Yêrêmi 10 - Nau Brah Ndu Ngơi 2023

Nau mbơh lor ma nau mbah rup brah

¹ Hơi phung Israel, iăt hom nau Brah Yêhôva lah ma khân may.

² Brah Yêhôva lah pô aơ: “Lơi ta nti ôh tĭng nau rêh phung ƀon lan êng, Mâu klach râm sâr lĕ nau mbên klơ trôk, Nđâp lah phung ƀon lan êng geh klach nau mbên nây.

³ Yorlah nau vay phung ƀon lan nây knŏng jêng dơm dam. Bu kăl tơm si tâm bri, Nơm blau rhăk dŏng sung njêng rup;

⁴ Sŏk prăk mah mblum ăn ma rup nây; Dŏng me nôp jêh ri kđĭn pâng nâp ngăn Gay rup mâu n'goh n'gơ.

⁵ Lĕ rup brah nây nâm bu pla mut tâm lĕ mir rpŭng, Mâu blau ngơi, Mâu blau hăn, bu mra tung. Lơi klach ôh khân păng, Yorlah khân păng mâu dơi srih nau mhĭk mâu lah dơi ăn nau ueh uĭn ôh.”

⁶ “Ơ Brah Yêhôva, mâu geh nơm dơi tâm rđĭl đah May! May toyh ngăn ngên, Amoh May dŭt prêh brah toyh.

⁷ Ơ Hađăch ma lĕ bri dak! Mbu moh mâu klach yơk May? May dơi khư ma nau yơk mbah. Yorlah ta nklang phung bunuyh blau mĭn tâm lĕ bri dak, Tâm lam ƀon bri hađăch khân păng, Mâu geh nơm dơi tâm rđĭl đah May.

⁸ Khân păng jêng rluk mâl; Nau ntĭm nti tă bơh lĕ rup brah Mâu rlau ndơ bơh n'gâng tâm si.

⁹ Prăk chiăr n'hơ dơi lăp tă bơh Tarsis, Mah tă bơh Uphas, Ndơ nơm blau trah jêh ri kôp ti nơm chiăr prăk, Nsoh bok dak piêk sut chăng krăk ƀư ao; Lĕ rngôch tă bơh ti nơm blau da dê.

¹⁰ Ƀiălah Brah Yêhôva jêng Brah Ndu nanê̆ ngăn; Păng jêng Brah Ndu gŭ rêh mro mrăng, jêng Hađăch n'ho ro. Neh ntu n'gơ n'găr dôl Păng hao ji nuih, Phung ƀon lan mâu dơi dơn ôh nau ji nuih Păng.

¹¹ Lah hom ma khân păng pô aơ phung brah aơ mâu njêng ôh trôk jêh ri neh ntu. Khân păng mra ƀư rai tă bơh măt neh jêh ri bơh trôk.

¹² Brah Yêhôva yơh hŏ rhăk njêng jêh neh ntu ma nau brah Păng, Ndâk njêng neh ntu bơh nau blau mĭn Păng, Lăk huy lĕ ndâr trôk bơh nau gĭt rbăng Păng.

¹³ Tơlah Păng ngơi, lĕ tu dak ta klơ trôk drơu drơu; Păng ƀư n'hôl dak hao bơh ntơm nglĕ dŭt rplay neh. Ƀư ăn lơp nglaih tâm mih, Pơk sail luh bơh lĕ jay prăp drăp ndơ khlay Păng.

¹⁴ Ăp nơm jêng rluk da dê kƀah nau gĭt rbăng; Phung chiăr prăk prêng ma rup brah păng; Yorlah lĕ rup tŏ knŏng jêng nchơt dơm, Mâu geh n'hâm nsôr ôh tâm trôm nây.

¹⁵ Khân păng jêng dơm dam ngăn, du ntil ndơ pâl; Tât nar tâm rmal khân păng mra khân păng mra rai yot.

¹⁶ Drăp ndơn Y-Yakôb mâu nâm bu pônây ôh, Yorlah Păng yơh jêng Nơm hŏ rhăk njêng jêh lĕ rngôch ndô ndơ, Jêh ri Israel jêng mpôl băl drăp ndơn Păng. Amoh Păng jêng Brah Yêhôva ma phung tahan.”

Nau ƀư bu nă dăch tât

¹⁷ Hơi phung ƀon lan bu nchueng jŭm, Dônh rgum hom drăp ndơ gay chalơi bơh n'gor.

¹⁸ Yorlah Brah Yêhôva lah pô aơ: “Ri, tơ̆ aơ Gâp mra mƀăr lơi bunuyh ƀon lan tâm neh aơ hăn ngai, Gâp mra ăn khân păng rêh ni, Gay khân păng kah gĭt.”

¹⁹ Rêh ni ăn ma gâp yorlah gâp geh sôt rmanh! Têl sôt gâp glăm ngăn! Ƀiălah gâp mĭn: “Klăp lah aơ jêng nau ji, Gâp mra mbăk dơn.”

²⁰ Ngih bok gâp rai jêh, Lĕ rse nthăng ngih bok gâp tăch da dê; Phung kon gâp chalơi gâp, Khân păng mâu hôm đŏng ôh. Mâu hôm geh nơm ndâk ngih bok, Ăt mâu hôm geh nơm nthăng bok nching ăn ma gâp.

²¹ Phung rmăk biăp rluk da dê, Mâu joi dăn ma Brah Yêhôva. Yor nây khân păng mâu dơi ndrŏng kuăng, Lĕ rngôch phung biăp khân păng du êng êng.

²² Aơ, geh nau lư mpăr tât, Du nau n'găr ktang bơh neh mpeh pa lơ, Ƀư ăn lĕ ƀon Yuđa luh jêng rngot njăp, Jêng trôm so bri.

Nau mbơh sơm Y-Yêrêmi

²³ Mbah Brah Yêhôva, gâp gĭt trong kon bunuyh hăn khăn păng nơm mâu ƀư kôranh, Khân păng mâu dơi gai lĕ nhuat jâng păng.

²⁴ Mbah Brah Yêhôva, dăn nkra nti gâp, ƀiălah tâm nau di; Mâu di ôh tâm nau ji nuih, Klach lah May ăn gâp rai lơi.

²⁵ Dăn May nkhŭt nau ji nuih ta klơ lĕ bri dak mâu gĭt năl May, Jêh ri ta klơ lĕ ndŭl mpôl mâu kuăl amoh May. Yorlah khân păng hŏ rvăn Y-Yakôb, Jêh ri hôm rvăn đŏng; Khân păng ƀư rai lĕ Y-Yakôb, Ƀư ăn ntŭk gŭ păng jêng rngot njăp.