh Gâp ngơi mbơh lor pô aơ ‘mâu mra geh đao jêh ri sa sât ji ngot geh tât ta n'gor aơ’, pôri phung nơm mbơh lor nây yơh bu mra ƀư rai ma đao jêh ri sa sât ji ngot.

¹⁶ Bi ma lĕ phung hŏ iăt jêh nau khân păng mbơh lor bu klŭp mƀăr n'gŏ trong sâng Yêrusalem ndrel ma ur, kon bu klâu, kon bu ur khân păng, ƀư bunuyh bu nkhĭt ma đao, sa sât ji ngot mâu geh bunuyh tâp ôh. Yorlah Gâp mra ƀư nau ƀai khân păng nkhŭt tay ta klơ bôk khân păng.

¹⁷ May ngơi hom ma khân păng nau aơ: ‘Ăn ma măt gâp hoch dak nar măng mâu dơi rlu; Yorlah bu ur druh ƀon lan gâp bu lơh mâu hôm klen, Sôt rmanh jru glăm ngăn.

¹⁸ Tơlah gâp hăn tâm mir, Ta nây saơ phung khĭt yor đao; Tơlah gâp lăp tâm ƀon, Ta nây saơ phung ji kuet yorlah sa sât ji ngot. Lĕ rngôch phung nơm mbơh lor nđâp ma phung kôranh nơm ƀư brah Hăn da dê tât du n'gor khân păng mâu gĭt ôh.’”

Nau mbơh sơm phung ƀon lan

¹⁹ “May hŏ chalơi ngăn jêh phung Yuđa hĕ? Di lĕ nuih n'hâm May dôl tâm rmot ma phung Siôn lĕ? Mâm ƀư may dong hên, Mâu ƀư bah ôh ma hên? Hên kâp gân ma nau đăp mpăn, ƀiălah mâu saơ nau ueh tât ôh; Ŭch kâp yan ƀư bah, knŏng saơ nau klach krit.

²⁰ Ơ Brah Yêhôva, hên gĭt saơ jêh nau djơh mhĭk hên, Jêh ri nau tih phung chô yau hên, Yorlah hên hŏ ƀư tih jêh đah May.

²¹ Yor amoh May, lơi ta mƀăr lơi, Lơi ta uănh dơm dam ôh sưng hađăch chrêk lơp May. Ăn May kah gĭt tay jêh ri lơi ta ngroh lơi Nau tâm rnglăp May hŏ njêng ma hên.

²² Geh đŏng brah tâm lĕ brah mƀruh ndơm phung bu năch dơi ƀư dak mih lĕ? Mâu lah yor trôk jŭr nkhŭt êng dak mih? Ơ Yêhôva Brah Ndu hên, mâu di May jêng Nơm nây hĕ? Hên gŭ kâp May, Yorlah May nơm yơh hŏ njêng jêh ăp ntil nây.”