Yêrêmi 13 - Nau Brah Ndu Ngơi 2023

Rse vân bŭt đah bok mhay

¹ Brah Yêhôva lah ma gâp pô aơ: “May hăn rvăt hom ma may du mlâm rse vân bŭt ma bok mhay jêh ri vân ta bŭt, ƀiălah lơi ta trăm tâm dak.”

² Tĭng nau Brah Yêhôva ntĭnh lah, gâp rvăt rse vân bŭt jêh ri vân ta bŭt.

³ Nau Brah Yêhôva ntĭnh tay ăn ma gâp tơ̆ bar pô aơ:

⁴ “Doh lơi hom rse vân bŭt may hŏ rvăt jêh ri dôl vân ta bŭt, hăn ro tât ta kơh dak krong Ơphrat jêh ri pôn tâm nđa lŭ ta nây.”

⁵ Gâp djôt pôn păng ntŭk kơh dak krong Ơphrat, nâm bu nau Brah Yêhôva lah ntĭnh.

⁶ Jêh nau nây âk nar, Brah Yêhôva đă gâp: “Gơnh oi may tât ta kơh dak krong Ơphrat sŏk tay rse vân bŭt Gâp hŏ đă jêh may djôt pôn ntŭk nây.”

⁷ Gâp hăn tât ta dak krong Ơphrat kuyh neh jêh ri sŏk rse tă ntŭk gâp pôn saơm ri. Ƀiălah rse lĕ ôm jêh, mâu hôm dơi dŏng ôh.

⁸ Rnôk nây, nau Brah Yêhôva tât tay ma gâp.

⁹ Brah Yêhôva lah: “Gâp mra ƀư nau sưr phung Yuđa jêh ri nau sưr toyh ƀon Yêrusalem ôm rai nâm bu pônây.

¹⁰ Phung ƀon lan mhĭk aơ mâu ŭch iăt ôh nau Gâp, sŏl ko ƀư tĭng nau mĭn nuih n'hâm khân păng nơm, nchuăt tĭng ndô̆ phung brah êng ŭch pah kan jêh ri yơk mbah. Khân păng mra jêng mâu hôm dŏng nâm bu rse vân bŭt aơ.”

¹¹ Brah Yêhôva lah tay: “Yorlah, nâm bu rse rêt nâp mâm ta bŭt bu, pôri yơh Gâp ăt rêt nâp lĕ rngôch ngih Israel jêh ri lĕ rngôch ngih Yuđa đah Gâp kơt nây lĕ, gay ma khân păng ƀư du phung ƀon lan, du amoh, du nau tâm rnê, du nau chrêk rmah ăn ma Gâp; Ƀiălah khân păng mâu ŭch iăt ôh.

¹² May ngơi hom ma khân păng nau aơ: Yêhôva Brah Ndu Israel lah: ‘Lĕ rngôch yăng mra bêng ma ndrănh.’ Khân păng mra lah ma may: ‘Di lĕ hên mâu gĭt ăp yăng mra bêng ma ndrănh hĕ?’

¹³ May mra lah tay: ‘Brah Yêhôva lah: Aơ, Gâp mra ƀư lĕ rngôch phung ƀon lan gŭ ta klơ neh aơ, phung hađăch gŭ ta sưng hađăch Đavit, phung kôranh ƀư brah, phung nơm mbơh lor, jêh ri lĕ rngôch phung ƀon lan Yêrusalem nhŭl ndrănh da dê.’

¹⁴ Brah Yêhôva lah: ‘Gâp mra ƀư ma bunuyh aơ tâm djrel đah bunuyh ri, mbơ̆ tâm tom đah kon. Gâp mra ti mâu djân, mâu yô̆, mâu nhhuach nôk Gâp ƀư rai khân păng.’”

Mbơh lor nau jêng bu nă

¹⁵ Iăt hom, rkêng tôr iăt hom, lơi ta sưr, Yorlah Brah Yêhôva hŏ lah jêh.

¹⁶ Nhhơr hom nau chrêk lơp ăn Yêhôva Brah Ndu khân may Êlor ma Păng ƀư nau ngo klĕng jŭr nkŭm, Êlor ma jâng khân may chêh prah Ta klơ lĕ yôk nôk nsrŭp măng; Lĕ khân may ŭch kâp nau ang Ƀiălah Păng rgâl jêng gui nau khĭt, Plơ̆ jêng gui nau ngo mbâl.

¹⁷ Ƀiălah tơlah lĕ bunuyh mâu iăt ôh Huêng gâp mra nhĭm ăn ma nau sưr lĕ bunuyh. Gâp mra nhĭm rngot ngăn, hoch truh dak măt, Yorlah phung biăp Brah Yêhôva bu nhŭp rdu.

¹⁸ Lah hom ma hađăch jêh ri mê̆ hađăch pô aơ: “Dăn trŭnh bơh sưng hađăch gŭ tâm dâng neh, Yorlah đon hađăch chrêk lơp Hŏ tŭp bơh bôk lĕ bunuyh jêh.”

¹⁹ Lĕ ƀon Nêgep bu nchueng jŭm da dê jêh Mâu geh bunuyh rklaih ăn khân păng. Lĕ rngôch phung Yuđa bu ƀư jêng bu nă, Lĕ rngôch bu nhŭp rdu.

²⁰ N'gơr măt uănh hom Phung bunuyh tât tă bơh mpeh pa lơ. Phung biăp hŏ jao jêh ma may, Phung biăp ƀư ăn n'hao nuih may, lĕ rngôch ta ntŭk?

²¹ Moh nau may lah dôl phung bunuyh may ntĭm nti Jêh ri ƀư mĭt jiăng đah may Dơi ndâk hao chiă uănh may? May mâu saơ hĕ nau ji kruăt rêt Nâm bu ur ji ngăn dôl deh kon hĕ?

²² Tơlah may ôp êng tâm nuih n'hâm: “Mâm ƀư lĕ nau kan aơ tât ăn ma gâp?” Nây jêng yor nau tih mhĭk may toyh ngăn Bu plơk nah bŭt may Săk jăn may geh dong bŭr.

²³ Bunuyh Êthiôpi mra dơi tâm rgâl dak piâk ntâu Mâu lah yau brăch tâm rgâl nau rvanh păng? Tơlah dơi, pôri lĕ rngôch khân may jêng phung hŏ mơng ƀư mhĭk Mra dơi ƀư nau ueh.

²⁴ Pônây Gâp mra srih khân may ăp ntŭk nâm bu njŏk Geh sail bri rdah khôm rdu.

²⁵ Brah Yêhôva lah: “Nây jêng mrô nal may, Jêng kô̆ Gâp prăp ăn may, Yorlah may hŏ chuêl Gâp Jêh ri rnơm nsing ma nau mƀruh nchơt.

²⁶ Gâp mra plơk đŏng nah bŭt may tât ta măt, Gay mpơl nau bêk prêng may.

²⁷ Gâp hŏ saơ lĕ nau ƀơ̆ ƀơch bơh may, Nau tih văng tir, nau pâl tâm krĭ văng tĭr phung ka n'hong may, Ta klơ lĕ dor yôk, ta nklang mir. Ơ Yêrusalem, rêh ni ăn ma may! Ndah jŏ may mra mâu ŭch ƀư kloh?”