Yakơ 4 - Nau Brah Ndu Ngơi 2023

Njêng mĭt jiăng đah neh ntu

¹ Mbah tă luh lĕ nau tâm lơh, nau tâm djrel tâm phung khân may? Mâu di hĕ păng luh tă bơh nau nglay săk ŭch dôl tâm lơh tâm kô̆ săk jăn khân may?

² Khân may kơnh rlau ir ƀiălah mâu dơi geh ôh, yor ri khân may nkhĭt bunuyh. Khân may ŭch kơnh ƀiălah mâu dơi geh ôh, yor ri khân may tâm djrel jêh ri tâm lơh. Khân may mâu geh du ntil ndơ ôh, yorlah khân may dăn mâu mbơh sơm.

³ Khân may mbơh sơm dăn ƀiălah mâu sŏk dơn ôh, yorlah khân may dăn mbơh sơm đah nau mĭn mhĭk, gay ŭch dŏng ma nglay săk khân may nơm ŭch.

⁴ Nĕ lĕ bunuyh văng tĭr ri! Khân may mâu gĭt hĕ ƀư băl đah neh ntu jêng tâm rlăng đah Brah Ndu? Yor nây, mbu nơm ŭch ƀư băl đah neh ntu, bunuyh nây jêng nơm rlăng đah Brah Ndu.

⁵ Mâu lah khân may mĭn jêng dơm dam nôk Nau Brah Ndu Ngơi lah: “Brah Huêng Ueh jêng Nơm Brah Ndu ƀư ăn gŭ tâm nuih n'hâm he, rŏng ma he kŏ tât geh nau ntôn?”

⁶ Ƀiălah păng ăn nau yô̆ toyh lơn, yor nây Nau Brah Ndu Ngơi lah: “Brah Ndu tâm rdâng đah phung sưr, ƀiălah ăn ma nau yô̆ ma phung dêh rhêt.”

⁷ Pôri, tông hom ma Brah Ndu. Tâm rdâng hom đah brah mhĭk, jêh ri păng mra nchuăt du bơh khân may.

⁸ Văch dăch hom ma Brah Ndu ri mơ Păng mra văch dăch ma khân may. Hơi phung tih, rao kloh hom ti khân may; hơi phung geh bar nuih n'hâm, ƀư kloh hom nuih n'hâm khân may;

⁹ rngot rvê hom, nter lŭng hom, nhĭm nhhiăng hom; rgâl hom gơm jêng nhĭm, rgâl hom maak jêng nau rngot klâng.

¹⁰ Ntrŭnh hom săk jăn khân may tanăp Kôranh Brah ri mơ Păng mra n'hao khân may klơ.

Mâu ngơi mhĭk jêh ri phat dôih ndrăng nơm

¹¹ Hơi oh nâu, lơi ta khân may ngơi mhĭk ndrăng khân may nơm ôh. Mbu nơm ngơi mhĭk ma oh nâu păng nơm mâu lah phat dôih ma oh nâu păng nơm, nâm bu ntĭt ngơi mhĭk ma nau vay jêh ri phat dôih ma nau vay. Ƀiălah tơlah may phat dôih ma nau vay, may mâu di jêng bunuyh jan tĭng ma nau vay ôh, ƀiălah may jêng kôranh phat dôih ma nau vay.

¹² Geh knŏng du huê Nơm ăn nau vay jêh ri phat dôih, jêng Nơm geh nau dơi tâm rklaih jêh ri ƀư rai lôch. Ƀiălah mbu may jêng dĭng janh phat dôih ma phung chiau meng may nơm?

Mâu ngơi rnê ma kan nar ôi taơ

¹³ Aƀaơ aơ, hơi oh nâu jêng phung bunuyh dôl lah: “Nar aơ mâu lah nar ôi taơ he mra hăn ta du ƀon ri, gŭ ta nĕ du năm, tăch rgâl jêh ri sa drăp.”

¹⁴ Ƀiălah khân may mâu gĭt ôh moh nau mra tât ma nar ôi taơ, moh nau rêh khân may jêng? Yorlah khân may jêng knŏng nâm bu n'hôl dak, tâm mpơl tâm ƀât lât jêh ri roh hêng.

¹⁵ Ueh lơn khân may lah: “Tơlah Kôranh Brah ŭch jêh ri he ăt hôm gŭ rêh, he mra ƀư kan aơ kan ri.”

¹⁶ Ƀiălah aƀaơ khân may sưr rlau ngơi nklă! Lĕ rngôch nau sưr kơt nĕ jêng mhĭk.

¹⁷ Pôri, mbu nơm gĭt nau ueh, ƀiălah păng mâu ƀư ôh, păng jêng tih yơh.