Yêrêmi 1 - Nau Brah Ndu Ngơi 2023

Kôranh Brah kuăl Y-Yêrêmi

¹ Aơ jêng nau Y-Yêrêmi mbơh, kon bu klâu Y-Hilkia, du huê tâm phung kôranh ƀư brah gŭ ta Anathôt, n'gor Benjamin.

² Brah Yêhôva hŏ lah jêh nau aơ ma păng tâm năm rơh jât ma pe rô̆ Y-Jôsia chiă uănh, kon bu klâu Y-Amôn, hađăch Yuđa,

³ jêh ri tâm du bông rô̆ Y-Jêhôjakim chiă uănh, kon bu klâu Y-Jôsia, hađăch Yuđa, kŏ tât lôch năm rơh jât ma nguay rô̆ hađăch Sêdêkia, kon bu klâu Y-Jôsia, hađăch Yuđa, dôl phung ƀon lan ƀon Yêrusalem ƀư bu nă tâm khay rơh prăm.

⁴ Nau Brah Yêhôva lah ma gâp pô aơ:

⁵ “Êlor rhăk njêng may tâm trôm ndŭl mê̆, Gâp hŏ gĭt jêh may, Êlor may deh, Gâp hŏ prăp êng may; Gâp hŏ ndâk may ƀư nơm mbơh lor ma lĕ bri dak.”

⁶ Gâp lah: “Ơ! Brah Yêhôva ơi! Gâp mâu blau mâm nau ngơi, yorlah gâp hôm mom ndăm.”

⁷ Ƀiălah Brah Yêhôva lah ma gâp: “Lơi ngơi: ‘May hôm e mom ndăm;’ Yorlah may mra hăn lam moh ntŭk Gâp đă may hăn, Jêh ri mra ngơi lĕ nau Gâp ntăm may ngơi.

⁸ Lơi klach khân păng ôh, Yorlah Gâp gŭ ndrel may gay tâm rklaih may.” Brah Yêhôva lah pônây.

⁹ Pôri Brah Yêhôva yơr ti bi ta mbung gâp. Brah Yêhôva lah ma gâp: “Aơ, Gâp hŏ dơm jêh nau Gâp tâm mbung may.

¹⁰ Uănh hom, nar aơ Gâp hŏ ndâk may djôt nau dơi đah lĕ mpôl bunuyh, lĕ bri dak, Gay may rôk tơm mâu lah ƀư rlâm, Ƀư rai mâu lah n'glưh lơi, Ndâk mâu lah brôi tăm.”

¹¹ Nau Brah Yêhôva tât đŏng ma gâp: “Y-Yêrêmi, moh ndơ may saơ?” Gâp lah: “Gâp saơ du mlâm n'gĭng tơm si amandê.”

¹² Brah Yêhôva lah: “Di jêh may saơ, Gâp dôl rngeh gay ma ƀư nau Gâp hŏ lah.”

¹³ Nau Brah Yêhôva ngơi đŏng ma gâp rơh bar pô aơ: “Moh ndơ may saơ?” Gâp sĭt lah: “Gâp saơ du mlâm glah dak duh, bâr glah nkêng bơh mpeh pa lơ.”

¹⁴ Brah Yêhôva lah: “nau mhĭk bơh mpeh pa lơ mra tât klơ lĕ rngôch phung ƀon lan gŭ tâm n'gor nây.

¹⁵ Pôri, Gâp mra kuăl rgum lĕ rngôch băl mpôl bunuyh lĕ bri dak mpeh pa lơ — Brah Yêhôva lah pônây — khân păng mra tât jêh ri lĕ rngôch n'gân da dê sưng hađăch păng ta ntŭk trong lăp lĕ mpông ƀon Yêrusalem, nchueng jŭm pôih nâp păng tâm ban lĕ rngôch ƀon Yuđa.

¹⁶ Gâp mra phat dôih tâm rmal khân păng đah ăp ntil nau mhĭk ma yor khân păng hŏ ƀư nôk chalơi Gâp, nhhơr ndơ ƀâu kah ăn ma phung brah êng, jêh ri chon mon mbah lĕ ndô ndơ tă bơh ti khân păng ƀư.

¹⁷ Ƀiălah du huê kon, vân hom rse bŭt jêh ri gơnh ro ngơi đah khân păng ăp ntil nau Gâp ntăm jêh ăn may. Lơi ta klach krit ôh khân păng klach lah Gâp nơm yơh ƀư ăn may klach krit tanăp măt khân păng.

¹⁸ Aơ nar aơ, Gâp nơm ndâk may hao ƀư du rplay ƀon nâp ktang, ƀư n'gâng loih, mpêr kông gay rdâng ma lĕ n'gor aơ, tâm rdâng lĕ hađăch Yuđa, lĕ phung kôranh, lĕ kôranh ƀư brah, jêh ri phung ƀon lan tâm n'gor.

¹⁹ Khân păng tâm lơh đah may ƀiălah mâu dơi ôh — Brah Yêhôva lah pônây — yorlah Gâp gŭ ndrel ma may gay tâm rklaih may.”