Yêrêmi 12 - Nau Brah Ndu Ngơi 2023

Nau nơm mbơh lor Y-Yêrêmi mâu hŏ vât

¹ Ơ Brah Yêhôva, May sŏng srăng mro Ăp tơ̆ gâp ngơi tâm rlăch nchră đah May; Nđâp pônây, gâp dăn ôp May ma nau phat dôih. Mâm ƀư trong phung ƀai geh nau ndrŏng ktang mro? Mâm ƀư phung gŭ rêh ndơm geh nau mpăn rlêk?

² May hŏ brôi tăm khân păng, Khân păng hŏ hon reh văch ma toyh jêh ri geh play. Bâr mbung khân păng gŭ dăch May, Ƀiălah nuih n'hâm khân păng ƀah ngai ma May.

³ Ơ Brah Yêhôva, May gĭt jêh gâp! May saơ gâp, May ôp sek nuih n'hâm gâp ndrel ma May. Dăn nkhah khân păng luh nâm bu nkhah biăp gay djôt tât ntŭk sreh nkhĭt Prăp êng khân păng ma nar sreh nkhĭt.

⁴ Tâm n'gor bri klâng ndrê, Gơ̆ tâm ndrêch klêu kro kŏ tât ndah jŏ? Yorlah ƀon lan djơh mhĭk Yor nây mpô mpa bri jêh ri sĭm och rai yot da dê. Khân păng lah pô aơ: “Păng mâu mra saơ nau tât nglĕ dŭt ma he ôh!”

Nau Brah Ndu plơ̆ lah ma Y-Yêrêmi

⁵ “Tơlah may nchuăt tâm rlong ndrel ma bunuyh nchuăt jâng hôm e hŏt rgănh, Pôri mâm dơi tâm rlong đah seh? Tơlah gŭ tâm neh đăp mpăn may hôm e chêh prah, Pôri mâm ƀư may tâm rdâng đah bri krŏng Yurdan?

⁶ Phung oh nâu may nơm jêh ri ngih mbơ̆ may Ăt rdâng đah may, Khân păng lŭng nter pakơi may. Nđâp lah khân păng ngơi ueh đah may, May lơi ta rnơm ôh ma khân păng.

⁷ Gâp hŏ chalơi ngih Gâp, Chalơi jêh drăp ndơn Gâp; Jao ma phung bunuyh nuih n'hâm Gâp rŏng Tâm ti phung rlăng.

⁸ Drăp ndơn Gâp tâm rdâng đah Gâp Nâm bu yau mŭr tâm bri, Rđuh ngrông đah Gâp; Yor nây Gâp tâm rmot khân păng.

⁹ Di lĕ drăp ndơn Gâp nâm bu sĭm joi mpa Geh phung sĭm joi mpa êng gŭ văr jŭm lĕ? Hăn rgum hom lĕ rngôch mpô mpa bri, Gay khân păng sa rvăn lơi păng!

¹⁰ Geh âk phung rmăk biăp ƀư rai jêh đang krăk ƀâu Gâp, Jot nkrâm ta ntŭk neh Gâp, Rgâl ntŭk neh Gâp ŭch rŏng Jêng bri rdah rngot rjăp.

¹¹ Khân păng hŏ ƀư ăn ma neh nây jêng rngol, rai lĕ; Păng vah vơl ma Gâp. Lĕ rngôch n'gor jêng rngol da dê, Ƀiălah mâu geh bunuyh mĭn tât ôh.

¹² Ta klơ yôk hil tâm bri rdah Phung sŏk ntŭng ƀư rai hŏ lip tât jêh; Yor mpiăt đao Brah Yêhôva rvăn neh aơ Ntơm bôk đah aơ tât bôk đah ri, Mâu geh du săk jăn dơi đăp mpăn.

¹³ Khân păng srih ba ƀlê jêh ri rek pôm lok, Hŏt rgănh mâu geh nau khlay ôh. Bêk prêng hom ma kao play khân păng, Yorlah nau Brah Yêhôva ji nuih hâu ngăn!”

Nau Brah Yêhôva prăp ăn ma phung bu năch

¹⁴ Brah Yêhôva lah: “Bi phung chiau meng mhĭk ngăn ma Gâp, lĕ phung sŏk rvan drăp ndơn Gâp ăn jêh ma phung ƀon lan Israel Gâp sŏk dơn, Gâp mra rôk khân păng bơh neh khân păng, jêh ri rôk ngih Yuđa du luh bơh khân păng.

¹⁵ Ƀiălah hŏ lôch jêh rôk khân păng, Gâp mra yô̆ nđach tay khân păng jêh ri djôt ăp bunuyh plơ̆ sĭt ma drăp ndơn jêh ri ƀon tơm khân păng.

¹⁶ Tơlah khân păng gơih nti trong ƀon lan Gâp, ton tâm amoh Gâp pô aơ: ‘Ngăn yơh Brah Yêhôva gŭ rêh mro mrăng!’ — nâm bu phung khân păng hŏ nti ăn ma ƀon lan Gâp ton tanăp brah Baal — pôri nôk nây khân păng mra dơi nâp ta nklang phung ƀon lan Gâp.

¹⁷ Ƀiălah tơlah moh ndŭl mpôl mâu iăt, Gâp mra rôk lơi ndŭl mpôl nây, jêh ri ƀư rai păng.” Brah Yêhôva lah pônây.