Yakơ 5 - Nau Brah Ndu Ngơi 2023

Nau mbơh lor ma bunuyh ndrŏng

¹ Aƀaơ aơ, hơi phung oh nâu jêng phung ndrŏng! Nhĭm nhhiăng hom, vơl dăn hom yorlah nau rêh ni mra nkhŭt jŭr ta klơ khân may.

² Drăp ndơ khân may ôm rai jêh, kho ao khân may lĕ nchiăr bon sa jêh.

³ Prăk mah khân may lĕ ek găm, nau ek găm nây mra jêng nau mbơh tâm rdâng đah khân may jêh ri păng mra sa nglay săk khân may nâm bu ŭnh sa. Khân may rvê bun prăp ma lĕ nar nglĕ dŭt!

⁴ Aơ, prăk nkhôm phung rek ba nkhôm tâm lôk mir khân may, khân may ntŭng prăp ma khân may nơm, dôl lŭng nter; jêh ri bâr nteh phung rek nây hao tât ta tôr Kôranh Brah geh lĕ nau brah.

⁵ Khân may gŭ rêh sa kah vah ngi, răm maak tâm neh ntu nây; khân may mât rong lay nuih n'hâm khân may nơm tâm nar sreh nkhĭt;

⁶ khân may tâm rmal jêh ri nkhĭt jêh phung sŏng srăng, ƀiălah păng mâu tâm rdâng đah khân may ôh.

Nâp nuih n'hâm tâm nau rêh ni

⁷ Yor ri, hơi oh nâu, srôih hom ma tât nar Kôranh Brah plơ̆ văch. Uănh hom bunuyh kan mir gŭ kâp play kao khlay tă bơh neh, srôih kŏ tât nôk geh dak mih bôk rah jêh ri dak mih dŭt yan.

⁸ Khân may tâm ban lĕ, srôih hom. Gŭ nâp hom nuih n'hâm, yorlah nar Kôranh Brah plơ̆ văch hŏ dăch jêh.

⁹ Hơi phung oh nâu, lơi tâm nduyh ndrăng khân may nơm, gay ma khân may mâu geh nau phat dôih; ri, Nơm phat dôih dôl dâk ta bôk mpông.

¹⁰ Hơi phung oh nâu, tĭng kơt hom anh dơn nau rêh ni jêh ri nau srôih bơh phung mbơh lor, jêng phung bunuyh lah jêh tâm amoh Kôranh Brah.

¹¹ Aơ, he kuăl phung bunuyh nâp jêh jêng geh ueh lăng ngăn. Khân may tăng jêh nkoch bri ma nau Y-Yôp nâp jêh, jêh ri dơi saơ jêh nau ŭch Kôranh Brah; yorlah Kôranh Brah bêng ma nuih n'hâm yô̆ nđach jêh ri nuih n'hâm ueh.

¹² Ƀiălah lor lơn, hơi oh nâu gâp, lơi sơm ton, lơi sơm ton ma trôk, ma neh ntu, mâu lah ma ndơ êng êng; ƀiălah di ngăn jêng lah di ngăn, mâu jêng lah mâu, gay ma bu mâu phat dôih khân may ôh.

Nau mbơh sơm bơh nau chroh

¹³ Mbu moh tâm khân may geh nau rêh ni? Bunuyh nây mbơh sơm hom. Mbu moh geh nau răm maak? Tâm rnê hom.

¹⁴ Mbu moh tâm khân may geh nau ji kuet? Bunuyh nây jă hom phung kôranh bu ranh Phung Ngih Brah Ndu văch; khân păng mra mbơh sơm an tâm amoh Kôranh Brah jêh ri mhĭng dak ngi ôlive ma bunuyh ji.

¹⁵ Nau mbơh sơm tâm nau chroh mra sâm rdâk an bunuyh nây dâk; tơlah bunuyh ji geh nau tih, ăt mra geh nau yô̆ an đŏng.

¹⁶ Pôri, mbơh hom nau tih ndrăng nơm jêh ri tâm mbơh sơm ndrăng nơm gay ma khân may geh nau bah. Nau bunuyh sŏng srăng mbơh sơm, geh nau brah jêh ri geh nau tam ngăn.

¹⁷ Êli jêng bunuyh rdja tâm ban ma he. Păng mbơh sơm dăn gay ma trôk mâu hôm mih jêh ri mâu hôm geh dak mih ôh ta neh ntu dôl tâm pe năm n'gul.

¹⁸ Jêh nây păng mbơh sơm tay, trôk ăn mih, jêh ri neh geh âk kao play.

¹⁹ Hơi phung oh nâu gâp, tơlah du huê tâm phung khân may vĭ nhhơt ƀah ngai bơh nau ngăn, jêh ri geh du huê êng leo păng plơ̆ tay,

²⁰ ăn khân may gĭt, mbu nơm leo du huê bunuyh tih plơ̆ tay bơh trong vĭ nhhơt, jêng rklaih huêng bunuyh nĕ tă bơh nau khĭt jêh ri âk nau tih păng bu mra yô̆ an.