Yêrêmi 11 - Nau Brah Ndu Ngơi 2023

Israel jêh ri Yuđa rlau nau tâm rnglăp

¹ Aơ jêng nau Brah Yêhôva lah ma Y-Yêrêmi:

² “Iăt hom lĕ nau ngơi ma nau tâm rnglăp aơ jêh ri ngơi tay ma phung Yuđa jêh ri phung ƀon lan gŭ ta ƀon Yêrusalem.

³ May lah ma khân păng pô aơ Brah Yêhôva Brah Ndu Israel lah: ‘Khư rak rtăp ăn ma bunuyh mâu iăt ôh nau tâm rnglăp

⁴ Gâp hŏ ntăm ăn ma chô yau khân may dôl Gâp djôt khân păng du luh bơh n'gor bri Êjipt, luh bơh năk ŭnh loih nây. Gâp hŏ ntĭnh khân păng: Iăt hom nau Gâp, ƀư tĭng lĕ ntil nau Gâp nti gay ma khân may ƀư phung ƀon lan Gâp, jêh ri Gâp ƀư Brah Ndu ma khân may.

⁵ Pôri, Gâp dơi ƀư nau ton jêh Gâp hŏ ton ma phung chô yau khân may, jêng ăn ma khân păng du n'gor bri bêng ma dak toh jêh ri dak sŭt, nâm bu hŏ geh jêh nar aơ.’” Gâp plơ̆ lah: “Ơ Brah Yêhôva! Amen!”

⁶ Brah Yêhôva lah ma gâp: “Mbơh hom ăp nau aơ tâm lĕ ƀon n'gor Yuđa jêh ri tâm n'gŏ trong ƀon Yêrusalem: ‘Iăt hom nau tâm rnglăp aơ jêh ri tĭng ƀư.’

⁷ Gâp hŏ đă dŭt n'hâm ngăn ma phung chô yau khân may ntơm bơh nar Gâp djôt khân păng du luh bơh n'gor Êjipt kŏ tât nar aơ. Gâp ƀaƀơ đă khân păng: ‘Iăt tĭng hom bâr Gâp!’

⁸ Ƀiălah khân păng mâu iăt, mâu rkêng tôr iăt; ăp nơm chuat hăn tĭng nau mĭn nuih n'hâm djơh mhĭk jêh ri nau rôih ko khân păng nơm. Yor nây, Gâp hŏ djôt tât ăn ma khân păng ăp nau tâm nau rnglăp aơ, jêng nau tâm rnglăp Gâp hŏ ntĭnh khân păng tĭng kơt ƀiălah khân păng mâu ƀư ôh.”

⁹ Brah Yêhôva lah ma gâp: “Hŏ geh nau nchră tâm rdâng phung đah Yuđa jêh ri phung ƀon lan gŭ ta ƀon Yêrusalem.

¹⁰ Khân păng plơ̆ sĭt ma nau tih mhĭk phung che khân păng jêng phung mâu ŭch iăt nau Gâp. Khân păng hŏ hăn tĭng jêh ri yơk mbah lĕ brah êng. Ngih Israel jêh ri ngih Yuđa hŏ ƀư rai nau tâm rnglăp Gâp hŏ ndâk đah chô yau khân păng.

¹¹ Yor nây, Brah Yêhôva lah pô aơ: ‘Aơ, Gâp mra ăn nau mhĭk tât ma khân păng jêh ri khân păng mâu dơi der ôh. Nđâp tơlah khân păng kuăl dăn ma Gâp, Gâp ăt mâu tăng ôh.

¹² Aƀaơ aơ, lĕ rngôch ƀon n'gor Yuđa jêh ri phung ƀon lan gŭ tâm ƀon Yêrusalem mra hăn kuăl dăn ma phung brah khân păng hôm nhhơr ndơ ƀâu kah, ƀiălah phung brah nây mâu mra dơi tâm rklaih khân păng tâm năng nau rêh ni ôh.

¹³ Yorlah, hơi phung Yuđa, ndah âk ƀon khân may geh ăt geh âk brah kơt nây lĕ! Ndah âk Yêrusalem geh trong toyh ăt khân may ndâk âk kơt nây lĕ nơng ƀư brah ăn brah di ma nau prêng, jêng lĕ nơng ƀư brah nhhơr ndơ ƀâu kah ăn brah Baal!’

¹⁴ Bi ma may, lơi may mbơh sơm kơl an ăn phung ƀon lan aơ, mâu lĕ yorlah khân păng hă bâr vơl dăn mâu lah vah vơl, Gâp mâu iăt khân păng nđâp ma khân păng vơl dăn ma Gâp tâm nau rêh ni.

¹⁵ Nơm Gâp rŏng hŏ ƀư nau mhĭk hôm lăp ngih Gâp moh ndơ gay ƀư đŏng? Gĭt lah âk puăch kloh ueh dơi king may klaih bơh nau tât ji tưp jêh ri ƀư ăn may dơi răm maak lĕ?

¹⁶ Brah Yêhôva hŏ tă kuăl săk may jêng ‘tơm ôlive ndrêh, play rkŭm âk ueh măt.’ Ƀiălah aƀaơ, ta nklang nau nteh vănh blông ngrông, Păng mpoh ŭnh su păng, lĕ n'gĭng păng rai lĕ.

¹⁷ Brah Yêhôva ma phung tahan, jêng Nơm hŏ brôi tăm khân may, Păng nơm yơh ăn nau mhĭk tât ta may, yorlah nau mhĭk ngih phung Israel jêh ri ngih Yuđa hŏ ƀư nôk nsônh nau nuih Gâp đah nau nhhơr ndơ ƀâu kah ăn brah Baal.”

Nau nchră tâm rdâng đah Y-Yêrêmi

¹⁸ Brah Yêhôva ăn gâp gĭt nau nây, jêh ri gâp hŏ gĭt jêh. Nôk nây Păng ăn gâp saơ nau khân păng ƀư.

¹⁹ Bi gâp, nâm bu du mlâm kon biăp rdơ̆ rbăn Bu têk leo tât ntŭk bu sreh nkhĭt. Gâp mâu gĭt khân păng ŭch nchră tâm rdâng ma gâp. Khân păng lah: “Ƀư rai hom nđâp ma tơm jêh ri play, Mƀăr lơi păng bơh neh phung gŭ rêh, Gay mâu hôm nơm nkah tât amoh păng đŏng ôh.”

²⁰ Ơ Brah Yêhôva ma phung tahan! May phat dôih ma nau sŏng, sek uănh nuih n'hâm jêh ri nau mĭn, Dăn ăn ma gâp saơ nau plơng bôk Kôranh Brah ăn ma khân păng, Yorlah gâp mbơh jêh kan gâp ma May.

²¹ Brah Yêhôva lah: “Ma phung Anathôt, phung ŭch nkhĭt nau rêh may, hŏ nkrit nhhu may pô aơ: ‘Tơlah may mâu ŭch khĭt tâm ti he pôri lơi sŏk amoh Brah Yêhôva ngơi mbơh lor đŏng ôh.’

²² Yor nây, Brah Yêhôva ma phung tahan lah: ‘Gâp mra phat dôih khân păng; phung bu klâu ndăm mra khĭt yor đao tak, phung bu klâu bu ur khân păng mra khĭt yor nau sât ji ngot;

²³ mâu mra hôm du huê nơm klen rêh ôh. Yorlah tât năm phat dôih, Gâp mra ăn nau mhĭk tât ta klơ phung ƀon lan Anathôt.’”